භාරත හිරුණිකා සහ දුමින්ද- හන්දියෙ කඩේ ලඟදි.

හංදියෙ කඩේට ගියා විතරයි අපේ දේශපාලන වසවර්තියො ටික එතන අරක්ගෙන ඉන්නව. කොටින්ම කියනව නං බංකු දෙකම හවුස් ෆුල්. මාත්රුකාව උනේ හිරුණිකා නංගි.

"කොච්චර උනත් පවු කෙල්ල!" එකෙක් කියනව.

"අනේ....... එයා දැං හීනෙන් නැඟිට්ට වගේ කෑ ගහනව. මොකෝ එයාගෙ තාත්ත කොලොන්නාවෙ රජකරන කාලෙ කුඩු තිබුනෙ නැද්ද? පාතාලෙ තිබුනෙ නැද්ද? හා කියාපං බලන්න රාජ් මල්ලී?" ඒ ධර්මෙ අයිය.

"හ්ම්"

"අන්න ඒකනෙ කියන්නෙ. ඕක තමයි යතාර්තෙ. තුවාලෙ කොච්චර ලොකු උනත් ඒක තියන එකාට විතරයි රිදෙන්නෙ. අනිත් එකාගෙ අමාරුව තේරෙන්න නං ඉතිං තමන්ගෙත් ඒවගේ තුවාලයක් හැදෙන්නම වෙනව. ඔතනයි අවුල!"මූ දේසනාව නවත්තන්නෙම නෑ.

"නීතියක් තියන රටක උනානං මෙලාකට දුමින්ද ඇතුලෙ!"මාටින් මාමත් කතාවට එකතුවුනා.

"එහෙමම කියන්නත් බෑ බං. එක එක තැන්වලදි ලැබෙන රිසාල්ට් වෙනස්."මං කිව්ව.

"උඹ දන්නවද ඒක වෙන්නෙ කොහොමද කියල?" සුදු මල්ලි ඇහුව.

"හ්ම්...!"

"කියපං බලන්න"

"අපි හිතමු ඇමරිකාවෙදි මෙහෙම දෙයක් උනා කියල. දුමින්ද අල්ල මරණ දඬුවම දෙයි. භාරත නං මැරිලනෙ. ඒ නිසා එහේ මිනිස්සු ජීවත් වෙන දුමින්දගෙ මානව හිමිකම් වෙනුවෙන් වයිට් හවුස්එක ඉස්සරහට යයි බෝඩ් ලෑලි ඇඳගෙන"

"හහ් හහ් හහ්........"

"එංගලන්තෙදි උනානං මෙහෙමයි. ඉස්සෙල්ලම දුමින්ද මන්ත්‍රීකමෙනුයි අධීක්ෂණයෙනුයි ආ.... අධීක්ෂණයක් දීල නැහැල්ලුනෙ, මන්ත්‍රී කමෙන් අයින් වෙනව. ඊට පස්සෙයි ඉතිරි වැඩ"

"ඔව්වොව් සුද්ද එහෙම තමයි"

"අප්‍රිකාවෙදි උනානං අවුල්. එහෙම උනානං හිරුණිකා නංගි දුමින්ද මරල මස් කන්නත් ඉඩ තිබුන"

"හහ් හහ්........ ඉඩියමින් වගේ නේද!"

"පැපුවා නිව්ගිනියාවෙදි නං භාරතගෙ බරට සමාන බර කියන ඌරෙක් දුමින්ද හිරුණිකා කෙළීට දෙන්න ඕන, එහෙම උනොත් ගොඩිං ‍බේරගන්න ඉඩක් තියෙයි."

"දකුණු ඇමරිකාවෙදි සිද්ධ වෙන්නෙ මොකද්ද දන්නවද?"

"හිරුණිකා නංගි දුමින්දට අභියෝග කරනව ද්වන්ධ සටනකට. එහෙම කරල හරියටම ඔරලෝසුවෙ 12 වදිනකොට වෙඩිතියනව නළලටම"

"රුසියාවෙදි නං කූල් විදියටයි ප්‍රශ්නෙ විසඳෙන්නෙ. වොඩ්ක ටිකක් බිවුවම ඔක්කොම හරි"

"අපිටත් හොඳයි ඒ ක්‍රමේ"

"මැදපෙරදිගදි නං දුමින්දගෙ අතපය කපනව. මරනීය දණ්ඩනය ලැබෙන්නත් බොහෝවිට ඉඩ තියනව"

"ඉන්දියාවෙදි වෙන්නෙ මොකද්ද කියල දන්නවද?"

"හා කියපං බලන්න"

"හිරුණිකා තරහ හිතේ තියාගෙන හිටියත් දුමින්දව බඳිනව"

"මොකක්?"

"ඔහොම හිටපංකො කියනකං, ඊට පස්සෙ අවස්තාවක් ලැබුන ගමන්ම දුමින්දට ගේම දෙනව!"

"හරිනෙ මම හිංදි පිචැර් එකකත් දැක්ක"

"මට පොඩි අවුලක් තියෙන්නෙ බං ඔතනදි. ඔය කිව්ව හැම රටකම මොකක්හරි විසඳුමක් අන්තිමට ලැබෙනවනෙ, ඒත් මෙහෙදි මොකුත්ම වෙලා නෑනෙ?" මෙච්චර වෙලා මුකපූට්ටු කරගෙන හිටිය බාලයිය ඇහුව.

"ඒක තමයි බං අපේ ක්‍රමේ! කොච්චර කෑගැහුවත් වැඩක් කෙරෙන්නෙ නෑ. අන්තිමට කෑගහන එකාටම එපාවෙලා නවත්වනකල්!"

oඈහ්!.....ධර්මෙ අය්ගෙ කටේ තිබුන බීඩිකොටේ බිම වැටුන!