Tuesday, November 14, 2017

යහපාලනේ කිව්වොත් සල්ලි තමයි.....

දකින දකින තැන බලන බලන තැන අස්සක් මුල්ලක් නෑර සල්ලි බෙදන පෙරලිකාර යහපාලනේ අපි තවත් වාසනාවන්තයෙක් හොයාගෙන අටකලම්පන්නට ආව.....

"ගෙදර කවුද.......?"

"අපි ආවෙ පොඩි සමීක්ෂණයකට..... ඔයාගෙ නම කියන්න"

"පී.කේ. සරළලතා..... පිස්සු කෙලිනගේ සරළලතා"

"හරි.....සරළලතා මහතිමියගෙ ගෙදර වෙන කවුද ඉන්නෙ?"

"මායි මහත්තයයි දරුවො තුන්දෙනයි අම්මයි...."

"හරි.....කැමතිම බීම ජාතිය මොකද්ද?"

"මහත්තය නං බියර්..... අපි නං මයිලෝ"

"බොහොම හොඳයි.... දෙදාස් පාලහේ ජනවාරි අට ඡන්දෙ දුන්කෙ කාටද?"

"යහපාලනේට!" [විසිල් බල්ටි සමඟ අත්පොලසන් නාදය පසුබිමින්.......]

"යහපාලන..........ය............... ඔව්..... ඡන්දෙ දුන්නෙ යහපාලනයට කිව්ව නිසා සරළලතාට අපි දෙනව මෙන්න මේ මුදල....... එහෙනං කට්ටියත් එක්ක සද්දෙට ගනං කරන්න බලන්න...."

"දාහායි... දෙදාහායි.... තුන්දාහායි..... හාරදාහායි..... පන්දාහායි.....හයදාහායි....... හත්දාහායි....... අටදාහායි...... නවදාහායි..... නවදාස් පන්සීයායි...."

"ඔව් යහපාලනේට ඡන්දෙ දුන්න නිසා රුපියල් නවදාස් පන්සීයක් සරළලතාට හිමිවෙනව..... මොකද හිතෙන්නෙ?"

"ඇත්තටම සංතෝසයි.... අපි ඡන්දෙ දුන්නෙ යහපාලනේට තමයි....."

"ඔව්... කියන්න බලන්න යහපාලනේ ප්‍රතිපල ටික මතකෙන්....."

"ඔව් ජනවාරි අට ඡන්දෙ දීල හිටං තුමා පත්කරගත්ත ඒකෙන් අපිට ලොකු සහනයක් ලැබුන..... ඊට පස්සෙ හිරුනිකා නෝන ඩිපෙන්ඩරේකින් ගිහිල්ල අසරණ තරුණයෙකුට යුක්තිය ඉෂ්ඨ කලා හරිම සතුටුයි ඒ ගැන..... ඊටත් පස්සෙ මාස්ටර් මයින්ඩඩ් අගමැතිතුමයි යාලුවයි එයාගෙ බෑනයි මහබැංකුව කැඩුව, අගමැතිතුමාගෙ මොලේ තියන තැන ඒකෙන් දැනගත්ත.....ඊට පස්සෙ හිටං තුමා නන්ස්ටොප් ආතල් දෙන්න ගත්ත, ඒව ඇහුවම වැඩ කරපු මහන්සිය නැතිවෙනව..... අපි හැමදාම යහපාලනේ එක්කයි. යහපාලනේ මගේ පන වගේ!"

"අන්න ඒ වගේ අපි ඔබේ නිවසට කාර්යාලෙට ගොඩවෙලා ඇහුවත්, බස්හෝල්ට් එකේදි කඩපිලේදි ත්‍රීවීල් එකේදි ඇහුවත් ඡන්දෙ දුන්නෙ යහපාලනේට කියල කිව්වොත්......."

"සල්ලි තමයි!"

Monday, April 3, 2017

කැවුම් මඩුවෙ ගින්න

නිවාඩු දවසෙ දවල් කෑමෙන් පස්සෙ පොඩ්ඩක් නිදාගන්න කලින් ෆෝන් එක අතට අරගෙන බුකිගත වෙලා ඉන්නකොට පුතා ආව. ටික වෙලාවක ඉඳල පුතා, අල්ලපු ගෙදර යාලුව එක්ක සෙල්ලම් කරමින් හිටියෙ.

“තාත්තේ කැවුං මඩුවෙ ගින්දර තියනව... වතුර ටිකක් දාන්න“

පුතාගෙ කතාව ඇත්ත වෙන්න පුළුවන්, අම්ම දවල් කැවුම් වගයක් හදනව දැක්ක ගේ ලඟ තියන පොඩි ගේ කෑල්ලෙ. ඉතිං ගින්දර ඉතිරි වෙලා තියෙන්න පුළුවන්.

“හරි හරි... පුතාල ඒ පැත්තට යන්න එපා... මම වතුර ටිකක් දාන්නං...“

******************************************************

පොරොන්දු වුනාට ෆෝන් එකේ එල්ලිලා හිටිය මට ගින්දර ගැන අමතක වෙලාම ගියා.

“තාත්තේ... අන්න කැවුං මඩුව ගිනිගන්නව...“

පුතාගෙ කටහඬ ඇහුන...

“ඒ කොහොමද?“

“අපි අඟුරු ටිකට පිදුරුයි වේලිච්ච තණකොල ටිකකුයි දැම්ම....“

“ඒ මොකටද? මම කිව්වනේ ඔයාලට ඒ පැත්තට යන්න එපා කියල...“

“ඉතිං ඊට ඉස්සෙල්ල මම තාත්තට කිව්වනේ වතුර දාන්න කියල.... තාත්ත වතුර දැම්මද? නෑනෙ! ඉතිං අපි ගිනි තිව්ව එතකොටවත් ඒවි කියල... දැං දුවල එයි වතුරත් අරගෙන.... හි හි හි....“

කොල්ලයි යාලුවයි පැනල දුවද්දි තමයි ගින්න නිවන්න කල්පනාවට ආවෙ.... මඩුවෙ බාගයක් විතර පිච්චිලා.... ගින්න වහල දක්වා පැතිරිලා....

“මෙන්න මඩුව ගිනිගන්නවා.... ඉක්මනට යං නිවන්න.....“ මම පුළුවන් තරම් හයියෙන් කෑගැහුව...

“මොකද මේ මහ දවල් හීනෙං බෙරිහන් දෙන්නෙ?“ හාමිනේගෙ සද්දෙට තමයි ඇහැරුනේ!

හාමිනේට උත්තර දෙන්න සුනංගු නොවී මම ගියා මඩුව ලඟට... කැවුම් පුච්චපු ලිපට වතුර දාල... ගින්න නිවල තිබුන... පුතා යාලුව එක්ක ආව...

“තාත්ත ආවෙ නෑනෙ... අපි මල් තෙමන බටේ අරගෙන ලිපට වතුර දැම්ම...“

“මොකද්ද දැං වුනේ? ඇයි ඔයා හීනෙං බයවෙලා මඩුවට ආවෙ?“ හාමිනේ ඇහුව.

ආචාර්ය මහාචාර්යලාට වැඩිය ළමයින්ට තේරෙනව ඒ නිසා අවුලක් නෑ!“