Saturday, December 24, 2016

ආගංගොඩ? කොහේද යකෝ ඒ?

ආගංගොඩ තියෙන්නෙ කොහේද?
“ආගංගොඩ” ඇවිල්ලා ලංකාවෙ A කියන දිස්තිරික්කෙ B කියන ප්‍රාදේසීය ලේකං කොට්ටාසෙ C කියන ගිරාම සේවක වසමට අයිති ගමක්. ඔහෙලට ඕනම නං ඉතිං ඔය A, B, C කියන එව්වට ගැලපෙන නමක් දෙකක් කාරිය දාගත්තෑකි. හැබැයි මක්කටෙයි කරදර වෙන්නෙ, ඔය වාගෙම ගං අටෝ රාසියක් මේ පුංචි රටේ තියෙනකොට?

ඇයි මේකට ආගංගොඩ කියන්නෙ?
මේ ගමට “ආගංගොඩ” කියන නම හැදුනෙ කොහොමද කියලා කවුරුත් දැනගෙන හිටියෙ නෑ. කොටින්ම මේ ලියන, ලියන මහත්තයා වන, මට වත් උත්තර දෙන්න ඇහැකි පුරස්නයක් නෙවෙයි ඒක.
හැබැයි මේ ගමට “ආගංගොඩ” නම නං අපූරුවට ගැලපුනා කියමුකො. ආගම්-ගොඩාක් තියෙන ගමකට වෙන මක්කා කියන්ටයැ?

කවුද ආගංගොඩ ඉන්නෙ?
එක්කෙනෙක් තමයි සිරිසේන මහත්තය. ඒ කියන්නෙ ගමේ ග්‍රාමසේවක මහත්තය. හැබැයි එයා රස්සාවෙන් අස්වුනා. ගමේ යූ ඇම් පී කාරයින්ගෙන් කරදර නිසා.

ඊට පස්සෙ?
ඊට පස්සෙ සිරිසේන මහත්තය පොතක් ලියන්න පටන් ගත්ත.

තව කවුද ගමේ ඉන්නෙ?
සමන්තභද්‍ර රහතන් වහන්සේ, එතකොට...

ඇහ්? සමන්තභද්‍ර රහතන් වහන්සේ?
නැතුව නැතුව. මෙන්න බලන්න....
"සමන්තබද්‍ර මහ බෝසතානන් වහන්සේ අරහත් භාවය ලබා ගත්තෙ කොළඹ හිල්ටන් හෝටලයෙදි. අර එක තට්ටුවක් අඩු හෝටලේ කියන්නෙ. ඔව්, ඒකෙදි තමයි."
"ඒ එක්කම පින්වතුනි ඔය ඇත්තන් සිහියේ තබා ගත යුතුයි සමන්තබද්‍ර වහන්සේද අරහත් භාවය ලබා ගන්නේ ඉතාම දුෂ්කර ක්‍රියා කලාපයකින් පසුව බව. කොටින්ම ඔය සම්පූර්ණ කාලය මුලුල්ලේම තන්හා රතී රාගා මර දෙවඟනන් තිදෙනාම සමන්තබද්‍ර වහන්සේගේ සයනය මත උන් වහන්සේගෙ වෑයම අඩපණ කරන මෙහෙයුමක යෙදී සිටියා පින්වතුනි. සමන්තබද්‍ර වහන්සේ අරහත් භාවය ලබා ගන්නේ ඒ මර දුවරුන් සමඟ කළ මාර පරාජයෙන් පසුවයි"

තව?
තව ඉන්නව බ්‍රදර් බර්නාඩ්, මුස්ලිං කෙල්ලයි දෙමළ කොල්ලයි හෙළ බොදු යුක්තිය සංවිධානෙ....

ටහිකෙන ගමක්නෙ යකෝ මේක! කොහේද මේ ගම තියෙන්නෙ?
තියෙන්නෙ ආගංගොඩයගෙ ඔලුවෙ! ඔලුවෙ තියන දේ බ්ලොග් එකට එනව.

එහෙනං ඉතිං පිලිවෙලකට කියවන්න බැරියැ!
එහෙමත් බෑ ඉතිං.... ඒ යකා ටයිං ෆ්‍රේම් මාරු කරනව කිසි කිසි ගාල.... මතකනෙ අර සමනල විප්ලවේ.... පිස්සු හදාගන්නෙ නැතිව කියවන්න එහෙනං.... මෙන්න තැන!

Thursday, December 15, 2016

ආගමික සංකේත සහ ආගමික පොලිසි!

"නැව් සුක්කානමක" හැඩය ගත් සලකුණක් සහිත සපත්තු විකිණූ වෙළඳසැලක් වැටළූ චීවරධාරීන් කිහිපදෙනෙකු උක්ත සලකුණ බුදු දහමෙහි කියැවෙන ධර්මචක්‍රය බව පවසමින් පිස්සු කෙලින වීඩියෝවක් අන්තර්ජාලයේ වෛරල් වෙමින් පවතී. සියල්ල අතහැර පැවිදි වුවද සියල්ල බදාගන්නා පැවිද්දන් ගැන කතාකිරීම අනවශ්‍යය. ඔවුන් පිළිබඳව නීතිය ක්‍රියාත්මක කිරීම රජයේ වගකීමකි. එසේ නොවුනහොත් පසුගිය රජය සමයේ මෙන් චීවරධාරීන්ගේ පිස්සුව උත්සන්න වීමට ඉඩ ඇති අතර ඒ හේතුවෙන් පාලකයන්ට මෙන්ම රටටද බොහේ දේ අහිමි විය හැකිය.

චීවරධාරීන් කුමක් කලද ආගමික සංකේත සම්බන්ධයෙන් රටකට නීති රීති අවශ්‍යය. කුමක්ද මේ ආගමික සංකේත?
ආගමික සංකේත යනු ඕනෑම ආගමක ශාස්තෘන් විසින් දේශනා කල දෑ සහ ආගම්වලට අනන්‍ය වූ දේවල් ආදියයි. ඒවා සියල්ල ඒ ඒ ආගම්වලට සහ ආගමිකයන්ට අයත් බුද්ධිමය දේපල ලෙස සැලකිය හැකි අතර ඒවා යොදාගැනීම හෝ පාවිච්චිය සම්බන්ධව සීමා තිබිය හැකිය. උදාහරණයක් ලෙස ව්‍යාපාරයක් ලියාපදිංචි කිරීමේදී ආගමික නායකයෙකුගේ නම යොදාගත නොහැකි යැයි නීතියක් තිබේ. බුද්ධා වයින් ස්ටෝර්ස් හෝ මුහම්මද් නබි මස් වෙළඳසල හෝ ජීසස් බේකරිය වැනි ව්‍යාපාර ලංකාවේ ලියාපදිංචි කල නොහැකිය. බුදු පිළිම හා ඡායාරූප, බුදුදහමේ සඳහන් සංඝ්‍යාගේ පිළිම සහ ඡායාරූප ආදියද ව්‍යාපාරික හෝ වෙනත් අරමුණු වෙනුවෙන් යොදාගැනීම නොකල යුතුය. මේවා සම්බන්ධ නීති රීති ඒ ඒ රටවලට ගැලපෙන ලෙස යොදාගෙන තිබේ. උදාහරණයක් ලෙස ඉස්ලාම් නීතිය ක්‍රියාත්මක වන මැදපෙරදිග රටවල කුරාණයට අපහාස සිදුවන ආකාරයේ ක්‍රියාවන්ට ලැබෙන දඬුවම් බරපතලය.


◄මෙවන් රෝද සහිත කරත්තයක් අදින ගොණුන් පවුකාරයන්ය!

කෙසේ වුවත් එක් එක් ආගම්වල පවතින නීති රීති ඒ ඒ ආගම්වල දර්ශනය සමඟ බැදී පවතී. ඉස්ලාමයේ පවතින නීති රීති දැඩි වන අතර කතෝලිකයන් තම ආගමික සංකේත සම්බන්ධයෙන් එතරම් දැඩි පිලිවෙතක් අනුගමනය නොකරයි. උදාහරණයක් ලෙස ‍ජේසුස් වහන්සේගේ හෝ කුරුසිය වැනි රුව සහිත ඇඳුම් පැළඳුම් කතෝලිකයන් පාවිච්චි කරන අතර දෙවියන් වහන්සේ ඡායාරූපයට නැඟිම පවා ඉස්ලාමයට අනුව නොකල යුත්තකි. අනෙක් ප්‍රධාන ආගම් දෙකට සාපේක්ෂව ආගමික සංකේත විශාල ප්‍රමාණයක් ඇති බෞද්ධයන් ඒවා සම්බන්ධයෙන් දක්වන්නේ ගෞරවය මුසුවූ ප්‍රතිචාරයකි. බුදුන් වහන්සේ හෝ රහතන් වහන්සේලා නියෝජනය වෙනුවෙන් කිසිවකු පෙනී නොසිටින අතර නාට්‍යමය අවස්ථාවක වුවද යොදාගන්නේ සංකේත පමණකි. ඒ ගැන ප්‍රශ්නයක්ද නැත.


මේ කොකිස් කෑවොත් පවුද?►


මතභේදයට තුඩුදෙන කරුණ වන්නේ ආගමික සංකේත නිසි පරිදි අර්ථදක්වා ගැනීමයි. අවුල් ඇතිවන්නේ එසේ නොවූ විටය. මගේ විශ්වාසය අනුව ආගමික සංකේත ලෙස සැලකිය හැක්කේ කෙලින්ම ශාස්තෘටත්, එවැනි අනෙකුත් පුද්ගලයන්ටත්, අදාල ශාස්තෘ හෝ ආගම විසින් හඳුන්වා දුන් යම් යම් දෑ වෙතොත් ඒවාය. ඒ අනුව ආගමික නායකයන්ගේ රූප-පිළිම ආදියත්, ඔවුන්ගේ දේශනා පාඨ-ගාථා-යාඥාපාඨ ආදිය මීට අයත්ය. එමෙන්ම ආගමිකයන්ගේ නිෂ්පාදන වන ශ්‍රී මහා බෝධිය, දළදා මාලිගාව, මක්කම වැනි ස්ථානවල අයිතියද ඔවුන් සතුය. එහෙත් මිනිසා විසින් නිපදවන ලද හෝ ස්වභාවයේ පවතින දේවල්වල අයිතිය ආගමිකයන්ට නොමැත. උදාහරණයක් ලෙස බුදුන් වහන්සේ එක් අවසථාවක යම් ධර්ම කරුණක් [මෙය බ්ලොග්කරුට අමතකය] විස්තර කිරීමට යොදාගත්තේ එකල පහසුවෙන් පෙන්විය හැකි උදාහරණයක් වන කරත්ත රෝදයක්ය.කරත්ත රෝදය 'ධර්මචක්‍රය' ලෙස බෞද්ධයන් හැඳින්වූ පමණින් එය වෙනස් වන්නේ නැත. තවත් උදාහරණයක් ලෙස කුරුසිය, කතෝලිකයන්ගේ සංකේතයක් වන අතර කුරුසිය කතෝලිකයන්ට පූජනීය වීමටත් ප්‍රථම මිනිසුන් යොදාගත් උපකරණයකි. ඉස්ලාමයේ ඇති අඩ සඳ හා තාරකා සලකුණ සම්බන්ධ තත්වයද එසේමය. සරළව කිවහොත් ඔවුන්ගේ දේවල් ඔවුන්ටය. අනෙක් දේවල් ඕන කෙනෙකුට විවෘතය.

ආගමික සංකේත සම්බන්ධයෙන් මා ඉහත සඳහන් කල ආකාරයේ නීති රීති පද්ධතියක් රටේ පොදු නීතියට අවශ්‍යය. එවිට ඕනෑම අවස්ථාවක් සම්බන්ධයෙන් නීතිය අනුව කටයුතු කල හැකි අතර නීතිය අතට ගැනීමට කිසිවකුට ඉඩ ලැබෙන්නේ නැත. ආගමික සංකේත තිබුනාට ආගමික පොලිසි අවශ්‍ය නැත. ආගමික හෝ නිර් ආගමික ඕනෑම අයෙකු ආගමික සංකේත අවභාවිතා නොකල යුතු අතර එකිනෙකා සම්බන්ධයෙන් ඇති ගෞරවයේ තරමට සමානුපාතිකව ජනවර්ග අතර සමඟියද පවතිනු ඇත.

Wednesday, December 14, 2016

මාධ්‍යකරුගේ උදාර අපේක්ෂාව....

දහවල් සිදුවූ සිදුවීම හේතුවෙන් රොෂාන් ගුණසේකර සිටියේ කැළඹීමෙනි. මධ්‍යම රාත්‍රිය වන තෙක් ඇ‍ඳේ ඒ මේ අත පෙර‍ලුනද නින්ද අහලකවත් නැත. ආහාර ගැනීමට රුචියක් නොවූයෙන් රාත්‍රී ආහාරය වර්ජනය කිරීමේ ප්‍රතිපලද ශරීරයට දැනේ. කරන්න‍ට දෙයක් නැත. සිදුවූ දේ ආපසු ඇද්දවිය නොහැකිය.

අනෙක්පස සිටි බිරිඳටද සැමියාගේ කනස්සල්ල නොතේරුනා නොවේ. අවසානයේ ඇය නිහඬතාවය බිඳ දැම්මාය.

"දැං ඉතිං මොනව කල්පනා කරන්නද.... වෙච්ච දේ වුනා... ඒත් ඔයාට තිබුනෙ යන්න කියද්දි ඉක්මනට මාරුවෙන්න.... ඔයිං ගියා ඇති....ගහන්නැතුව වෙඩි තිව්ව නං එහෙම?"

"ඒ වුනාට හාමිනේ නිව්ස්එක ගන්නම වෙනවනෙ.... ඒකයි ගියේ නැත්තෙ"

"හරි හරි.... කීයක් හරි ලැබෙන එක ඇත්ත... ඒත් ඉතිං ඔක්කොටම කලින් ජීවත් වෙන්නෙපැයි"

"නෑ නෑ.... ලැබෙන ගාන නිසා නෙවේ නෝනේ මම ඒක කවර් කරන්න හැදුවෙ..."

"එහෙනං... ඔයාට හිරු එකට ස්ථිරව යන්න ලැබෙයි කියල හිතුවද?"

"නෑ නෑ.... මේ..."

"එහෙනං? පත්තරේට යන්න නේ?...."

"නෑ නෝනේ පත්තරේට යන්නත් නෙවේ.... මිනිස්සු ගොඩක් බලාපොරොත්තු තියාගෙන පත්කරපු ජනාධිපතිතුමා....."

"ජනාධිපති! ජනාධිපතිගෙ වැඩ එයා බලාගනී...."

"මේ වෙලාවෙ අපි හැම දෙයක්ම හරියට වාර්තා කරන්නෝන.... මොකද..."

"ඇයි? ඔයාට සම්මානයක් ලැබෙයි කියලද? ලැබෙයි ලැබෙයි මේං කියල...."

"නෑ නෑ...."

"හරි ඉතිං කියන්නකො ඔච්චර උවමනාවෙන් ඉස්සරහට පැන්නෙ මොකද කියල"

"නෑ නෝනෙ මේකනේ....වරායෙ සේවකයන්ගෙ පොඩි කේස් එකකට, නේවි එකේ ලොක්ක ලොකු බෝට්ටු දෙකකින් ඇවිල්ල කේස්එක සෙට්ල් කරල ගියා කියන නිව්ස් එක අපි හරියට කවර් කලේ නැත්තං අපේ ජනාධිපතිතුමා කොහොමද එහෙම දෙයක් රටේ සිද්ධවුනා කියල දැනගන්නෙ....?"

Sunday, December 11, 2016

ගෝරිල්ල‍ාගේ කනේපාර සහ වරායේ අවුල.

ඊයේ රාත්‍රියේ රූපවාහිනී ප්‍රවෘත්ති නැරඹීමේදී දුටුවේ අපූරු දසුනකි. අපූරු කීවාට එය අපුල දනවන දසුනකි. වරාය සේවකයන්ගේ අත්අඩංගුවට පත්ව තිබූ හම්බන්තොට වරායේ නැව් දෙකක් නිදහස් කරගැනීමට පැමිණි නාවික හමුදාව අතර කොට කලිසමකින් සහ ටීෂර්ටයකින් සැරසී සිටි 'ගෝරිල්ලකු' මාධ්‍යවේදියෙකුට අසභ්‍ය වචනයෙන් බැන පහර දුන් ආකාරයයි. පසුව දැනගත් පරිදි මේ අන් කිසිවකු නොව නාවික හමුදාපති වයිස් අද්මිරාල් රවී විජේගුණරත්නය!

හම්බන්තොට වරාය ගැන අමුතුවෙන් කතා කිරීමට අවශ්‍ය නැත. චීනයෙන් ලබාගත් බිලියන එක්දස් පන්සීයකට අාසන්න ණය මුදල්වලින් වරාය සෑදුවද පැමිණි නැවක් නොවූ අතර වරායේ තිබුනා යැයි කියූ ගල, දයාසිරි ජයසේකරගේ බඩපිනුමට පින් සිදුවන්නට කුඩුවී ගිය බව පෙනුනි. රාජපක්ෂ යුගයේදී වරාය ක්‍රමයෙන් ලාභ ලබන තත්වයට පත්වෙමින් තිබූ බව හිටපු ජනාධිපතිවරයා පැවසුවද ඇත්තටම සිදුවූයේ කොළඹ වරායට පැමිණෙන නැව්වලින් කොටසක් බලහත්කාරයෙන් හම්බන්තොටට තල්ලු කර යැවීමයි. එමඟින් උත්සාහ කලේ හම්බන්තොට වරාය ආදායම් උපදවන ස්ථානයක් බව පෙන්වීමයි. ආණ්ඩු මාරුවත් සමඟ මේ තත්වය වෙනස් වූ අතර හම්බන්තොට වරාය ලැබුවා යැයි කියන ලාභයද නැතිවිය. වරාය අධිකාරිය, ලංකාවේ පාඩු ලබන ආයතනයක් නොවුවද කොළඹ වරායෙන් ලබන ලාභය හම්බන්තොට පාඩු පියවීමට වැය කිරීමට සිදුවිය. හම්බන්තොට වරාය චීන සමාගමට ලබාදීමට සිදුවන්නේ මෙවන් පසුබිමකය.

වරායේ තත්වය එසේ වනවිය එහි සේවකයන්ගේ තත්වය තවත් අයහපත් විය. වසර ගණනාවක් තිස්සේ රජ කුමරුවන්ට‍ බැල මෙහෙවර කල තරුණ තරුණියන් වරායේ සේවයට ගත්තේ ඔවුන්ගේ 'වරාය රස්සා' සිහිනය සැබෑ කරන බව පවසමිනි. එහෙත් සොච්චම් වැටුපක් හා කිසිදු දීමනාවක් රහිතව වසර ගණනාවක් සේවය කලද 'වරාය රස්සා' සිහිනය සැබෑ නොවූ අතර ආණ්ඩු පෙරලියෙන් පසුද කොම්පැනි සේවකයන් ලෙස රැකියා සුරක්ෂිතතාවයක් නොමැතිව සේවය කිරීමට ඔවුන්ට සිදුවිය. වරායේ කොටස් චීන සමාගමට විකිණීමේදී රැකියා සුරක්‍ෂිතභාවය ගැන යම් සහතිකයක් ලබා දුන්නද සේවකයන්ගේ අපේක්‍ෂාව වූයේ තවම දිනාගත නොහැකිව තිබූ වරාය අධිකාර‍ියේ රැකියාවයි.

දින කිහිපයකදී අවුල දුරදිග ගිය අතර මුහුදට පැනගත් සේවකයන් නැව් මාර්ගය අවහිර කිරීමත්, පෙරේදා පැවති මාධ්‍ය සාකච්ඡාවකදී ‍වරායේ තෙල් සංචිත ගැන කියමින් රජයට අනතුරු හැඟවීමට ඔවුන් කටයුතු කිරීමත් හේතුවෙන් වරාය තමන් අතට ගැනීම හැර විකල්පයක් රජයට නොමැති විය. නාවික හමුදාව සිද්ධියට මැදිහත් වන්නේ එලෙසය.

සේවකයන් ඉවත් කර වරායේ පාලනය තමන් අතට ගැනීමේ කාර්යයේදී නාවික හමුදාවේ මැදිහත් වීම, රතුපස්වලදී පිරිසිදු ජලය ඉල්ලූ ජනතාව මර්ධනය කිරීමේදී හෝ කටුනායක ඇඟළුම් කම්හල් සේවකයන් බලහත්කාරී විශ්‍රාම වැටුපට විරුද්ධ වීමේදී හෝ හලාවත ධීවර විරෝධතාවයට ඉවක් බවක් නොමැතිව වෙඩි තැබූ හමුදාවේ කාර්යභාරයට වඩා ප්‍රශංසනීයය. වෘත්තීය අරගල පාලනය කිරීමේදී වෛරී සහගතව කටයුතු නොකිරීම ආරක්ෂක අංශ විසින් ප්‍රගුණ කලයුතු නිපුනතාවයකි. මක්නිසාද යත් උද්ඝෝෂකයන් සමඟ පෞද්ගලික අමනාපයක් ආරක්ෂක අංශ සතුව තිබිය නොහැකි බැවිනි. ඒ අර්ථයෙන් නාවික සෙබලුන්ගේ හැසිරීම මෙවන් අවස්ථාවක පොලිසියේ හැසිරීමට වඩා සතුටුදායකය. එහෙත් කිරි කලයට ගොම දැමීමක් වූයේ නාවික හමුදාපතිවරයාගේ අනවශ්‍ය මැදිහත් වීමයි. වරාය තුල වෘත්තීය අරගලයක් කරමින් සිටි නිරායුධ පුරවැසියන් සීයක් දෙසීයක් පාලනය කිරීම සඳහා නාවික හමුදාපතිවරයා මැදිහත් වීම මැස්සෙකුට වෙඩි තැබීමට කාලතුවක්කුවක් පාවිච්චි කිරීමකි. නිල ඇඳුමක් හෝ නොමැතිව පැමිණි නාවික හමුදාපතිවරයා මාධ්‍යවේදීන්ට අසභ්‍ය වචනයෙන් බැනවදිමින් පහරදීම නාවික හමුදාපති තනතුරෙහි තත්වය කෙලෙසීමකි. නීතිය ක්‍රියාත්මක වන රටක නම් මේ වනවිට ඔහු සිටිය යුත්තේ නිල ඇඳුම් රහිතවය.

අවසාන වශයෙන් කිවයුත්තේ හම්බන්තොට වරාය සේවකයන්ගේ ගැටළුව විසඳීමට ආණ්ඩුවේ මැදිහත් වීම මීට වඩා ඇවැසි බවය. මේ සේවකයන් රැකියාවට පැමිණියේ කෙසේද, රැකියාවට කලින් සිටියේ කා සමඟද යන ප්‍රශ්නවලට ලැබෙන පිළිතුරු කුමක් වුවද ඔවුන් මේ රටේ තරුණ තරුණියන්ය. අවුරුදු පහක් හයක් සේවය කල ඔවුන්ට වර්තමානයේ ඇති රැකියා සුරක්‍ෂිතභාවය හෝ ලැබෙන ආකාරයේ විසඳුමක් ලබා දීමට ආණ්ඩුවට හැකි නම් එය දේශපාලන වශයෙන්ද පාඩුවක් සිදුවන දෙයක් නොවේ.

Saturday, December 10, 2016

බත් පිඟාන, බඩ සහ අපේ බඩජාරි කෑම.

පසුගිය දිනෙක කාර්යාලයට පැමිණ දේශනයක් ලබාදුන් කවුදෝ ගොඩවෙදෙකුගේ අදහස් බොහෝ කාර්යාල ‍නිලධාරීන්ගේ සිත්ගත් බව පෙනී ගියේය. අප ඕනෑ තරම් දැක ඇති සාම්ප්‍රදායික හණමිටි අදහස් රැසක් ඔහුගේ දේශනාවේ අන්තර්ගත වූ බව ඊට සවන් දුන් අයගේ කතා අනුව පැහැදිලි විය. ඩෙනිම් ඇඳීම නරකය, සාම්ප්‍රදායික 'අපේ ආහාර' හැර අන් සියල්ල වසය ආදී අදහස් එහෙන් මෙහෙන් අසන්නට ලැබුනි. කෙසේ වුවත් කෑම සම්බන්ධයෙන් ලාංකිකයාගේ අවධානය යොමුවිය යුතු කරුණු කිහිපයකි.

වර්තමානය වනවිට ලාංකිකයන් බොහේ දෙනෙකු බෝ නොවන රෝගවලින් පීඩා විඳින බව නොරහසකි. දියවැඩියාව, රුධිරයේ කොලෙස්ටරෝල් හා ඊටම සම්බන්ධ අධි රුධිර පීඩනය, හෘදයාබාධ ආදිය ඒ අතරින් ප්‍රමුඛය. රටේ ජනගහනයෙන් බහුතරයක් කෘෂිකාර්මික, ධීවර කටයුතු වැනි වෘත්තීන්වල යෙදුනු අතීතයේ මෙන් නොව මේ වනවිට වැඩි පිරිසක් යෙදෙන්නේ සුදු කරපටි රැකියාවලය. කාර්මීකරණය ආරම්භ වූ රටවල මෙන් ව්‍යායාම ආදිය සඳහා වෙනම කාලයක් වැය නොකල අප රට වැසියන්ගේ ව්‍යායාම අවශ්‍යතාවය සපිරුනේ ඉහත කී වෘත්තීන් තුලින්මය. එහෙත් මේ වනවිට කය නොවෙහෙසා රැකියාවන්වල යෙදෙන්නන් ව්‍යායාම වෙනුවෙන් දක්වන උනන්දුව අල්පය.

මීට අමතරව බෝ නොවන රෝග අපේ බත් පිඟාන සමඟ ඇත්තේ කිට්ටු සම්බන්ධයකි. ලාංකීය ආහාර රටාව සකස් වී ඇත්තේ විශාල බත් පිඟානකට බෙදාගන්නා, බත් ප්‍රමාණයෙන් පහෙන් එකක පමණ එළවලු එලවලු කිහිපයක් හා මස්-මාළු වැනි දෙයකිනි. එළවලු වෙනුවෙන් අල වර්ගයක් එකතුවීමට ඇති ඉඩකඩ විශාල වන අතර එහි ප්‍රතිපලය පිශ්ඨය අධික ප්‍රමාණයක් හා අනෙකුත් පෝෂක ඌණ ලෙස ශරීරගත වීමත්ය. මෙහි ප්‍රතිපලය ලෙස උදරය නෙරා ඒමේ පටන් (කොහොමටත් අසියාතිකයන්ගේ ශරීරයේ මේදය තැන්පත් වීම සිදුවන්නේ උදරය ආශ්‍රිතවය) ඉහත සඳහන් කල රෝගයන්ට ගොදුරු වීමේ අවදානම ඉතා ඉහලය.

මේ අවුලට යෝජනා වන විසඳුම් දේශපාලනිකය. ආහාර සම්බන්ධ පොදු එකඟතාවයක් හෝ ප්‍රතිපත්තියක් නොමැති බැවින් ඕනෑම අයෙකුට ඕනෑම හිතලුවක් දේශනා කිරීමට බාධාවක් නැත. ඕනෑ නම් විද්‍යත් සහ මුද්‍රිත මාධ්‍යන්ද මේ සඳහා උපයෝගී කරගත හැකිය. උදාහරණයක් ලෙස පොල්තෙල් ආහාරවලට යෙදීම හොඳද නරකද යන්න පිළිබඳව රටේ පොදු එකඟතාවයක් නොමැත. ජාතිකවාදී කඳවුරේ පෝෂණ වේදීන්ට අනුව පරම්පරා ගනනක් තිස්සේ භාවිතා කල බැවින් පොල්තෙල්වල කිසිදු අවුලක් නොමැති අතර ඔවුන් එදා සහ අද ජීවන විලාසිතාවේ වෙනස්වීම අමතක කර ඇත. තවත් සමහරුන්ට පොල්තෙල්වල කොලෙස්ටරෝල් බහුලය. මේ ගැන පෙර ලිපියක කතාකල බැවින් යලිත් කතා කිරීම අනවශ්‍යය.

කතාකල යුතු ප්‍රධාන මාතෘකාව වන්නේ සෞඛ්‍ය සම්පන්න දිවියක් ගතකිරීම වෙනුවෙන් බත් පිඟාන යාවත්කාලීන විය යුත්තේ කෙසේද කියාය. මේ වෙනුවෙන් සමබර ආහාර වේලක් ලබාගත යුතු අතර අධික ලෙස කුස පුරවන බත් කෑම අඩුකර එළවලු සහ මස් මාලු ආදිය වැඩි කල යුතුය. එසේ නම් කුඩා බත් ප්‍රමාණයකට එළවලු සහ මස් මාලු ආදිය වැඩිපුර ගෙන ආහාර ගැනීමට ඔබ සූදානම්ද? එය මේ ‍බ්ලොග්කරුවා දින කිහිපයක් අත්හදා බැලීමෙන් අනතුරුව අසාර්ථක වූ ව්‍යායාමයකි.


☜අඩු බත සහ වැඩි එලවලු.[හිතවතෙකුගේ බත් පිඟානක්]



උක්ත ක්‍රමය අසාර්ථක වීමට අපේ ඉහුම් පිහුම් කිරීමේ ක්‍රමය මූලික හේතුවයි. අපේ ඉවීම සකස් වී ඇත්තේ ග්‍රෑම් දෙසීයක පමණ එලවලු ගෙන තේ හැඳි කිහිපයක් කුළුබඩුත්, මිරිස්, ගම්මිරිස් ආදියත් ඊට අමතරව රම්පෙ-කරපිංචා වැනි රසකාරකත් යොදා පොල් කිරි ටිකක්ද එක්කර යහමින් තම්බා සකස් කරගන්නා ව්‍යංජනවලිනි. මස් හෝ මාලු ඉවීම සම්බන්ධයෙන්ද ඇත්තේ එවැනිම තත්වයකි. මෙලෙස උයාගන්නා ව්‍යංජන සහ මස් මාලු ආදිය ගිලදැමීම සඳහා හාල් සේරුවක බත් ඇවැසි වීම පුදුමයක් නොවේ. අප ආහාරයට ගන්නේ මස්, මාලු හෝ එළවලු නොව කුළුබඩුය. මෙසේ ආහාරයට ගන්නා මිරිස් සහ කුළුබඩු අම්ල පිත්ත රෝගයටද හේතුව බව සිතිය හැකිය.

එබැවින් දැන් සිදුකල යුත්තේ කෑම පිඟානෙහි බත් අඩුකිරීමත් එළවලු හා මස් මාංශ වැඩිකරීමත් ආහාර පිසීමේ රටාව වෙනස් කිරීමත්ය. අධික කුළුබඩු රසට පුරුදු වී ඇති ලාංකිකයන්ගේ දිව කෙසේ හෝ ආහාරයවල ස්වභාවික රසයට කැමති කරවාගත යුතුය. එසේ නොවී ලොකු බත් පිඟාන මෙන්ම ලොකු බඩගෙඩියද, මැදිවියටත් පෙර පැමිණ ජීවිතය අවසානය දක්වා එකට සිටින රෝග කිහිපයද අඩු කිරීම අපහසු විය හැකිය.

Wednesday, December 7, 2016

වේලාව නැවීම.

පසුගිය දිනවල, රජයේ කාර්යාල වේලාව නම්‍යශීලී කිරීමේ අදහසක් ගැන ආණ්ඩුව පැත්තෙන් අදහසක් ගෙනා බව මතකය. ඒ ගැන ලිවීමට සිටින විට රසිකලොජිස්ට් බ්ලොග් අඩවියේ රසිකගේ කාර්යාල වේලාව සංශෝධනය වීම පිළිබඳවද සටහනක් තබා තිබුනි. කෙසේ වෙතත් රජයේ කාර්යාල වේලාව නම්‍යශීලී කිරීම පිළිබඳව ජනතාවගේ පැත්තෙන් යහපත් ප්‍රතිචාරයක් ලැබෙන බවක් පෙනෙන්නට නැත. ඒ පිළිබඳව ඇති අවබෝධයද අවම මට්ටමක පවතින බව පෙනෙන්නට ඇත

ආයතන සංග්‍රහයේ XXVIII පරිච්ඡේදය අනුව රජයේ නිලධාරීන්ගේ සාමාන්‍ය කාර්යාල වේලාව පෙරවරු 8.30 සිට පස්වරු 4.15 දක්වා වන අතර කණිෂ්ඨ කාර්ය මණ්ඩය නිලධාරීන් උදෑසන සහ සවස් කාලයෙන් තවත් පැය භාගය බැගින් සේවය කලයුතුය. මීට අමතරව සහනයක් ලෙස පැය භාගයක ආවරන කාලයක්ද ලබාදී ඇත. එනම් උදෑසන 8.30 සහ 9.00 අතර කාලය තුල සේවයට පැමිණෙන නිලධාරීන්ට සවස 4.15 සිට 4.45 දක්වා කාලය තුල පසුව ප්‍රමාද වූ කාලය ආවරණය කල හැකිය. මීටත් අමතරව ගර්භනී කාන්තාවන් සඳහා පැය භාගයක් ප්‍රමාදව සේවයට පැමිණීමටත් පැය භාගයකට කලින් පිටවීමටත් හැකියාව ඇති අතර දරු ප්‍රසූතියෙන් පසු අඩ වැටුප් හෝ වැටුප් රහිත නිවාඩු ලබා නොගන්නේ නම් පැයකට පෙර කාර්යාලයෙන් පිටත් වීමටද(කිරි පැය) හැකියාව ඇත.

යෝජිත සංශෝධනය අනුව පෙරවරු දහය පමණ වන තෙක් කාර්යාලයට පැමිණිය හැකි අතර එතැන් සිට දිනකට නියමිත පැය ගණන සේවය කිරීමෙන් පසුව පිටවිය හැකිය. මේ නිසා කාර්යාල නිලධාරීන් මෙන්ම අනෙකුත් පුරවැසියන්ගේද යම් යම් අපහසුතා මඟහැරේ. උදාහරණයක් ලෙස නාගරික ප්‍රදේශවල පවතින රථවාහන තදබදය හා පොදු ප්‍රවාහන ක්ෂේත්‍රයේ පවතින තදබදය යම් මට්ටමකින් අඩු වේ යයි සිතිය හැකිය. එමෙන්ම ප්‍රමාද වී කාර්යාලයට යාමට හැකිවීම හේතුවෙන් උදෑසන කාලයේ පවතින අධික විදුලි ඉල්ලුම අඩුවිය හැකිය. යම් ආයතනයක සේවා කාලය පුළුල් වූ විට සේවා දායකයන්ට එහි වාසිය හිමිවේ.

කෙසේ වුවත් මෙවැන්නක් සිදුකල යුත්තේ යම් යම් සීමාවන්ට යටත්වය. රසිකලොජිස්ට්ගේ ලිපිය අනුව වේලාව වෙනස් වුවද සතියට නියමිත පැය ගණනක් ඇතිවාක් වැනි කොන්දේසි තිබිය යුතුය. විශේෂයෙන්ම බාහිර සේවාදායකයන් සමඟ සෘජුව සම්බන්ධ වන නිලධාරීන් සඳහා මෙම වේලාවන් ක්‍රියාත්මක කල නොහැකි අතර අභ්‍යන්තර රාජකාරි කටයුතු පමණක් පැවරී ඇති සේවකයන් සඳහා මෙවැන්නක් ක්‍රියාත්මක කලහැකිය.

Monday, December 5, 2016

කුමාර්, ජවිපෙ සහ වාම දේශපාලනය.

කුමාර් ගුණරත්නම් නිදහස් විය. වැඩි සද්ද බද්ද නැත. ඔහුගේ මව පැමිණ පුතු වැලඳගැනීමේ දසුන සංවේදීය. කොහොමටත් හිරේ ගිය පුතුන් නිදහස් වීම මවුවරුන්ට සතුටකි. පෙරටුගාමී සමාජවාදී පක්ෂයේ නායකයාට පසුගිය වසර කිහිපය තුල සිදුවූ අලකලංචි අනන්ත අප්‍රමාණය. ජවිපෙන් කුට්ටියක් කඩාගෙන අලුතෙන් පක්ෂය පිහිටුවීමත් ඒ හා සමාන්තරව ඔහු හා දිමුතු ආටිගල පැහැරගැනීමත් ඉන් අනතුරුව ඕස්ට්‍රේලියාව බලා යාමත් යලි මව්රටට පැමිණ වීසා නොමැතිව රැඳී සිටීම හේතුවෙන් අත්අඩංගුවට පත්වීමත් ඒ අතර ප්‍රධානය. කුමාර් මහතාට සිදුවූ මේ ඇබැද්දි රටේ දේශපාලනය පැත්තෙන් සහ ඔවුන්ගේම වාමාංශික දේශපාලනය අධ්‍යයනය කිරීමට හොඳ කේස් ස්ටඩියක්ය.

කුමාර් ජවිපෙට සම්බන්ධව සිටියේ තිරය පිටුපස හැංගුනු චරිතයක් ලෙසය. ඇතැමෙකුට අනුව කලක් ජවිපෙ නිල නොලත් නායකයාගේ භූමිකාවද ඔහු විසින් රඟදැක්වූ බව කියවේ. අනූව දශකයේ මැද භාගය වනවිට රටේ පැවති තත්වය අනුව දේශපාලන හැංගිමුත්තන් සෙල්ලම් කිරීමේ අවශ්‍යතාවයක් නොවීය. එහෙත් කුමාර් සිටියේ තිරය පිටුපසය. සැඟවුනු න‍ායකයෙකු සිටීම පක්ෂයට මාර මෙව්ව එකක් තිබුන නිසා විය හැකිය. හැංගිමුත්තන් සෙල්ලමට බොහෝ දෙනෙක් මනාපය.

ඉන්පසුව ආරම්භ වූයේ හතුරු මිතුරු සෙල්ලමයි. කුමාර් තවත් පිරිසක් සමඟ ජවිපෙන් ගැලවී ගිය අතර වාමාංශිකයන්ට ආවේනික වෛරය එතැනින් ආරම්භ විය. වාමාංශිකයන්ගේ සෙල්ලමට සම්බන්ධ වූ ආණ්ඩුවද කුමාර් සහ දිමුතු පැහැරගෙන පුවත් මවමින් උපරිම ලෙස ආතල් ගත් අතර කුමාර් යනුවෙන් අයෙකු නොදන්නා බව කියමින් ජවිපෙ පශ්චාත්භාගය පොලවේ ගසාගත්තේය. ඔවුන් පැහැරගැනීමට ජවිපෙන්ද උදව් ලැබුනු බව පසුව කියවුනි.

කෙසේ වුවත් වසරකට පසුව කුමාර් ගුණරත්නම් අර්ධ වශයෙන් නිදහස ලබා ඇති අතර එය පූර්ණත්වයට පත්වීමට නම් ඔහුගේ පුරවැසිභ‍ාවය සම්බන්ධ අවුල විසඳාගත යුතුය. ලංකාවේ රැඳී සිටිමින් දේශපාලනය කටයුතුවලට සම්බන්ධ වීමට ඔහුට අවශ්‍ය නම් අපරාධකරුවකු නොවන ඔහුට ඒ අවස්ථාව ලබාදීම 'යහපාලන රජයේ' වගකීමයි. මැවිසුරුවරයෙකු ලෙස සුවපහසු ජීවිතයක් ගතකිරීමට හැකිව තිබියදී ඔහුගේ තේරීම දේශපාලනය විය. එසේ හෙයින් කුමාර් ගුණරත්නම් නෙලාගත්තේ ඔවුන් විසින්ම වැපිරූ අස්වැන්න වන අතර ඔහු යලිත් බසින්නේ ඒ වගා භූමියටමය!

Thursday, December 1, 2016

හින්නා, හින්නෝ සහ දකුණේ බස ගැන හින්නිකිතර කතාවක්

පසුගිය දිනයක ෆේස්බුකියෙහි පළාත් සිවිල් යුද්ධයක් ඇතිවූ අතර ඊට මූලික වූයේ දකුණේ භාෂාවයි. රටේ මිනිසුන් සමාජ ජාල මාධ්‍ය මඟින් එක් කිරීමට ප්‍රථමව පැවති සීමිත, මුද්‍රිත හා විද්‍යුත් මාධ්‍යන්, භාෂාවේ ප්‍රාදේශීය ව්‍යවහාරයන් ගොඩනැඟීම වැලැක්වීමට සමත් වූයේ නැත. කඳුරට, නැගෙනහිර-පානම්පත්තුව, උතුරුමැද සහ විශේෂයෙන් දකුණෙහි භාෂාවන්ගේ විවිධත්වය හඳුනාගත හැකිය. මිනිසුන්ගේ නිරන්තර ගණුදෙනු සිදුකරන අගනගරය පිහිටි ප්‍රදේශයන්හි භාෂාව මිශ්‍ර සහ 'පොෂ්' ස්වභාවයක් ගනී.

දකුණේ භාෂාව ගැන කතා කිරීමේදී 'හින්නා' අමතක කල නොහැකිය. කොළඹදී 'කූඹි' ලෙස හඳුන්වන සත්වයාගේ දකුණු ලක නාමය හින්නාය. අනෙක් ප්‍රදේශවල හින්නාගේ නම ඇසීමත් හිනාවට කරුණකි. කෙසේ වුවත් හින්නා ගැන බ්ලොග්කරුගේ පියා උපහාසයෙන් පැවසුවේ මෙවැනි අදහසකි.
"කොළඹ මිනිස්සු හැම එකාටම කියන්නෙ කූඹි කියලනෙ!"
එය ඇත්තකි. ඒ ප්‍රමාණයේ සියලු සත්වයන් කොළඹදී කූඹි කැටගිරියේය. අපේ 'හින්නා', 'කූඹි' මෙන් කැටගරියක සිටින සත්වයන් කාණ්ඩයක් නොවේ. එක් සතෙකි. කුඩාකල අප කුඩාම ප්‍රමාණය හැඳීන්වීමට යොදාගෙන සිටි සත්වයා හින්නාය. කෙසේ වුවත් හින්නාටත් වඩා කුඩා සතෙකුද වේ. ඒ 'තෙල් හින්නා'ය. විශ කලාවේ ඇති චක්කරයක(දශ්ඨයකදී) හින්නා, තෙල් හින්නා ආදී සියලු සත්වයෝ ඇතුලත්ය. චක්කරය මෙසේය.

තෙල් හින්නො හත හින්නො එකයි,
හින්නො හත ඔලුබක්කො එකයි,
ඔලුබක්කො හත දිමි එකයි,
දිමි හත කඩි එකයි,
කඩි හත කුඹුක් කඩි එකයි.

මෙහි තෙල් හින්න‍ා යනු හින්නාට වඩා කුඩා සත්වයා වන අතර ඔලුබක්කා යනු හිස විශාල හින්නන් අතර ම සිටින විශේෂයකි. [ඈන්‍ට්ස් චිත්‍රපටයේ කම්කරු සහ සිකුරිටි කූඹින් මතක ඇතැයි සිතමි]. කුඹුක් කඩියා යනු කෙට්ටු ශරීරයක් සහිත තරමක් විශ කඩියාය. හින්නා මෙන් දෙතුන් ගුණයක් වේගයෙන් ගමන් කරන සත්වයා 'කොඩයා'ය. සමහර පළාත්වල 'කොඩව්' ලෙස බහු වචනයෙන් හඳුන්වන්නේ මේ සත්වයාය.
මෙවැනිම චක්කරයක් මැසි වර්ගයේ සතුන් සම්බන්ධවද තිබේ. ඒ,

මදුරු හත මැසි එකයි,
මැසි හත මීමැසි එකයි,
මීමැසි හත කලාඳුරු එකයි,
කලාඳුරු හත බඹර එකයි,
බඹර හත දෙබර එකයි,
දෙබර හත පොලොං එකයි,
පොලොං හත නයි එකයි,
නයි හත අසත්පුරුෂ එකයි. යනුවෙනි. බ්ලොග්කරුවා කුඩාකාලයේ මේ චක්කරය පියාගෙන් අසාගත් අවසානයේ නැඟූ පැනය වූයේ මේ සා විශාල විශක් සහිත අසත්පුරුෂයා යනු කවුරුන්ද කියාය. ඊට පිළිතුරු දැනගත් පසු විමසූ පැනය වූයේ අසත්පුරුෂයන් හතක විශ ඇත්තේ කාටද කියාය. ඊට පිළිතුරු ලැබුනේ පියාගෙන් නොව නැන්දම්මා සමඟ කෝපයෙන් සිටි මවගෙනි.
"අසත්පුරුෂ‍යො හතක විස තියනව බොලාගෙ ආච්චිට"

ආයෙත් හිනි කතාවට පැමිණියහොත්, 'හින්නා' සත්වයෙකු වීමට අමතරව සංකල්පීය අදහසක් ඇති වචනයකි. හරියට මහාචාර්ය නලින්ද සිල්වා මහතා 'පොල්' හැඳින්වූ ලෙසටය. සුද්දාට, පොල් ගෙඩිය කොකනට් වුවද අපට පොල් ගෙඩියට අමතරව පොල් නම් සංකල්පයක් වෙයි. හින්නාද එසේමය. හින්නා යන්නෙන් ප්‍රමාණයෙන් ඉතා කුඩා යන අදහස ලැබේ. ද්‍රව්‍යමය අර්ථයේදී 'හින්නිකිතර', 'හින්නංකිතර' යන්න දකුණේ පාවිච්චි වන වචන දෙකකි.

"හින්නෙක් විතර" යන්න 'හින්නිකිතර' හෝ 'හින්නංකිතර' ලෙස සුමට වන්නට ඉඩ තිබේ. කෙසේ වෙතත් මෙය මගේ අදහසක් විනා පර්යේශනාත්මක අදහසක් නොවේ. 'හින්නි' යන්න ප්‍රමාණ මැනීමේ කුඩාම ඒකකය ලෙස සැලකිය හැකිය. ඊට පසුව චූටි, පොඩි, ලොකු.... ලෙසට ප්‍රමාණ හැඳින්වීමේ වචන යෙදේ. 'හින්නි මහත්මයා' යනු දකුණේ ඕනෑම ගමකින් සොයාගත හැකි මහත්මයෙකි. හින්නි මහත්මයා ඇමතුම ලැබෙන්නේ පවුලේ බාල දරුවෙකුටය. කෙසේ වෙතත් පුද්ගල ආමන්ත්‍රණයේදී හින්නි මහත්මයාට වැඩිය පවුලේ බාලයා බාල මහත්මයාය. මූනට හින්නි මහත්මයා නැතිතැන අමතන්නේ හින්නා කියාය. බ්ලොග්කරුගේ ග්‍රාමයේද හින්නි මහත්වරුන් කිහිපපොලක්ම ඇති අතර එකම පවුලක සහෝදරියන් දෙදෙනෙකු කරකාර බැඳ ගමේ බින්න බැස්ස හින්නි මහත්වරුන් දෙදෙනෙකුද විය. එකම පවුලේ හින්නි මහත්වරුන් දෙදෙනෙකු සිටීම නිසා වැඩිමලාගේ මුලට ඔහුගේ ගමේ නමත් බාලයාට නිව් හින්නි මහත්තයා යනුවෙන් යෙදීමටත් ගැමියන් ක්‍රියා කලා මතකය.

Saturday, November 26, 2016

තාත්තගෙ බත් කැවිල්ල

අපේ ගෙදරට කෑමට වාඩිවෙන කෙනෙකුට අනිවාර්යෙන් විඳින්න වෙන අත්දැකීමක් තමයි තාත්ත‍ගෙ අතින් ඉස්මුරුත්තා බත් හැන්ද කන්න සිදුවීම. ඒක නොකා මාරුවෙන්න ආයෙ මොන රජාටවත් ඉඩ ලැබෙන්නෙ නෑ. මොකද්ද මේ ඉස්මුරුත්තා බත් හැන්ද?

මෙහෙමයි, ඔන්න කවුරුහරි අමුත්තෙක් ඥාතියෙක්-හිතවතෙක් ආවම තමයි ගෙදර සාලෙ මැද තියන මේසෙට බත එන්නෙ. නැත්තං ඉතිං කෙලින්ම හට්ටි මුට්ටිවලින්ම ‍පිඟානට දාගෙන කනව මිසක් අපේ කොහේද වැඩි කැටයං. දැං අමුත්ත කෑම මෙසෛට වාඩිවෙලා කෑම කනව. ටික වෙලාවකින් පිඟානෙ තියන කෑම ඉවර වෙද්දි තාත්ත කෑම බෙදන්න පටන් ගන්නව. බෙදාගත් කෑම ප්‍රමාණය කොච්චර වුනත් තවත් බත් හැන්දක් දෙකක් කන්න බැරිකමක් නෑනෙ කෙනෙකුට. හැබැයි ඊට පස්සෙ කෑම නවත්තන්න ඕනනෙ. හැබැයි තාත්තගෙන් ඉඩ ලැබෙන්නෙ නෑ. දිගටම තව කන්න කියල පෙරැත්ත කරනව.

"බත් තියනව කන්න" කියන්නෙ අන්න ඒ වෙලාවට තාත්ත පාවිච්චි කරන වාක්‍යය. මම වැඩිහිටි වෙලා යාලුවො එහෙම ගෙදර ඇවිල්ල බත් කන වෙලාවට තාත්ත ඇවිල්ල 'එපා වාහෙලාට බත් බෙදන්න යාම' මට ඇල්ලුවෙ නෑ. කිහිප වතාවක් තාත්තට ඒ ගැන ව්‍යංගයෙන් කිව්වත් තාත්තගෙ ව්‍යන්ජන බෙදීම අඩුවුනෙත් නෑ. බැරිම තැන තාත්තට පැහැදිලි කරන්න සිදුවුනා කෑම කන අමුත්තන්ට 'කරදර' කිරීම හොඳ නැති බව. ඊටත් අමතරව තාත්තගෙ කතාව මනෝ විශ්ලේශනයකින් පැහැදිලි කරන්නත් සිදුවුනා. ඒ කතන්දරය මෙහෙමයි.

තාත්තල‍ගෙ පවුලෙ දරුවන් නව දෙනෙක් ඉන්නව.(ලඟදි එක බාප්ප කෙනෙක් මියගියා) ඒ කුඩාකාලෙ මියගිය එක්කෙනෙක් හෝ දෙන්නෙකුට අමතරව. මේ නවදෙනාගෙන් කොල්ලොම හතක්. කොල්ලො හත් දෙනෙක් ඉන්න ගෙදරක කෑම කන වෙලාවට තවත් යහළුවන් කිහිප දෙනෙක් සිටීම පුදුමයක් නෙවේ. කොහොමටත් අපේ ආච්චි කෑම දීමට ප්‍රසිද්ධ කෙනෙක්. ඉතිං නොසිතූ වෙලාවක කටවල් ගනන වැඩි වෙද්දි පිඟන්වල බත් ප්‍රමාණය අඩුකරන්නම වෙනවනෙ. දරුවන්ගේ සහ මිත්‍රයන්ගේ බඩවල් පුරවපු ආච්චිලා බඩගින්නෙ ඉන්නත් ඇති සමහර වෙලාවට. ඉතිං වැඩිපුර බත් තියන වෙලාවට 'බත් තියනව කන්න' කියල ආයෙත් බත් බෙදන්න ඇති. තාත්තගෙ බත් කැවීම එන්න ඇත්තෙ ඔය විදියටයි කියල මම පැහැදිලි කලා.

ඒ කාලෙ ගම හරහා ගලන ඔයට පැනල පැය දෙකක් තුනක් නාල ගෙදර එන කොල්ලන්ට සහ හේනෙ කුඹුරෙ වැඩ කරල මහන්සි වෙලා ගෙදර එන පිරිමින්ට බත්කෑම කජු කනව වගේ වුනාට අද කාලෙ වයිට් කොලර් ජොබ් කරමින් තෙල් ආරපු බඩවල් එක්ක ගෙදරට එන පිරිමින්‍ එහෙමකට බත් ගිලින්නෙ නෑ නෙව. අනිත් අතට කෑමට එන එවුන් කලින් කියලනෙ එන්නෙත්. අනෙක බුෆේ ක්‍රමයට කෑම කන අලුත් ශිෂ්ඨත්වයේ කොයින්ද පෙරැත්ත කරල කැවීමක්!

Tuesday, November 22, 2016

දඩයෙන් ගොඩයාම

රථ වාහන වැරදි සඳහා අයකරන දඩ මුදල් නැවත සංශෝධනය කර ඇති අතර ඒ පිළිබඳව කතිකාව වැඩිවී ඇත. මෙම ගාස්තු සංශෝධනයට පෞද්ගලික බස් හිමියන්ගෙන් එල්ල වූ විරෝධතාවයද හේතුවක් වන බව පෙනෙන්නට ඇති අතර නව ගාස්තු සංශෝධනය ඔවුන්ගේ පැත්තට තරමක වාසිදායක බවක්ද පෙනෙන්නට තිබේ. මෙම සංශෝධනය අනුව වැරදි හතක් වෙනුවෙන් අයකරන දඩ මුදල් වැඩිවී ඇති අතර ඒවා බීමත්ව රිය පැදවීම, රියදුරු බලපත්‍ර නොමැතිව ධාවනය හා එවැන්නකට අනුබල දීම, අධික වේගය, වම්පසින් ඉස්සර කිරීම, අනතුරුදායක ලෙස දුම්රිය හරස් මාර්ගවලින් ධාවනය, රක්ෂණ සහතිකයක් නොමැතිව රිය පැදවිම ආදියයි. මේ සියලු වැරදි සඳහා අවම දඩ මුදල රුපියල් විසිපන් දහසකි! මේ අනුව පෙර පැවති, පෞද්ගලික වාහන පාවිච්චි කරන්නන්ට යම් සහනයක්ද බස් හිමියන්ගේ නොසතුටට හේතු වී තිබූ දඩ අයකිරීම මෙවර කනපිට පෙරලී ඇත.

දඩ මුදල් වැඩිකිරීමට හේතුව ලෙස ආණ්ඩුව දක්වා ඇති, අධික ලෙස රථවාහන අනතුරු සිදුවීම අලුත් දෙයක් නොවේ. යුද්ධය පැවති සමයේද රථවාහන අනතුරු හේතුවෙන් සිදුවන මියයාම් සංඛ්‍යාව යුද්ධයේ මරණ සංඛ්‍යාව ඉක්මවා තිබුනි. අධික දඩ සහ අධික බදු අයකිරීම අසමත් ආණ්ඩුවේ මූල්‍යෝපාය මාර්ගයයි. ඒ සඳහා වාහන පදවන්නන්ද අරක්කු සිගරට් පාව්චිචි කරන්නන්ද වන්දි ගෙවිය යුතුය. කොපමණ වතුර ගැලුවද ගෙම්බාගේ කර මට්ටම ඉක්මවිය නොහැකි යැයි කියන්නා සේ ඔවුන්ට ඒ මුදලින් සැප වාහන ගෙන්වා 'නීතියට ඉහලින් සිටිමින්', සියලු මාර්ග නීති උල්ලංඝනය කරමින්, කිසිදු දඩයකට යටත් නොවී පහසුවෙන් ගමන් කල හැකිය.

දඬුවමක් වෙනුවෙන් මුදල් අයකරන විට/ සංශෝධනය කරන විට එ් සඳහා සලකා බැලිය යුතු කාරණා රාශියකි. වරදෙහි ස්වභාවය, හානි සහ පාඩු, වරදේ ස්වභාවයට දඩ මුදල ප්‍රමාණවත්ද, දඬුවමට ලක් වන්නන්ට අදාල මුදල ගෙවිය හැකිද, දඩ ගෙවීමට නොහැකි වූ විට කලයුත්ත කුමක්ද, සමාන්තර අනෙක් දඬුවම් සමඟ දඩ මුදල් ගැලපේද.... ආදී කරුණු සලකා බැලිය යුතුය. එමෙන්ම දඩ මුදල් සංශෝධනය විය යුත්තේ පවතින සමාජ ආර්ථික තත්වයන්ට අනුරූප ලෙසය. උදාහරණයක් ලෙස දඩ මුදල් නොගෙවීම හේතුවෙන් බන්ධනාගාරගත වූ පිරිසක් මේ වනවිට සිටී. ගාස්තුව වැඩිකිරීම හේතුවෙන් බන්ධනාගාරගතවන පිරිස වැඩි වුවහොත් එය අලුත් ප්‍රශ්න ඇතිවීමට හේතුවකි. චේතනාන්විතව සිදුකරන අපරාධ ලෙස සැලකිය හැකි වැරදි සඳහා අයකරන දඩ මුදලට වඩා වැඩි මුදලක් චේතනාන්විත නොවන රථවාහන වැරදි සඳහා ගෙවීමට සිදුවුව හොත් එය විකෘති තත්වයකි. එහෙයින් පොදුවේ, වැරදි සඳහා දඩ මුදල් සංශෝධනය කල යුත්තේ සියලු ක්‍ෂේත්‍රවලට අදාලවය.

අයවැයෙන් පසුව වැඩිකල දඩ මුදල් සඳහා මා විරුද්ධය. රථවාහන වැරදි සහ ඒ හේතුවෙන් සිදුවන මියයාම් සහ අනෙකුත් අලාභ වැඩිවුවද ඊට හේතුවන කාරණාවලට දඩ මුදල් වැඩිකිරීමෙන් සාර්ථක විසඳුම් ලැබෙන බව පෙනෙන්නට නැත. අනතුරුවලට හේතුව ලෙස බොහෝ දෙනා ඇඟිලි දිගු කරන්නේ පෞද්ගලික බස් රියදුරන්, ත්‍රී රෝද රථ රියදුරන් හා යතුරුපැදි කරුවන්ටය. වම් පැත්තෙන් ඉස්සර කිරීම, පාර පුරා ධාවනය, අනෙකුත් වාහන කෙරෙහි දක්වන අඩු සැලකිල්ල (විශේෂයෙන් පෞද්ගලික බස්) ආදී වැරදි ඔවුන් අතින් සිදුවන බවද අමුතුවෙන් පැහැදිලි කලයුතු නැත. එහෙත් "හේතු ප්‍රත්‍යන්" ඇත්තේ දෘශ්‍යමාන තලයෙන් ගැඹුරෙහිය.

පසුගිය කාලයේ සිදුවූ මාර්ග සංවර්ධනයේදී මූලික අවධානය යොමුවූයේ කාපට් කිරීම කෙරෙහිය. නගරබද ප්‍රදේශ හැරුනු විට මාර්ගයේ පුළුල් කිරීමක් සිදුවූයේ නැත. අනෙක් අතට වාහන මිලදී ගැනීම අධික ලෙස සිදුවීම හේතුවෙන් මාර්ගයට පැමිණි වාහන සංඛ්‍යාව ඉහල ගිය විට රථවාහන තදබදය ඇතිවීම සාමාන්‍ය තත්වයකි. වාහන තදබදය ඇතිවිට මාර්ග නීති උල්ලංඝනය කිරීම් සහ රථවාහන අනතුරු සිදුවීම අමුතු තත්වයක් නොවේ. දැනට මහාමාර්ගවල ඇති තත්වය අනුව මාර්ග නීති රකිමින් රිය පැදවීම පහසු කටයුත්තක් නොවේ. උදාහරණයක් ලෙස මාර්ග නීති උල්ලංඝනය කරමින් වුවද කොළඹ සිට තංගල්ලට බසයක පැමිණීමට ගතවන කාලය පැය පහක් හෝ හයක් පමණ වේ. 'අකුරට' පැදවූ විට මෙම කාලය පැය හතක් අටක් දක්වා දිගු විය හැකිය. දඩ මුදල් වැඩිකර ප්‍රශ්න විසඳීමට කල්පනා කරන්නෝ මේවා ගැන කුමක් කියයිද?

මාර්ග නීති කඩවීමට ඇති ප්‍රමුඛ විසඳුම වන්නේ දඩගැසීම නොව වාහන ධාවනයට සුදුසු වටපිටාවක් ඇතිකිරීමයි. පළමුව, වාහන ධාවනය සඳහා සුදුසු මාර්ග පද්ධතියක් රටට අවශ්‍යය. ප්‍රධාන මාවත් මංතීරු හතරකින් වත් යුක්ත වියයුතුය. උදාහරණයක් ලෙස මාතර තිස්ස මාර්ගය ලංකාවේ ඇති ප්‍රධාන මාර්ගයකි. එහෙත් එය මංතීරු දෙකක මාර්ගයකි. සමහර තැනකදී බස්රථ දෙකක් එකිනෙක පසු කර යන විට මැස්සෙකුටවත් ඉඩක් නැත. යතුරුපැදිකරුවන්ට කාර් දෙන්නට පොරොන්දු වී බලයට පත්වූ රජය පාරේ අනතුරුවලට විසඳුම් සොයන්නේ වාහන මිල වැඩිකරමිනි. පෞද්ගලික මෝටර් රථ වැඩිවීමට මූලික හේතුව වන්නේ රටේ පොදු ප්‍රවාහන පද්ධතියේ ඇති දුර්වලතාවයයි. ටයිකෝට් ඇඳගත් ජනතාව පෞද්ගලික බස්රථවල ගමන් කරන්නේ සංවර්ධිත රටවල පමණි. පෞද්ගලික අංශයට මගී ප්‍රවාහනයට අවසර දුන් දා පටන් මේ දක්වා එම ක්‍ෂේත්‍රයේ ලබා ඇති දියුණුව වන්නේ පැරණි බස්රථ වෙනුවට අලුත් බස්රථ පැමිණීමත් රෙඩියෝ-කැසට් වෙනුවට එල්ඊඩී ප්ලේයර් පැමිණීමත් පමණි. අඩු තරමින් අගනගරයේ කාර්යාල සේවය වෙනුවෙන් හෝ මගී බස් සේවාවක් නැත. මගී ප්‍රවාහනයේ ප්‍රධාන අංගයක් වන දුම්රිය සේවය සැලකූ විට, සුද්දා ප්‍රයෝජනයට ගෙන අතහැර ගිය දුම්රිය මාර්ග වල දිග අඟලකින් හෝ වැඩිකිරීමට අවුරුදු හැට අටක් රට පාලනය කල පාලකයන් සමත් වී නැත.
පන්සීයට දාහට තිබූ දඩය විසිපන්දාහ වන්නේ එහෙව් රටකය!

Friday, November 18, 2016

බුදු ආතල්

සමන්තභද්‍ර බුදුවෙලාද......???

ගරු කත‍ානායකතුමනි, දැං බලන්න අර සමන්තභද්‍ර හාමුදුරුවො බුදුවෙලාලු. ඒ මදිවට පිලිමයකුත් හදලලු. බුදුවුනා නං යමාමහ පෙලහර පාල මේ සභාව දැනුවත් කරන්න ඕන. එහෙම නැත්තං මේක කුමන්ත්‍රණයක්.
-විමල් වීරවංශ

සමන්තභද්‍ර බුදුහාමුදුරුවන් ලඟ තියන වස්තුව දිහා බැලුවම කියන්න පුළුවන් එක පාරමිතාවකට මිලියනයක් දෙකක් වෙන්න සල්ලි තියන බව.
-දයාසිරි ජයසේකර

අපේ ඊලඟ ප්‍රතිපත්ති ප්‍රකාශයේ පිටපතක් උන්වහන්සේටත් යවන්න ඕන.
-අනුර කුමාර දිසානායක.

ඕන ගොනෙකුට පුළුවන් බුදුවෙන්න.
-ලක්‍ෂ්මන් කිරිඇල්ල

මාත් යන්න ඕන වැඳල එන්න... පහුගිය කාලෙ වැන්ද එවුන්ගෙ හැටියට සමන්තයට වැන්ද කියල අවුලක් ඇත්තෙම නෑ.
-අකිල විරාජ්

මේගොල්ල කොහේ බුදුවෙන්නද හාමුදුරුවනේ, අපේ තාත්තටත් බැරිවුන එකේ
-නාමල්

අපි දැං අපේ අමාත්‍යාංශය යටතේ බුදු මීටරයක් හදාගෙන යනව. මේක මහා නායක ස්වාමීන්වහන්සේලාටත් පෙන්නල උන්වහන්සේලාගෙ අනුමැතියත් ඇතිව පාර්ලිමේන්තුවට ඉදිරිපත් කරනව. ඊට පස්සෙ කාටවත් බෑ බොරුවට බුදුවෙන්න.
-විජේදාස රාජපක්ෂ

මගේ පියා වන ශ්‍රීමත් රණසිංහ ප්‍රේමදාස මැතිතුමාගේ සංකල්පයක් අනුව සැමට රැකියා ලබාදීමේ වැඩසටහන යටතේ උන්වහන්සේටත් රැකියාවක් ලබාදෙන්න සජිත් ප්‍රේමදාස වන මම කටයුතු කරන බව කියන්න කැමතියි මිත්‍රවරුනි. ලේකම් මහත්තයා, ‍උන්වහන්සෙගෙ උස මැනගෙන එන්න.
-සජිත් ප්‍රේමදාස.

අපි බලනව උන්වහන්සෙ ඇත්තටම බුදුවෙලාද කියල. හැබැයි බොරු කරල තිබුනොත් නං සිවුර ගලවල හෙලුවෙං පාරෙ දනගාවනව.
-එස්බී

යහපාලනය කියන්නෙ ඒකයි. ඕන කෙනෙකුට බුදුවෙන්න පුළුවන්. පහුගිය කාලෙ එහෙම තත්වයක් තිබුනෙ නෑනෙ.
-මහින්ද අමරවීර

බුදුවෙන්න අමාරු නං සෝවාන් වෙනවකෝ.
-ජෝන් අමරතුංග

ඔව්. අපි සලකා බලමින් යනව බුදුවෙච්ච අයගෙන් සීයට දහයක බද්දක් අයකරන්න. ඒ පිළිබඳව යෝජනාව ලඟදිම පාර්ලිමේන්තුවට ගේනව.
-රවී කරුණානායක

යහපාලනය යටතේ බුදුවරුන් දසලක්ෂයක් බිහිකරන්න අපි බලාපොරොත්තු වෙනව. සමන්ත හාමුදුරුවො කියන්නෙ එක්කෙනෙක් විතරයි
-රනිල්

දැං බලන්න අර සමන්ත බුදුහාමුදුරුවන්ටත් ඉන්න දෙන්නෙ නෑනෙ. ලඟදි එයත් එෆ්සීඅයිඩී ගෙනියයි. ලෑස්ති වෙලා ඉන්න... මගේ කාලෙ ඔහොම වු‍නේ නෑ.
-මහින්ද

බුදුවෙලාලු නේ? මාත් දැක්කෙ පත්තරෙං හිටං
-මෛත්‍රී

ඉඳල ඉඳල මාත් මොකක් හරි ඇඩ්එකක් දැම්ම ගමං මුං රිලව් වගේ උඩපනිනව. අනේ තොපි වගේ මැටි රැළක්.
-සමන්තභද්‍ර

Friday, November 11, 2016

අයවැයට අමුඩ ගහන්නේ මෙහෙමයි!

අයවැයත් ආව. අයවැයෙන් ලැබුන සහන සහ අසහන කලමනාකරණය කරගැනීම මේ අවස්ථාවේ සෑහෙන්න වැදගත් කියල හිතෙනව. ඒ සඳහා මේ වගේ යෝජනා ටිකක් කරන්න කැමතියි.

ගමනාගමනය
අද කාලෙ හුඟ දෙනෙකුට‍ වාහන තියනව. අඩු ගානෙ බයික් එකක්වත් තියනව. අවම දඩය රුපියල් දෙදාස් පන්සීයට ඉස්සුව නිසා-ඇත්තටම තැපැල් කන්තෝරුවට ගන්න සීයට දහයත් එක්ක මේ ගාන දෙදාස් හත්සිය පනහක්-බොහොම ප්‍රවෙශමෙන් පාරෙ යන්න ඕන. කොටිම්ම ජීවිතේ බේරගන්නවට වැඩිය වැදගත් සුදු ඉර-ඩබල් ඉර-කහඉර බේරාගෙන පාරෙ යාම. වැරදිලා හරි දඩේකට අහුවුනොත් යාප්පුවෙන් බේරාගැනීම, දඩයක් වෙනුවට සන්තෝසමක් දීල ට්‍රැෆික් රාලහාමි සන්තෝස කිරීම වගේ දෙයක් කරන්න පුළුවන්. ගානෙ හැටියට අරක්කු බෝතලයක් දුන්නත් පාඩු නෑ. ඊට අමතරව කඩ්ඩ ටිකක් ඉගනගැනීමෙන් පුළුවන්, එංගලන්තෙ ඉඳල ලඟදි ආපු කෙනෙක් විදියට ඇක්ට් කරල ට්‍රැෆික් මහත්වරු බයකරගන්න.
අධිවේගී මාර්ගයේ ඕෆ්පීක් ටයිම් ගාස්තු අඩුවීමෙන් ප්‍රයෝජන ගන්න රෑ නවය-උදේ පහ අතර කාලයේ ගමන් ගියාම හරි.

අධ්‍යපනය සහ ණය
ඒ ලෙවෙල්වලින් කැම්පස් යන්න බැරි අයට ලක්ෂ අටක ලෝන් එකක් දෙන එක මේ අවස්තාවෙ හැටියට සෑහෙන්න වටිනව. ලක්ස අටක් කියන්නෙ කජු ඇටද කොස් ඇටද නේද? මේක ගන්න නං ඉසෙඩ් ඉස්කෝර් එක ටිකක් වැඩිපුර තියෙන්න විභාගෙ ෆේල්වෙන්න වෙනව. කැම්පස් ගියා කියලත් වගතුවක් නැති එකේ ගෙවල්වල ඉන්න ළමයි, විභාග පේල් කරගන්න දිරිගැන්වීම හොඳ දෙයක්.
ප්‍රාදේශීය මාධ්‍යවේදීන්ට දෙන ණය මුදල ලබාගැනීමට මොකක්හරි පත්තර කඩමාල්ලක හරි රේඩියෝ චැනල් එකක හරි මාධ්‍යවේදියෙක් වුනා නං හරි.

ඉන්ටනෙට්
අන්තර්ජාල සම්බන්ධතා ගාස්තු වැඩිකිරීම නිසා ඉන්ටනෙට් යන්න බැරිවීමේ පාඩුව පියවගන්න ෆ්‍රී වයිෆයි කලාපෙකට සෙට්වුනා නං හරි. මෙගාබයිට්ම සීයක් කියන්නෙ කොච්චරද නේ? ඊට අමතරව අන්තර්ජාලයෙන් සල්ලිකාර නෝනලා මහත්වරු ටිකක් සෙට්කරගන්න පුළුවන් නං අපේ කොල්ලන්ට කෙල්ලන්ටත් ඩේටා ප්‍රශ්නය ලොකු අවුලක් නැතිවෙයි නේද?

ටැබ්
අන්තර්ජාල ගාස්තු වැඩිවුනාට පාසල් සිසුන්ට, ගුරුවරුන්ට ටැබ් දෙන්න ආණ්ඩුව තීරණය කරල තියනව. හොයල බැලුවම අලුතෙන් දෙන්න යන ටැබ්වල තියන තාක්ෂණය නිසා සමාගම්වලට බදු ගෙවන්න ඕන නෑ. සිම්එකක් නැතුව කෙලිංම ඉන්ටනෙට් යන්න පුළුවන්. ෆුල් ටච් ස්ක්‍රීන්. මෙන්න බලන්න බොරු නං....


විශ්‍රාමිකයන්
විශ්‍රාමිකයන්ට දෙන අග්‍රහාර රක්ෂණය ජීවිත කාලෙටම දෙන්න තීරණය කරල තියනව.(දැනට දෙන්නෙ හැත්තෑව වෙනකල් විතරයි) ඉතිං ඒක ගන්න අවුරුදු හැත්තෑවෙන් පස්සෙත් මැරෙන්නෙ නැතුව ඉන්න හිතාගත්තම හරි.

කුස්සිය සහ කෑම
මේකනෙ වැදගත්ම දේ. අඩුවෙච්ච දේවල් තමයි පරිප්පු, මුංඇට, සීනි, හාල්මැස්සො, ගෑස්, ලාම්පු තෙල් වගේ දේවල්. ඉතිං උදේ ආහාරය සඳහා මුං ඇටත්, දවල්ට පරිප්පු සහ හාල්මැස්සොත්, රෑට අලත් යොදාගැනීමෙන් සෑහෙන ඉතිරියක් කරගන්න පුළුවන්. තෙම්පරාදු කිරීමේ කටයුතුවලට පොල්තෙල්/එලවලුතෙල් වෙනු‍වට ලාම්පු තෙල් යොදාගැනීමත් මුදල් ඉතිරිකරගන්න හොඳ උපක්‍රමයතක්.

බැරිම තැන
ඔය කියපු එකකින්වත් පොකැට්ටුවෙ බර වැඩිවෙන්නෙ නැත්තා කරන්න තියෙන්නෙ මෙච්චරයි.
ටොයියන්ට : අනේ ඉතිං අපිම පත්කරපු ආණ්ඩුවනෙ. ඒ කරුමෙ ගෙවලම ඉවර කරන්න එපැයි
බයියනිට : අපි කිව්ව නේද ඕක වෙයි කියල ඇද්ද ඇද්ද ඇද්ද.......

මෙවර අයවැය ජනතා ආදර්ශ පාඨය : ළූණු බිකත් බඩට!

Wednesday, November 9, 2016

සුභපැතුම් තුරුම්පුවා!


ඩොනල්ඩ් ට්‍රම්ප් ජයගෙන ඇත. ඒ ඇමෙරිකානු ජනාධිපතිවරණ ඉතිහාසයේ තවත් එක් තියුණු සටනකින් අනතුරුවය. මේ මා දුටු නිරීක්ෂණ කිහිපයකි.

☞ අනාවැකි සියල්ලම පාහේ බොරු වී ඇත.
☞ දරදඬු හා විසුළු හැසිරීමක් පෙන්නුම් කල ට්‍රම්ප්ගේ ස්වභාවය ඇමෙරිකානුවන් සීරියස් ගත් බවක් නොපෙනේ.
☞ ජනාධිපතිවරණ සටන වෙනදාට සාපේක්ෂව මඩගැසීම්වලින් බහුල විය.
☞ මුස්ලිම් අන්තවාදය, සරණාගත ප්‍රශ්න වැනි කාරණා පිළිබඳව ඇමෙරිකානුවන්ගේ ආකල්පය, යුරෝපා සංගමයෙන් තම රට ඉවත් කරගැනීමට ඡන්දය පාවිච්චි කල බ්‍රිතාන්‍ය වැසියන්ට සමාන යැයි කිව හැකිය.
☞ ලංකාවේ විචාරක ඔස්තාර්ලා කුමක් කීවද ඇමෙරිකාවේ ආණ්ඩුව/ජනාධිපති කවුරුන් වුවද රාජ්‍ය ප්‍රතිපත්තිවල මහලොකු වෙනසක් සිදු නොවන බව කිවයුතුය.

Friday, October 28, 2016

Ladies & Gentlemen, Welcome to Earth - 002 [සයිබර් වරිගෙ උණ්ඩියා]

කාලෙකින් කියවන්න ලැබෙන මසුරං ලියමනක්. රචකයා, අපි කවුරුත් දන්න සයිබර් වරිගෙ උණ්ඩියා. එක පාරක් කිව්වට තේරෙන්නෙ නැත්තං දෙපාරක් කියවල බලන්න.

කවීෂාගේ මරණය ගැන අපේ උගන්ඩලා කියන කථා බලලා මට දැඩි කළකිරීමක් ඇතිවුණා කියහංකො.....ඇතිවෙලා "ජාති ජාතිත් මට තොපිත් එපා - මේ රටත් එපා" කියල හිතාගෙන මම ගියා ජාත්‍යන්තරය පැත්තෙ, එහේ ඉන්න නල්ලම් ඩීසන්ට් සුදු නෝනලා, මාත්තේලා තැන් තැන් වල දාන කමෙන්ට්ස් බලලා හිත හදාගෙන නේවසඤ්ඤානාසඤ්ඤායතනයට පත්වෙන්ඩ.....
අම්මට හුඩු....ජාත්‍යන්තරේ පත්තුවෙලා.....බැලින්නම් කිම් කාඩේෂියන්ව ( අර පුකෙන් ගොඩ යන පවුලෙ ප්‍රවීණතම ගුද මාර්ගයේ හිමිකාරි... ) මංකොල්ල කාලා....ඉතින් UK ඩේලි මේල්, සන්, ටයිම්ස්, French Newspapers, U.S. Tabloids අනන් මනන් වෙබ් වල නිව්ස් එක ඕකාසෙට යනවා.....අපි වගේ තර්ඩ් වර්ල්ඩ්, තර්ඩ් ක්ලාස් අසිස්ඨ, වනචර, නිර්ධය, හකිස්කුඨ සමාජ වල වගේ නෙමෙයි, ඒවයේ ඉන්න සුදු නෝනලා, මාත්තුරු මානුසිකත්වය අඟලට නූළට මැනලා පට්ට මානවවාදී කමෙන්ට්ස් දානව ඇති කියල හිතන් ත්‍රෙඩ් එකකට දෙකකට හොම්බ දැම්මා....

හම්මට......අපේ උන් ලොවෙත් හොඳයි ඕයි උන් කියල තියෙන කථා බලනකොට.....සීන් එක වෙන වෙලාවෙ කිම් කාඩේෂියන් ඉඳල තියෙන්නෙ අර "බාත් රෝබ්" එකද මොකක්ද කියලා සුද්දියො හෙලුවට උඩින් දාගන්න වූල් කෝට් එකක් තියෙන්නෙ....අන්න ඒක විතරක් ඇඳගෙනලු....මාත් දන්නෑ, මටත් කිව්වෙ සුදු මහත්තයෙක්....එයා එතන හිටිය නම් ඒක ගලවලා කිම්ගෙ අතපය බඳිනවලු ( ඌත් මං වගේ "බැඳුම්කර" පංකාවක් ( Bondage Fan) ) ....තව එකෙක් කියනවා හොරු මහ ගොන් හරක් මෝඩ මූසළයො ටිකක්ලු....කිම් වගේ සැප බොඩියක් කාමෙරේදි අල්ල ගත්තු වෙලේ මුද්ද විතරක් ගලවන්, වෙන මොකුත් නොකර ගිය එකට උන්ට වෙනම දඬුවම් කරන්ඩ ඕනලු....තව එකෙක් කිම්ව බැඳල දාලා, කටේ ටේප් ගහල හිටියය කියන නිව්ස් එකේ, එහෙම ඉන්න වෙලාවෙ ගත්තු ෆොටෝ එකක් නැද්ද කියලා ලින්ක් එකක් ඉල්ලනවා....සාතිශය බහුතරය "හොරු ටික ඕකිව මරලා දාලා ලෝකෙට සෙතක් කරේ නැත්තෙ ඇයි? " කියලා අහනවා....

"හොරුන්ට සම්මාන දෙන්න ඕනලු....නයිට් පදවි දෙන්න ඕනලු....අදහන්න ඕනලු.....ඕකිගෙ රෙද්ද ගලවලා ෆොටෝස් ටිකක් ගහගෙන ආවෙ නැති එකට දඬුවම් දෙන්න ඕනලු......පැරිස් හීතලේ පාර අයිනේ කණුවක බැඳලා තියලා ගියේ නැති එකට දඬුවම් දෙන්න ඕනලු.....මම ගියා නම් මුදු මාළ හොරකම් කර කර ඉන්නෙ නෑලු....." .... ඔය විදියට සුදු මාත්තුරු අටෝරාසියක් තමන්ගේ වටිනා අදහස් ප්‍රකාශ කරනවා.....ඇරියස් තැපැල් කෝච්චියයි.....

සුදු නෝනලා ටික....හම්මට....උන් ඊටත් එහා ඕයි....." කිම් ෂුවර් එකටම වටිනාකමක් නැති මුද්දක් නැති කරගෙන, ඉන්ෂුවරන්ස් එකෙන් ඩොලර් මිලියන ගාණක වන්දියක් ගන්න දීපු ගේමක්ලු ඕක....වෙන වචන වලින් කිව්වොත් තමුන්ටම දීගත්තු රොබරියක්ලු.....ඒකි හම්බු කරපු සේරම හොරකම් කරලා මිනිස්සුන්ට බෙදන්න ඕනලු.....හොරුන්ට තිබ්බෙ පිහියක් අරගෙන ඒකිගෙ අහවල් තැන් ලොකු කරන්න බස්සපු සිලිකන් ජෙල් බෑග් හාරලා එළියට අරගෙන ලෝකයාට ඒකිගෙ ඇත්ත හෙළිදරව් කරන්නලු......හොරුන්ට තිබ්බේ ඒකිව කැමරාවක් ඉස්සරහා දණ ගස්සලා ලෝකයෙන් සමාව අයැදවලා ඊට පස්සෙ අයි.එස්.අයි.එස් පාරක් දාන්නලු.......ඒක ලෝකෙට සෙතක්ලු.....ඒකි නැති ලෝකය හොඳ තැනක් වෙයිලු.....ඒකිගෙ මේකප් සහ සායම් පිහදාලා, සිලිකන් වැඩ දාපුවා ගලවලා, පෙන්නන්න ඕනලු ලෝකෙට වමනෙ යන්න......මේක ප්‍රසිද්ධිය ගන්න තමුන් තමුන්ට දීගත්තු රොබරියක්ලු.....

ඔය ටික කියවලා මම ආයෙ මව්-රට ආවා පිංවතුනි.....දැන් වනගත වෙන්න යනවා.....( කෑමට ගෙදර එනවා ) ....
සාතිශය බහුතරය කිම් කාඩේෂියන්ව, එයාගේ නංගිලා, අක්කලා, අම්මලා, හත්මුතු පරම්පරාවකම ගෑණු ඉතාම දරුණු ලෙස අපහාසයට සහ වාචික හිංසනයට ලක් කරලා තිබුණා.....අතරින් පතර මෙහේ වගෙම දායක සභාවක එකෙක් දෙන්නෙක් මානුසිකත්වය වෙනුවෙන් වර්ඩ් එකක් දාල තිබ්බට, අපහාස මල්ටි බැරල් තිබ්බෙ.......කොටිම්ම කිව්වොත් කිම්ගෙ නංගිට වයස 16 ද කොහෙද වෙනකල් පීරියඩ් හැදුනෙ නෑ කියන එකත් කවුරු හරි ශ්‍රේෂ්ඨ ගවේෂකයෙක් හොයාගෙන තිබුණා......

දැන් මේ මොකද වෙන්නෙ?.....මේක තේරුම් ගන්න උත්සාහ කරන්න.....කවීෂාට මැරිලවත් නිදහසක් නැති වෙන තරමට වාචිකව දූෂණය වෙන්නෙ ඇ‍යි.....?......ෂනුද්‍රිට ඉලක්කම් පෙළක් වැරදිච්ච එකට මුළු ජාතියක් අතින් දූෂණය වෙන්න උනේ ඇයි....?.....ඇයි මෙච්චර ඇරියස්......?.....මුන්ගෙ ඇම්ප්ලිෆයිඩ් වර්ෂන් එක වෙච්ච කිම් කාඩේෂියන්ව මංකොල්ලයට ලක්වෙච්ච වෙලාවෙ එකෙක් හොරුන්ට වචනයකින් වත් හානියක් නොකර වින්දිතයාව මරාගෙන කන්න ලෑස්ති උනේ ඇයි?.....

පිංවතුනි.....සයිබරය නම් වූ හෙටරොටොපික අවකාශය වෙනම ලෝකයක්......අපි මේ ජීවත් වන භෞතික යථාව තුළ පරිණාමික ක්‍රියාවළියක බොහෝ දුරක් ඇවිත් තියෙනවා......ඒ පරිණාමික ක්‍රියාවළිය සකස් වෙන ඥාණසම්බන්ධිතතාවය (Cognition) සහ අවස්ථා - අවශ්‍යතා සම්බන්ධය තුළ අපිව සෑහෙන දුරට අත්දැකීම් මගින් කෘත්‍රිම ශික්ෂණ රාමුවකට අවනත කරවා තිබෙනවා......ලෝක යුද්ධ දෙකකින් පස්සෙ අපි මානව හිමිකම් ප්‍රඥපතීන් සොයා ගත්තා......අධිරාජ්‍යයන්ගෙන් පස්සෙ ප්‍රජාතන්ත්‍රවාදය සොයාගත්තා.....කාන්තා අරගල තුළින් ස්ත්‍රීවාචිකය සොයාගත්තා.....වහල් අරගල වලින් සමානාත්මතාවය සොයාගත්තා.....අපි උථෝපියාවක හෝ මොනොතෝපියාවක සිහිනයක් දකිමින් යනවා......

හැබැයි ඒ යන ගමන යන්නේ අපේ අභ්‍යන්තරයේ ඉන්න පරපීඩක, ශෝකී, සදොස් පෝෂක, සතාව හිරගත කරගෙන.....
ෆූකෝ අපේ දර්පණ ප්‍රතිබිම්භය සමාන කරනව උථෝපියාවට....කාළ අනුකෘතියෙන් සහ පැවැත්මෙන් දුෂ්කර උථෝපියානු මිනිසා තමයි දර්පණයේ ඉන්නෙ.......සයිබරයේ තත්වයත් ඕකයි.....භෞතික හෙජමොනික යථාව තුළ ජීවත් වෙන මිනිසාට වඩා තථ්‍ය, අසම්බන්ධිත, අවසමබ්න්ධිත, බහුමාන සහිත, බහුවිධ පැවතුම් සහිත, ( Time, deviation, crisis, all 3 ) හෙජමොනියෙන් විශ්වාස ගන්වා වියුක්ත කරවන ලද ( උදා: ෆේස්බුක් අඩවිය තුළ පැවැත්ම පොලිස්කරණයෙන් බාහිර වූ, ආයතන පද්ධතියෙන් මුක්ත වූ එකක් බවට ක්‍රියාකාරීත්වය විසින් සහ සාකාළික ( ඒ කියන්නේ වත්මනේ තාක්ෂණයට අනුරූපීව ) අත්දැකීම් විසින් ඒත්තු ගන්වන ලද ), එකකට එකක් යථාව තුළ අනුරූපී නොවන, ගැළපීම් රහිත තත්වයන් එක්ව තබන, ඒ සියල්ල තුළට තමන්ගේ චරිත කොටස් අවසාදනය කරමින් ජීවත් වීමට පහසුව සළසා දෙන ( Juxtapose ) අවකාශය තමයි සයිබරය.....ෆේස්බුක් කියන්නේ මේ මොහොතේ එහි අග්‍රඵලය......දැන් අහන්න එපා එබඳු අවකාශයකට "අග්‍රඵලයක්" තියෙන්න පුළුවන්ද කියලා.....පුලුවන්....ස්කන්ධ සංස්ථියට සහ ශක්ති සංස්ථියට අනුව මැවීම කළ නොහැකි නිසා, භෞතික යථාවේම කොටසක් ( ෆූකෝ මේක ඔහුගේ හි 1,2,3,4 හෙටරොටොපික නියමයන්ගෙන් පැහැදිලි කරනවා ) මත, භෞතික යථාවේ නිර්මාපකයන් විසින් කරන ඉදි කිරීමක් නිසා මේ සයිබරයෙත් අග්‍රඵලයන් තියෙන්න පුලුවන්.....

පිංවතුනි....අපි අරගෙන ඔබාගෙන, අමාරුවෙන් හිරකරගෙන ඉන්න බිම්ගෙයි සතා, ඉතාම ප්‍රිය කරන්නේ මේ වගේ අවකාශයන්ට......අපි සුරංගනා කථා තුළින්, අපේ ෆැන්ටසි තුළින්, ජන කථා තුළින්, මැජික් වගේ ෆැන්ටසිමය අවකාශය පෝෂණය කරන සංකල්ප තුළින්, පරිකල්පනය සහ ප්‍රඥාව තුළින් සකස් කරගන්නෙ මේ වගේ අවකාශයන්......ඔන්න පිංවතුනි සිතූ පැතූ සම්පත් දෙන ගස් තියෙනවා....

එහෙම සම්පත් දෙන එළදෙන්නු ඉන්නවා ( ඔය සුරබි දෙනද මොකාද කියන්නෙ ), පාරාදීස සංකල්පයෙන් ස්වර්ගය පෝෂණය වෙනවා, කවුරු හරි හරකෙක් ආගමික උමතුවෙන් අහිංසකයො මරාගෙන මැරිලා ගියාම අල්ලාහ් කන්‍යාවියො 72 ක් දෙනවා, රට ජාතිය වෙනුවෙන් දිවි දෙන කෙනා "සුන්දර සුරඹුන්ගෙ අතේ නැළවෙනවා".....අපේ සතා ඒ භෞතික යථාවෙ අර්බුදයන් නිසා කරගන්න බැරි හැසිරීමට හරි ආසයි.....ඒකෙ මරණින් මතු හෝ ජීවත් වෙන්න පුලුවන් නම් කියලා ඇඟිලි ගණිනවා.....
එහෙම ඉන්නකොට අපිට ඇලන් ටියුරින්, වින්ට් සර්ෆ්, මාක් සකර්බර්ග් කියලා තුන් දෙනෙක් ඇවිත් අවම වශයෙන් කාළාර්ථයේ ද්විමාණික හෙටෙරොටොපික අවකාශයක් ( කාළාර්ථයේ කියන වචනය භාවිතා කලේ පරිඝණක ප්‍රොසෙසර් එක උපදෙස් පිළිපදින එක මනින්නෙත් කාළමාන චක්‍ර වලින් නිසා ) හදලා දෙනවා......අපි ඒ අවකාශයට අපේ සතාව මුදාහරිනවා....
ඒක වෙනම ලෝකයක් පිංවතුනි....ඒක තමයි අපි මෙතෙක් සොයමින් සිටි ලෝකය.....ඒකෙ දැනට අපිට ද්විමාණිකව සතාව දුවවන්න පුලුවන් හෙටෙරොටොපිකය හරහා......දැන් අපේ සතා උද්දාමයට පත්වෙලා ඉන්නෙ.....අර ජිනීවා ප්‍රඥප්තිය, වියානා ප්‍රඥප්තිය, පොලීසිය, හමුදාව, රජය, එක්සත් ජාතීන්ගේ සංවිධානය, නියුරෙම්බර්ග් නඩු තීන්දුව, ඇමරිකානු නිදහස් ප්‍රකාශනය, කොමියුනිස්ට් ප්‍රකාශය, බුදුන්, මාක්ස්, එංගල්ස්, යේසුස්, මුහම්මද්, වෝල් ස්ට්‍රීට් එක, අනගාරික ධර්මපාල, මා ඕ සේතුං, අන්තර් විශ්ව විද්‍යාලීය ශිෂ්‍ය බළ මණ්ඩලය, කොංග්‍රසය, පාර්ලිමේන්තුව, ඉඩි අමින්, රොත්ස්චයිල්ඩ් වරු, කියු ක්ලුක්ස් ක්ලෑන් එක, මාටින් ලූතර් කිං, යනාදි සියල්ලගෙන් චර්යාව තාවකාළිකව "විපාකයෙන් තොරව" නිදහස් කරගත්ත අවකාශයක අපේ සතා වේගෙන් උඩ පැන, පැන දුවනවා....

විපාකයෙන් සහ යථාවේ භෞතික විද්‍යාත්මක බාධක වලින් සතා නිදහස් වෙනවා......
දැන් නිතර නිරුවත් වෙලා අපිට ඇරියස් එකතු කරන කිම් කාඩේෂියන්ව ඇඳක බැඳලා දාලා මනෝ කායික ප්‍රචණ්ඩත්වය මුදාහරින්න, කවීෂගේ, ෂනුද්‍රිගේ අඟ පසඟ සමග ඔවුන්ව බිත්තියකට තියලා තද කරගන්න, අපේ සතාට පුළුල් බළතල තියෙනවා.....එහෙම කරලා විසි එක් අවුරුද්දකට කූඩුවක කූරු ගනින්නෙ නැතුව ධාතු පහවුනාම පිටවෙලා සැනසිල්ලෙ යන්නත් පුලුවන්.......කාඩේෂියන්ව දූෂණය කරන්න, ෂනුද්‍රිලව දූෂණය කරන්න තියෙන භෞතික, සාගර, කාළාවකාශ සහ ප්‍රාග්ධන බාධක මෙතන නැහැ........හැබැයි භාවිතා කළ හැකි උපාංග වෙනස්......
භෞතික යථාවේ:
බාහු බළය + ප්‍රාණවත් අංග ජාතය + යෝනි පුරාසනය = දූෂණය
මෙතන
බාහු බළය ( ඇයි යකෝ ටයිප් කරන්න ඕනනේ ) + මනස + කැමරා ඇසක ප්‍රතිබිම්භය + දත්ත ප්‍රවාහය + ප්‍රාණවත් අංග ජාතය = දූෂණය

ඔය පළවෙනි එකේදි දූෂණයට නඩු තියෙනවා.....නඩුවට විත්ති කූඩුවට යන පාර බොහොම කෙටියි.....දෙවනි එකේදිත් නඩු ඇති.....නමුත් විත්ති කූඩුව තමුන්ට බොහොම දුරයි කියන එක අත්දැකීම් අනුසාරයෙන් ඇතිවන අනුභූතීන් දන්නවා.....ඒ නිසා බය නැතුව පට ඇරලා දෙනවා......
මේක අලුත් ග්‍රහ ලෝකයක් මහත්වරුනි.......සූර්යයාගේ සිට කිලෝමීටර් මිලියන 149.896 ක් ඈතින් මේ මොහොතේ තිබෙන කාබනික, හයිඩ්‍රොක්සික ග්‍රහ ලෝකයෙ අපේ මිනිස් ජීවී විශේෂය පරිණාමයෙන් බොහෝ දුරක් ඇවිත් හිටියට, මේ 1 0 1 0 1 0 සොබා දහම සහිත, ඊතර්නෙට් කේබල්, ඔප්ටිකල් ෆයිබර්, උඩ පවතින අලුත් ග්‍රහ ලෝකයේ අපේ මිනිස් වර්ගයා මේ දැන් පහළ වුනා විතරයි......

දැන් මේ සයිබරය නම් ග්‍රහ ලෝකයේ මිනිස් වර්ගයා ආයෙ මුළ සිට පරිණාමික ගමනක් යනවා....තේරෙනවද සීන් එක?......ලුසීගෙන් පටන් ගෙන මේ හෝමෝ සේපියන්ස් සේපියන්ස් තෙක් ආපු ගමන එතනට වලංගුයි වගේම වලංගු නැහැ.....ඒක ආයෙ මුල ඉඳන් පටන් ගත්තු ගමනක්.....
පිංවතුනි, අපි තමයි සයිබර් ග්‍රහ ලෝකයේ හෝමෝ රුඩොල්ෆෙන්සිස්ලා, හෝමෝ ඉරෙක්ටස්ලා......අපි යථාවේ ග්‍රහ ලෝකයේ හෙවත් "පෘතුවියේ " හෝමෝ සේපියන්ස් සේපියන්ස්ලා වුනාට, සයිබරය නම් මේ අලුතින් නිමවන ලද ග්‍රහ ලෝකයේ තාම ඉන්නෙ ප්‍රාග් ඓතිහාසික තත්වයන් තුළ.....
මේ පෘතුවි ග්‍රහ ලෝකයේ නොදැමුණු අතීතය ගැන කල්පනා කරල බලන්න......දැන් අපි ඒ තත්වයන් පසුකරගෙන පාර්ශ්විකව බොහෝ දුරක් ඇවිත්...... නමුත් සයිබරයේ අපි තාම ඉන්නෙ අර දැති පොල්ලකුත් අරගෙන ගොදුරු සොයන, ස්ත්‍රියක් හමුවූ විට කොණ්ඩ වල්ලෙන් ඇදගෙන ගල් ගුහාවට ( අපේ කම්පියුටරය හෝ ස්මාට් ෆෝන් එක තමයි මේ ලෝකෙ ගල් ගුහාව ) ඇදගෙන ඇවිත් බලෙන් රමණය කරන යුගයේ......
මේ හෙටෙරොටොපිය තුළ මිනිසාගේ පරිණාමය අමුතුම එකක් වේවි......ඒක ගැන හිතනකොට බය නම් VR headset එකක් ඔලුවට දාගෙන බලන්න....බය වෙන්න එපා.....මේකෙ Cognitive Revolution එකෙත් තියෙන්නෙ එකම භෞතික යථාවේ Cognitive Revolution කරපු ස්ඵෝටකයන්ම තමයි.....මේකට වසර මිලියන ගණනක් ගත වෙන එකක් නෑ......21 වැනි සියවසේ අග පමණ වනවිට, පරමාදර්ශයන් සහ නොදැමුණු ෆැන්ටසි අතර සමතුලනයක් මිනිස්සු සොයා ගනියි.....
Ladies & Gentlemen, Welcome to Earth - 002

Thursday, October 27, 2016

අලුත් ප්‍රින්සිබල්, ගුරුහොරු දෙදෙනා සහ අපේ රසායන විද්‍යා ඉගෙනුම.

මේ සිද්ධිය මතක් වුනේ ලෝක ගුරු දිනේ දා. තමන්ට මතක්වුන හොඳ ගුරුවරු ගැන කට්ටිය බුකියෙ කයිවාරු ගහද්දි මට මතක් වුනා ගුරුහොරු කියල කියන්න පුළුවන් බුවාල දෙන්නෙක් ගැන.
ඒ අනූ හත අවුරුද්ද වෙන්න ඕන. අනූ හයේ ඕලෙවෙල් කරල ප්‍රතිපලවලින් පස්සෙ ගණිත අංශයෙන්අ උසස්පෙල කරන්න හිතාගෙන ඉස්කෝලෙට ගියා. ගණිත අංශය තෝරාගත්ත පහක් හිටිය මතක විදියට. ඊට අමතරව ඉහල පන්තියෙ දෙන්නෙකුත් කැමැත්තෙන්ම 'ෆේල් වෙලා' වගේ අපේ පන්තියටම ඇතුලත් වුනා. උන් දෙන්නත් පළමුවර විභාගය ලිවීම අතහැරල අපි එක්කම විභාගෙට යනව කියලයි තීරණය කරල තිබුනෙ. කොහොම වුනත් එයිනුත් එක්කෙනෙකුත් අපේ එකෙකුත් මාස කිහිපයකට පස්සෙ කලා හෝ වානිජ්‍ය කරන්න හිතාගෙන පසුබැහැල ගියා.

අපි ඕලෙවෙල් ප්‍රතිපලවලින් පස්සෙ ඉස්කෝලෙට යද්දි ඉස්කෝලෙ එක වෙනස්කමක් වෙලා තිබුන. ඒ අලුතෙන් ආපු ප්‍රින්සිබල් නිසා. නඩු අහන්න කලින් වේවැල් පාර දීල පස්සෙ නඩුව අහන ජාතියෙ බඩුවක් වෙච්ච ඔහු දැන් මගේ කාර්යාලය කිට්ටුව ඉන්නෙ. බුවා ගැන කලින් ලිව්ව කියලත් පොඩි මතකයක් තියනව.

ඔන්න ඉස්කෝලෙට ආපු පළමු දවසෙ තම තමන් තෝරාගත් විශයයන් අනුව පන්ති ලැබුන. අපට ලැබුනෙ විද්‍යාගාරය. ඉගැන්වීමට හිටිය ගුරුවරු මෙහෙමයි.
සාපෙල ගණිතය ඉගැන්වූ ගුරුවරයා උසස්පෙළට ශුද්ධ ගණිතය උගන්වනව.
භෞතික විද්‍යාව සහ ව්‍යවහාරික ගණිතය එක ගුරුවරයෙක් ඉගැන්වුවා.
ඔවුන් දෙදෙනා තමන්ගේ කාර්ය නිසි පරිදි කල බව සතුටෙන් මතක් කරන්න කැමතියි. ටියුෂන් යද්දි, දිස්ත්‍රික්කෙ ජනප්‍රිය පාසල්වල ළමුන්ට වැඩිය අපි යමක් කමක් ඉගනගෙන තිබුන.
අවුල හැදුනෙ රසායන විද්‍යාව සම්බන්ධව. ප්‍රින්සිබල්තුමා වේලපහින්ම අපට කිව්ව "ඔයාල කැමති ගුරුවරු ඉන්නව නං කියන්න, මම එයාල උගන්නන්න දාන්නං" කියල. ඉතිං අපි මොකද කලේ අපේ ඉස්කෝලෙ හිටිය, එවකට ජනප්‍රියම රසායන විද්‍යාව ටියුෂන් ගුරුවරය, අපට දෙන්න කියල ප්‍රින්සිබල්ට කිව්ව. හැබැයි මේ කියන ගුරුවරයාගෙන් මෙතෙක් වැඩක් ගත්ත බවක් පේන්න තිබුනෙ නෑ. රසායන විද්‍යාව ඉගැන්නුවෙත් වෙනත් ගුරුවරයෙක්.

ඔන්න වැඩේ පත්තුවුනා. ප්‍රින්සිබල් කිව්ව ටියුෂන් ගුරාට අපට උගන්වන්න කියල. බුවා වැඩේට අදිමදි කලා, හේතුව ටියුෂන්වලට බාධාවීම වෙන්නත් පුළුවන්, අනිත් ගුරාගෙ විෂය බලෙන් ගත්ත වගේ සීන් එකක් වෙයි කියල හිතල වෙන්නත් පුළුවන්. කොහොම නමුත් ඔහු වැඩේට කැමති වුනේ නෑ. අපි අලුත් ගුරෙක් ඉල්ලුව කියල පරණ බුවාත් අපට ඉගැන්වීම ප්‍රතික්ෂේප කලා. දැං අල්ලපු අත්තත් පය ගහපු අත්තත් දෙකම නෑ. ඒ මදිවට ප්‍රින්සිබලුත් නිහඬයි. අන්තිමට පන්තිය භාරව හිටිය ඉස්කෝලෙහාමිනේ වැඩේ භාරගත්ත. හැබැයි ඩිස්ක්ලේමරයකුත් එක්ක.
"මම දන්නෙ ඕගනික් විතරයි, ඕගනික් කියන්නෙ සිලබස් එකෙන් බාගයක්නෙ.... ඔයාල ඉස්කෝලෙ එන්නෙ මුල් අවුරුද්ද විතරයිනෙ කොහොමත්.... ඉතිං ඒ ටිකේ ඕගනික් නං කරන්න පුළුවන් ඔයාල කැමති නං?"
'නිකං ඉන්න මට ඇරල ගියත් මදැයි' තත්වෙං හිටි අපට ඒ යෝජනාවට පයින් ගහන්න උවමනාවක් තිබුනෙ නෑ.

Wednesday, October 19, 2016

කංකරු-සිකුරිටි කතා

සජිත් ලොක්කගෙ කම්කරු සිකුරිටි කතන්දරය නැගලම යනවනේ. ඕක ඔහොම ගිහිල්ල මේ වගේ පැතිවලටත් යන්න පුළුවන්.

යාලුවගෙ පුතා
"හා..... මේ ඉන්නෙ ඔයාගෙ පුතා නේද? බලන්න මම ගියපාර දකිද්දි කම්කරු, දැං සිකුරිටි සයිස් නේ...."

පොරොන්දම
"නෝනා මේ කසාදෙ නං කරල වැඩක් නෑ! මේ දෙන්නගෙ "සජිත් පොරොන්දම" ගැලපෙන්නෑනෙ..... ඒක ‍ගැලපෙන්නැතුව කසාද බැඳල වැඩක් තියනවයැ! පිරිමි ලමය කංකරු, ගෑනු ලමය සිකුරිටි! විවාහ වුනොත් පවුල කැඩෙනව දෙකක් නෑ"

සුදුසුකම
"ශ්‍රී ලංකා පොලිසියේ පොලිස් කොස්තාපල් තනතුර සඳහා ඉල්ලුම්පත් කැඳවනු ලැබේ. පපුව අඟල් තිස් දෙකක් හා උස සිකුරිටි මට්ටම ඉක්මවා තිබිය යුතුය"

මාපියන්ගෙ සතුට
"කම්කරු දුවෙකුයි සිකුරිටි පුතෙකුයි ඉන්නව නං මදෑ!"

"සයිස් එක"(ඔව්වොව් ඒක තමයි)
"නංගී..... කම්කරු වුනාට අපිත් සිකුරිටි කොල්ලො තමයි හරිය...."

"කම්කරු මොඩල් ලඟ පිකප්"

"අද මං ඔබට කියල දෙන්නෙ කම්කරු සයිස් එක සිකුරිටි සයිස් කරගන්න පුළුවන් ෆෙංශුයි කෙමක්. ඇත්තටම මේක චීනෙ ගොඩක් ජනප්‍රිය ක්‍රමයක්. චීනෙ ජනගහනය ඔච්චර වැඩිවෙලා තියෙන්නෙත් මේ නිසා..... හරි මේකයි ඔබට කරන්න තියෙන්නෙ..... ගන්න හොඳ දිග ආනමාලු ගෙඩියක්,.... නැත්තං ඇම්බුං ගෙඩියක් නං වඩාත් හොඳයි.... මේක අරගෙන, දිග අතට අඟලක විතර කැපුමක් දාල මම ඔබට ලබාදෙන 'ඕං ජුන්ඩං සයිසං කංකරුං සිකුරිට්ටං පුහ්' කියන මන්ත්‍රය අඩංගු තඹ පත්‍රය කෙසෙල්ගෙඩිය ඇතුලට යවල නිවසට නිරිත දිශාවෙන් වලදාන්න..... සතියක් යනවිට ඔබට සාර්තක ප්‍රතිපල ලබාගන්න පුළුවන්"

Friday, October 14, 2016

බිහයින්ඩ් ද සීන්ස් ඔෆ් දක්කාගෙන යාම්ස්......

"මම ගිහිල්ල එන්නං හාමිනේ.... කොල්ල එක්ක යන්න තිබුනනං හොඳයි ඉතිං.... ඒත් රට්ටු මොනව කියයිද දන්නෑනෙ...."

"හරි හරි ඒව මං බලාගන්නං පුළුවන් නං තව ළමයි දෙතුන්දෙනෙක් පුතා එක්ක ඉන්න කියන්නකො ඒ මදැයි.... ඒ දරුවත් දැං පොඩිඑකෙක් නෙවේනෙ පරිස්සං කරන්න"

"හරි, හාමිනේ එහෙනං දූලත් බලාගෙන ඉන්න.... මං යන්නං"

************************************************

"ම්........ සර් අනිත් කට්ටියට නං යන්න දෙන්න බෑ.... සර් විතරක් යන්න.... කමක් නෑනෙ සර්....?"

"අඩෝ උඹ දන්නැද්ද මං කවුද කියල *&^$% අම්මට %$%%^ ^$&^$& පුතාලා.... තොපිට &^$&*%*^...."

"බුදු අම්මෝ......."

ඩාං ඩෝං සලා.......ං සල සලා............ං "අම්මට %%&&*(^(&$@@&*%&$$^*(&%& *%*(^^(*^( *%&$^$%...."

************************************************

♫ ♫ ♫ ♫ ♪ ♪ ♪ ♪

"හලෝ..... මොකෑ හාමිනේ රෑ ජාමෙ කතා කරන්නෙ නින්ද යන්නැද්ද?"

"හරි වැඩක්නෙ මහත්තය වෙලා තියෙන්නෙ.... පුතා නයිට්ක්ලබ් එකකට ගහල කුඩුකරල.... අර ලමයිත් එක්ක...."

"හයියෝ...... බලන්න මම නැතිවුන ඩිංගට නරපු වැඩේ..... හාමිනේට බැරිවුනානෙ ඔය කිරිසප්පය බලාගන්න.... දැං මං කොහොමද රෙද්දක් ඇඳං රටට මූන දෙන්නෙ හිටං.... මම පොලිසියට කියනව ඔන්න රාජකාරිය හරියට කරන්න කියල ඕං....."

"නෑ නෑ දැම්ම එපා.... මහත්තය ලංකාවට එනකල් චුට්ටක් ඉන්න කියල මං කියන්නං...."

************************************************

"රාජකාරි කරන්නත් එපා නං.... මට සිද්දවෙන්නෙ මේ ජනාධිපති පට්ටම අතෑරල දාල ගමට ගිහිල්ල හේනක් කුඹුරක් කොටාගෙන ඉන්න.... නැත්තං තොරං පලවල්වල විරිදු කියන්න..."

"මං කියන්නං මොකද්ද කරන්නෙ කියල...."

"අනේ හාමිනේගෙ ප්ලෑන්.... ලමෙය බලාගන්න බැරිවුනා මං රටගිය ඩිංගට.... මොකද්ද දැං කියන්නෙ.... පොලිස්පතිට නං කතාකරන්න මට බෑ ඔන්න..."

"නෑ නෑ.... ඒක නෙවේ මම කිව්වෙ..."

"රනිල්ට කියල නඩුකාරේක් ලව්ව ඇප ගන්නද?"

"නෑ නෑ.... ඕව කරන්න ගිහිල්ල දරුව හිරේ විලංගුවෙත් වැටුනොත්"

"එහෙනං ගුටිකාපු එවුන්ට කියන්නද උංම ගහගත්ත කියල....? මට බෑ ඒකාලෙ ගොංකං කරන්න හාමිනේ...."

"නෑ නෑ.... දැං ගෝටාබය මහත්තය"

"අනේ මතක් කරන්න එපා.... සුදුවෑන් දාල මිනිස්සු උස්සන්න බෑ මේ කාලෙ හාමිනේ...."

"නෑ නෑ මනුස්සයෝ......කියන දේ අහන්නකො.... මහත්තයට කරන්න තියෙන්නෙ මෙච්චරයි.... ගෝටාබය මහත්තයයි නේවි එකේ ලොක්කොයි උසාවියට දක්කගෙන ගියේක වැරදියි කියල පොඩ්ඩක් බනින්න එච්චරයි......"

"දක්කගෙන? මොන පිස්සුද හාමිනේ... ඔය නැහැදිච්ච වචන කියන්න පුළුවන්ද මට? අනිත්තෙක ඕක කිව්ව කියල පුතාගෙ පටලැවිල්ල ගොඩදාගන්න බෑනෙ?"

"අපේ මහත්තය මං කිව්වට ඕක කියල බලන්නකො.... දක්කගෙන ගියා කියලම කියන්නෝන.... එතකොට‍ තමයි කට්ටිය අතරට ගැම්ම ඇතුව කතාව යන්නෙ..."

"ඉතිං ඊ පස්සෙ....?"

"ඊට පස්සෙ කරන්න ඕන ටික ටීවී චැනල්කාරයොයි පත්තර කාරයොයි ඉන්ටනෙට් එකේ ඉන්න කොල්ලො කෙල්ලොයි කරයි.... ඒ අතරෙ පුතාගෙ ප්‍රශ්නෙ අමතක වෙනව මහත්තයා.... මේක ලංකාවනේ...."



Tuesday, October 4, 2016

මිත්‍ර ද්‍රෝහියෝ....

අල්ලපු ගෙදර ජයසේන මාමගෙ සද්දෙ කනට එන එක නවත්තන්න හුලඟට වැනෙන තිර රෙදිකෑල්ල ප්‍රමාණවත් නෑ වගේ. යන්තමට පටන්ගත්ත සද්දෙ දැං හොඳට ඇහෙනව. ජයසේන මාමාගෙ දෙබස් අවසන් වෙනකොටම තවත් කටහඬක් ඇහෙනව. කෝකටත් කියල එකෙක් දෙන්නෙක් මැරෙන්න කලිං මාත් ගියා ඒ පැත්තට. රණ්ඩුව යන්නෙ ජයසේන මාමයි එයාගෙ අතිජාත මිත්‍රයෙක් වෙච්ච සමරෙ මාමයි අතරෙ. ගිහිල්ල පොඩ්ඩක් දෙන්න සමාදාන කරන්න හිතාගෙන කේස් එක අවුස්සල බැලුව.

"රාජ් පුතේ, උඹට කියන්න මම මූට කොච්චර නං උදව් කරල තියනවද.... උඹ දන්නවනෙ අපි දෙන්න හිටියෙ කොහොමද කියල.... දැං බලපං මූ කරල තියන වැඩේ...."

"ඇයි මොකද්ද සමරෙ මාමා කලේ?"

"උඹ දන්නවනෙ රාලහාමියත් එක්ක මගේ අර දංගහලඟ කුඹුරට තියන නඩුව?"

"ඔව්වොව්... මොකෝ මං නොදන්නෙ? දැං මොකද්ද නඩුවට වෙලා තියෙන්නෙ?"

"පෙරේද හැන්දෑවෙත් මගේ ගල්බෝතලේ ගහපු මූ දැං රාලයගෙ පැත්තට සාක්කි දෙන්න හදනව!"

"චී චී.... ඈ සමරෙ මාමේ ඇත්තද මේ කියන්නෙ?" ඒ ගමන සමරෙ මාමත් කතාවට සෙට්වුනා.

"මේකනෙ පුතේ.... මූ හො‍ඳේකා බව ඇත්ත! හැබැයි මට රාලහාමි අතාරින්න බෑනෙ.... බොලාට මේව තේරෙන්නෑ බං.... "

උගේ හරුපෙ තේරුනේ නැතත් උං දෙන්න මරාගන්න තරමටම අවුලක් නැති නිසා මම ආව හන්දිය පැත්තට. හන්දියෙ කඩේගාවත් හෙන කතාවක්. අතරින් පතර කුනුහබ්බත් එක දෙක ඇහෙනව. ප්ලේන්ටියක් බොන්න කියල ආපු මමත් බංකුවෙන් වාඩිවුනා. වලිය මූලික වශයෙන්ම තියෙන්නෙ කඩේ ලොකුමාමයි ධර්මෙ අයියයි අතරෙ. රුවන් මල්ලි ලඟින් වාඩිවෙලා සීන් එක මොකද්ද කියල ඇහුව.

"හේතුව නං මොකද්ද මංදා රාජ් අයියේ.... කේස් එක නං ලොකු මාම හතලිහට සිගරැට් විකුණල අහුවෙලා.... ධර්මෙ අයිය ලොකුමාමට විරුද්ධව සාක්කි දීල...."

"මොකක්?....යකෝ එහෙමත් කැතවැඩ කරනවද බං?"

"අන්න උඹට තේරුනා පුතේ.... මගෙං ණයට කාල මටම කෙලිනව!"

"උඹල මොනව කිව්වත් ඔහොම තමයි දැං වැඩ සිද්ධවෙන්නෙ.... උඹල මොනවද දන්නෙ?...."

"ඒ කියන්නෙ මුගෙං කාල මූට කෙලින එක හරි?" පැත්තක ඉඳපු මහතුං මාමත් කතාවට ආව.

"එ්ක තමයි අලුත්ම මෙව්ව එක.... ඇයි බොලව් බලපල්ල යුද්ධෙ කාලෙ පකිස්තාන්කාරයො අපට කොච්චර උදව් කලාද! උං මොනවද අපිට නොදුන්නෙ.... හැබැයි උං ඉන්දියාව එක්ක ඇරගන්නකොට අපි ඉන්නෙ ඉන්දියාව පැත්තෙ.... අනේ උඹල දන්න ඩිප්ලොමැටික්...."

Wednesday, September 21, 2016

අඬුව තියෙද්දී අත පුච්චා ගැනීම හෙවත් බයියන්ගේ දිව්‍යලෝක සංචාරය.


මධුවිතක් එහෙම අරගෙන දවල්ටත් කාල දිව්‍යාංගනාවන් හතර පස් දෙනෙක් එකතු කරගෙන පොඩි ඇලර්ට් එකක් දාන්න හැදුව විතරයි ශක්‍රය‍ට රිසෙප්ශන් එකෙන් කෝල් එකක්.

"සර්, ලංකාවෙ හාදයො කිහිප දෙනෙක් ඇවිල්ල ඉන්නව ඔබතුමා හම්බවෙන්න...." එහා පැත්තෙන් ඇහුන.

"මොකද්ද කාරණාව? ආයෙත් කලිං එක්කෙනා ඉල්ලනවද?"

"ඒ වගේ තමයි,... සර්ම කතාකරල බලන්නකො......[හරි හරි ලොක්ක අවසර දුන්න, තමුසෙල යනවකො ඇතුලට]"

"අවසර දෙන්නත් කලිං මූ එවන හැටි!" ශක්‍රයට කියවුනා.

"සෑර් අපි එන්නං ඇතුලට?" දිව්‍යාංගනාවො, එහෙමෙහෙ වෙච්ච ඇඳුං ආයිත්තං හදාගන්නත් කලිං ආපු සෙට්එක කාමරේට කඩා වැදුන.

"හරි, තමුන්ලා මොකටද ආවෙ?" ශක්‍රය කෙලිංම කාරණේට බැස්ස.

"සෑර්, අපිට ඕන ඒකාධිපතියෙක්!" ආපු එකෙක් කිව්ව.

"ඒ මොකටද?" උඹලට ඉන්න එවුන් මදිද?

"නෑ සර්, රජෙක් වගේ පාලකයෙක් අපට ඕන"

"ඒ මොකටද?"

"දැං බලන්න අපේ රටේ...., නීතිය ක්‍රියාත්මක වෙන්නෙ නෑ, රජෙක් වගේ ඒකාධිපතියෙක් හිටිය නං අපට කෙලිම්ම ගිහිල්ල පැමිණිලි කරන්න පුළුවන්නෙ"

"තව?"

"අපේ ළමේකුට රස්සාවක් ගන්න ඕනවුනා.... සාධාරණේට වැඩ සිද්ධවෙනවද? නෑනෙ!"

"ආණ්ඩුවෙ කාර්යාලෙකින් වැඩක් කරගන්න බෑ, ඒකාධිපතියෙක් තමයි අපට ඕන"

"හොරකම්, වංචා, දූෂණ සිද්ධවෙනව, රජකාලෙ නං එහෙම වුනේ නෑ"

"ඉතිං...?"

"මනුස්සයෙකුට සාධාරණය ඉෂ්ට කරගන්න පුළුවන්ද?"

"සාධාරණව ඡන්දයක් තියන්නෙ නෑ!"

"ඕව තමයි ඉතිං..... ඇයි ඔබතුමා මේ අසාධාරණ දැක දැක නිස්සද්දව ඉන්නෙ?"

"මෝඩයිනේ..... උඹල දන්නෙ නැතුවට ඒකාධිපතියෙකු ඇවිල්ල කරන්න ඕන දේවල් කරන්න දැනුත් පුළුවන්"

"ඒ කොහොමද?"

"උඹලගෙ නඩු සාධාරණව අහන්න තමයි අධිකරණ කොමිසම දුන්නෙ, සාධාරණව නීතිය ක්‍රියාත්මක කරන්න තමයි පොලිස් කොමිසමක් තියෙන්නෙ, රාජ්‍ය සේවා කොමිසම තියෙන්නෙ උඹලගෙ රාජකාරිවලට මැදිහත් වෙන්න, සාධාරණ ඡන්දයක් තියන්න තමයි මැතිවරණ කොමිෂන්එක තියෙන්නෙ, හරියට හොරු අල්ලන්න තමයි අල්ලස් දූෂණ කොමිසම තියෙන්නෙ....... මේවගේ තියන කොමිෂන් සභා ටික ශක්තිමත් කරන්න කියල උඹලගෙ පාලකයන්ට කියපල්ල.... උඹල දැං කරන්නෙ මිනිහෙක් පාරෙ කුණු දාල ගියත් ඒක නවත්තන්න ඒකාධිපතියෙක් හොයන එකනෙ...."

මිනිස්සු ටික යන්න ගියා. හැබැයි මොනව කරයිද දන්නෙ නෑ.

**********************************************************

කටු සටහන්
බලපං දැං කොළඹ හැටි? අහවල් මහත්තය ඉන්න කාලෙ පිරිසිදුවට තිබුනනෙ...
එක එකා කියන විදියට නැවෙන්නෙ නැති කෙලිං මිනිහෙක් හිටිය නං හරි...
බලපං.... අහවල් මහත්තය එක කෝල් එකයි දුන්නෙ වැඩේ කෙරුන..
වැඩේ හරිගියේ නෑ, අරුං ලොක්කට පගාව දීල, මුන්ට හෙන ගහනව....
රට හදන්න නං අහවල් මහත්තය එන්නෝන... නැත්තං මුං හදන්න බෑ...


(බයියා, පුළුල් අර්ථයෙනි. මහින්දගේ අය නොවේ)

Friday, September 9, 2016

සතුටුදායක-කණගාටුදායක නඩු තීන්දුව!

මහාධිකරණ තීන්දුවට අනුව දුමින්ද සිල්වා එල්ලන්න නියමිතය. දුමින්ද විතරක් නොවේ, ඔහු සමඟ තවත් හතරකට මරණ දඬුවම නියම කර ඇත. දුමින්ද නිසා හතර දෙනෙකු මියගිය අතර තවත් හතර දෙනෙකුට මරණය හිමිවී ඇතැයි කීම වඩාත් නිවැරදිය.

පුද්ගලයා කවුරුන් වුවද කෙනෙකු මැරීම කණගාටුදායකය. මරන්නට නියමවී ඇති අය, තවත් ඝාතන සිදුකල අයවලුන් වීමෙන් ඔවුන්ට දඬුවම් ලැබීම සතුටුදායකය. ‍තීන්දුව, බෙදුනු තීන්දුවක් ලෙස ලැබීම කණගාටුදායකය. ඒකමතික තීන්දුවක් ලැබුනේ නම් සතුටුදායකය. ත්‍රිපුද්ගල විනිසුරු මඬුල්ලේ සභාපති ගැන කියවෙන සමහර කතන්දර කණගාටුදායකය. එහෙත් බෙදුනු තීන්දුවක් දීමට තරම් ස්වාධීනත්වයක් විනිසුරු මඬුල්ලට තිබීම සතුටුදායකය.

තීන්දුව ප්‍රකාශ කල දිනයේ දුමින්දගේ නාට්‍ය පිටපත කණගාටුදායකය. මිනිසුන් මැරීමට තීන්දුව ලැබීම සතුටුදායක නොවන බවට හිරුණිකාගේ තේරුම්ගැනීම සතුටුදායකය. උසාවියෙන් පිටත අයුතු ජන රාශීන් පෙළගස්වා නඩු තීන්දුවට බලපෑම් කිරීම කණගාටුදායකය. තී්න්දුවට එරෙහිව කලහැකි නීත්‍යානුකූල ඉදිරි ක්‍රියාමාර්ගය වන අභියාචනා කිරීමට කටයුතු කරන බව පවසනු ඇසීම සතුටුදායකය.

නඩු තීන්දුව හමුවේ මාධ්‍යන්වල හැසිරීම කණගාටුදායකය. තීන්දුව කුමක්ද, දඬුවම් ලැබුනේ කාටද යන කාරණාවලට මූලිකත්වය ලැබුනේ නම් සතුටුදායකය. "බෙදුනු තීන්දුවක්" ලැබුනු බව උලුප්පා පෙන්වීම කණගාටුදායකය. එවැනි විකෘති කිරීම් වෙනුවෙන් යම් ගෙවීමක් මාධ්‍යවේදීන්ට ලැබුනේ නම් ඔවුන්ට සතුටුදායකය. තවත් සමහර මාධ්‍ය, ප්‍රතිවාදී මාධ්‍යකරුවාගේ සහෝදරයාගේ මරණ දඬුවමෙන් චූන් වීම කණගාටුදායකය. පෞද්ගලික මාධ්‍යට සාපේක්ෂව ආණ්ඩුවේ මාධ්‍යවල වාර්තාකරණය සතුටුදායකය.

නීතිය වල්වැදුන යුගයේ නඩුවේ තත්වය මතක් කිරීමත් කණගාටුදායකය. පමා වී හෝ බලපෑම්වලින් තොරව නීතිය ක්‍රියාත්මක වී යැයි සිතන්නට හැකි නම් සතුටුදායකය. එහෙත් නීතියට ඉහලින් සිටින පිරිසගේ ඩීල් ගැන මතක්වීම ඉතාමත් කණගාටුදායකය. එබැවින් නඩු තීන්දුව අභියාචනාධිකරණයේදී නැවත පරීක්ෂාවට ලක්වන තෙක් උෂාර් නොවී සිටීම අපේ පැත්තෙන් සතුටුදායකය.

පැටීගේ බ්ලොග් අඩවියෙන් අතුරු කතාවක්

Wednesday, September 7, 2016

දරුවනි මමයි නුවර අනගාරික ඇතා!

පසුගිය දිනෙක ෆේස්බුක් සටහනක් තබන අප මිත්‍ර චමීර ජීවන්ත දෙද්දුවගේ විසින් අලුත් වචනයක් නිර්මාණය කර තිබුනි. ඒ "බෞදිය" යන්නයි. කුමක්ද මේ බෞදිය? ආගමික වශයෙන් දැඩි අන්තවාදයක් පවතින, ආගමේ නාමයෙන් සිය දහස් ගනන් මිනිසුන්ගේ ගෙල සිඳ දමන, කසපහර දෙන, අත්-පා සිඳ දමන "සෞදිය" (හෙවත් සෞදි අරාබිය) යන්නෙහි ශ්‍රී ලාංකීය අනුවර්තනයයි. අපූරුය. අප රටෙහි දැන් දැන් සිදුවන්නේ බෞදිය අර්ථගැන්වෙන සිදුවීම්ය. එහි නවතම කූටප්‍රාප්තිය දළදා කරඬුව ගෙනයන හස්තියාගේ ලිංගික චර්යාවන් පාලනය කිරීමට ඇත් හිමිකරුවන් කටයුතු කිරීමයි.

මෙම සිදුවීම, විවිධ පාර්ශවයන් විසින් විවිධ අයුරින් විග්‍රහ කිරීමට කටයුතු කරමින් සිටිති.
පිරිසකට අනුව, පෙරහර යනු සංස්කෘතික කටයුත්තකි. ඇතාට සිදුවන සිංසාව සංස්කෘතියේ නාමයෙන් ඉවසා සිටිය යුතුය. පෙරහැර නම් සංස්කෘතික උත්සවය ශ්‍රී ලංකාවට යම් යම් වාසි සලසන්නකි. (උදාහරණ ලෙස සංචාරක ව්‍යාපාරය) එහි සත්‍යතාවයක් තිබේ. තවත් පිරිසකට අනුව ඇතාට සිදුවන හිංසාවන් නැවැත්විය යුත්තේ මස් පිණිස සිදුවන සත්ව ඝාතන නැවැත්වීමෙන් පසුවය. හිංසාවට වඩා ඝාතනය නරකය. එබැවින් හිංසාව නැවැත්වීමට සියල්ලන්ම නිර්මාංශික වියයුතුය. එයත් නරක නැත.

තවත් කොට්ඨාසයකට අනුව ඇතාට සිදුවන හිංසාවක් නැත. ඇතා ස්ව කැමැත්තෙන් පෙරහැරට සහභාගී වන අතර, මහා ලොකු පින් කන්දරාවක් රිටර්න් එක ලෙස ඌට ලැබේ. ඒ පිනෙන් මතු භවයේ මිනිස් ආත්මයක් ලබාගත හැකිය. මොවුන්ට අනුව මරක්කලයන් හරක් මරද්දී ඇතාට සිදුවන සාපේක්ෂව ‍කුඩා හිරිහැරය, බෞද්ධ විරෝධීන්ගේ වෙනම ගේමකි. බුදුදහමට කෙලවීම ඔවුන්ගේ අරමුණයි.

අපට බෞද්ධයන්ගේ හෝ වෙනත් ඕනෑම පාර්ශවයකගේ අදහස් සම්බන්ධව ඉවසිය හැකිය. ඒ, ඔවුන්ගේ කියුම් කෙරුම් අපට අදාල නොවන තාක් කල්ය. ඕනෑම අයෙකුගේ ක්‍රියාවකින් අපට බලපෑම් සිදුවන්නට පටන් ගත්විට ඒ පිළිබඳව කතාකිරීමට සිදුවේ. ඇතාගේ ලිංගික චර්යාව සම්බන්ධයෙන්ද එසේය. ඇතා වර්ගයා බෝ කලත් නැතත් අපට ගැටළුවක් නැත. පෙරහැරේ යන ඇතුන්ට සිදුවන හිරිහැරයන්ද ගනන් නොගෙන සිටිය හැකිය. නමුත් ප්‍රශ්නය වන්නේ මේවා අන්තවාදය දෙසට ගමන් කිරීමයි.

සමහර ආගම් ස්වභාවයෙන්ම අන්තවාදි වන අතර ඒ හේතුවෙන් අන්‍යාගමිකයන්ට සිදුවන හිරිහැර සඳහා උදාහරණ අවශ්‍ය නම් මැදපෙරදිග කලාපයෙන් සොයාගත හැකිය. නමුත් බුදුදහම එසේ නොවේ. ඉතාම නිදහස් දර්ශනයක් සහිත බුදුදහමෙහි කොතැනකවත් අන්තවාදයට ඉඩක් නොවේ. අවිහිංසාවාදය ‍බුද්ධ දර්ශනයේ එක් ප්‍රධාන බල කණුවකි. අවුල ඇත්තේ අවිහිංසාව පදනම් කරගත් බුදුදහම දෙසූ බුදුන් වෙනුවෙන් තිරිසන් සතුන් වධයට භාජනය වීමයි. බුදුන් වෙනුවෙන් සතෙකු හිංසාවට පත්කිරීමෙන් නොනැවතී, ලිංගික කාර්යයන් බලහත්කාරයෙන් නවතා 'දැං ඌ සිල් අරං' යැයි කියන්නෙකුගේ මානසිකත්වය කෙබඳු විය හැකිද? තවත් කාලයකින් දියවඩන නිලමේ තනතුර සඳහා නපුන්සකයෙකු තෝරාගැනීමට යෝජනා විය හැකිය. එවිට සදාකාලික අනගාරිකයෙකු දන්ත ධාතුවට සේවය කල හැකිය... මෙය, පෝයදා බාර් වැසීම, රූපවාහිණී චිත්‍රපටි නැවැත්වීම (ඒකත් හරි ආතල්ය. පෝය දිනවල ඇක්ෂන් ශෝ නැතිය. ගහ මරාගැනීම් නරක නිසාය. එහෙත් බුද්ධාගමට සම්බන්ධ නම් කොතෙක් මැරුවත් කමක් නැත), ඉරිදා ටියුෂන් තහනම, ආදියේ දිගුවකි. එබැවින් අපට කීමට ඇත්තේ මෙයයි. "උඹලා උඹලාගේ සිස්ටම් එක ඇතුලේ ඕන මගුලක් කරගත්තාට අපට කමක් නැත. හැබැයි අපේ අාතල් කඩන්න එපාය. අපේ ආතල් කඩන විට අපටද ආතල් කැඩීමට සිදුවේය!"

Monday, September 5, 2016

ඒ සැමරූවේ පොලීසියේ එකසිය පනස්වැනි සංවත්සරයයි.


"හිරු පමණි සාක්කි" බ්ලොග්කරු, මාධ්‍යවේදී රුවන් නෙලූට පහර දීමෙන් පොලීසිය තම අභිමානවත් එකසිය පනස්වන සංවත්සරය සමරා තිබුනි. ප්‍රහාරයට විරෝධය දක්වමින්ම ඒ සම්බන්ධ ෆේස්බුක් සටහන් කිහිපයක් ඉදිරිපත් කරමි.

**************************************************
"ගෙදර ඉඳපු සාමාජිකයෙක් ගේ ළඟ කඩේට ගිය වෙලාවෙ 'කුඩු කාරයෙක්' කියලා මහපාරෙ උගෙ සරම ගලවලා චෙක් කරලා. ඒ කොල්ලාව ගෙදරට ඇදන් ඇවිත් කුඩු හෝ ගංජා තියෙන තැන් පෙන්නන්න කියලා ඌට ගැහුවා. මං ඒකට විරුද්ධ වුණා. පොලිසියට යමු කිව්වා. මට විරුද්ධව චෝදනාවකුත් නැතිව තියෙද්දි අතින් හරි ගංජා දාලා හිරේ යවනවා කිව්ව. පිස්තෝලයක් පෙන්නුවා. මං ඇහුවා වෙඩි තියන්නද අපට කියලා. ජීප් එකට ගෙනිච්චා. මං ෆෝන් එක ගනිද්දි ඒක උදුරාගෙන මට ගැහුවා. ගහන්න අයිතියක් පොලිසියට නැති බවත් මං මාධ්‍යවේදියෙක් බවත් කිව්වාම හොඳට ම රත් වුණු සිවිල් ඇඳුමෙන් හිටපු අං තට්ටුව විතරක් අඩු පොලිස් කාරයෙක්ද කියලත් හිතන්න බැරි එකෙක් 'අම්මට හු** මීඩියා' කියලා දිගට හරහට ගැහුවා. පොලිසියට ගෙනිහින් මොකුත් උනෙ නැති ගාණට මාව කුඩුවට දැම්මා. එතකොටත් අපෙ ලෝයර් එතෙන්ට ඇවිත් හිටියා. පොඩි වෙලාවකින් මං එළියට ආවා. ඔහොමයි උනෙ. තොල පොඩ්ඩක් පැළිලා, දිව හැපිලා, මූණයි ඔළුවයි එහෙන් මෙහෙන් තැළිලා. ලොකු අමාරුවක් ඇඟට නැහැ. ගුටි කන්න වුණාම වැඩියෙන් දැනෙන්නෙ හිතේ අමාරුව. අපට මෙහෙම නම් මොනුත්ම කරකියාගන්න බැරි මිනිස්සුන්ට මුං මොනවා කරනවා ඇත්ද ?"
-රුවන් නෙලූ

මම ලංකා නිව්ස් වෙබ් වෙබ් අඩවියෙහි මාධ්‍යවේදියෙකු ලෙස සේවය කරමි. දේශපාලන සිරකරුවන් නිදහස් කරගැනීමේ ජාතික ව්‍යාපාරයෙහි ක්‍රියාකාරිකයෙක්මි. යම් ප්‍රමාණයකට නීතිය ගැනද දනිමි. මට ඊයේ මුහුණ දීමට සිදු වූ සිදුවීම කිසිවක් කර කියාගත නොහැකි මිනිසෙකුට සිදු වී නම් අද ඔහු සිරගෙදරය. ලංකාවේ පොලීසිය නීතිය ආරක්ෂා කරන්නෙ මෙලෙසය. ඒ මදිවාට මට පහර දුන් පුද්ගලයා පොලිස් ජීප් රිය තුළදී ම පිස්තෝලය වනමින් මට තර්ජනය කළේ 'මං පළවෙනියට ම මිනිහෙක් මැරුවේ 11 වසරෙදි' කියාය. පොලිසියේ සියල්ලන්ම මිනී මරුවන්දැයි සොයා බැලීම භාර වන්නේ කවර ආයතනයකටද ?
පිස්තෝලයක් පෙන්වමින් පහරදීමට එකම හේතුව වූයේ 'එහෙම කොහොමද මිනිස්සුන්ව අරන් යන්නේ?' යි මා ඇසූ ප්‍රශ්නයයි. පොලීසියෙන් ප්‍රශ්නයක්වත් ඇසීමට නොහැකි වන තරමට පොලිසිය ඔළුවට ගෙන ඇත්තේ කාගෙ උෂ්නයදැයි මා දන්නේ නැත. කෙසේ වෙතත් ඒ අවනීතියේ උෂ්නයයි.
-රුවන් නෙලූ

මට ඊයේ මුහුණ දීමට සිදු වූ සිදුවීම කිසිවක් කර කියාගත නොහැකි මිනිසෙකුට සිදු වී නම් අද ඔහු සිරගෙදරය. ලංකාවේ පොලීසිය නීතිය ආරක්ෂා කරන්නෙ මෙලෙසය. ඒ මදිවාට මට පහර දුන් පුද්ගලයා පොලිස් ජීප් රිය තුළදී ම පිස්තෝලය වනමින් මට තර්ජනය කළේ ‘මං පළවෙනියට ම මිනිහෙක් මැරුවේ 11 වසරෙදි’ කියාය. පොලිසියේ සියල්ලන්ම මිනී මරුවන්දැයි සොයා බැලීම භාර වන්නේ කවර ආයතනයකටද ?
පිස්තෝලයක් පෙන්වමින් පහරදීමට එකම හේතුව වූයේ ‘එහෙම කොහොමද මිනිස්සුන්ව අරන් යන්නේ?‘ යි මා ඇසූ ප්‍රශ්නයයි. පොලීසියෙන් ප්‍රශ්නයක්වත් ඇසීමට නොහැකි වන තරමට පොලිසිය ඔළුවට ගෙන ඇත්තේ කාගෙ උෂ්නයදැයි මා දන්නේ නැත. කෙසේ වෙතත් ඒ අවනීතියේ උෂ්නයයි.
-Ruwan Nelu

මචන්ස්ලා Ruwan Nelu ට පොලිස් කාරයන් කිහිප දෙනෙක් විසින් එල්ල කරන ලද මැර ප්‍රහරයට එරෙහි වමු. හෙලා දකිමු. නමුත් සටන නිවැරිදි දැක්මකින් නිවැරිදි මාර්ගයේ යා යුතුයි.
නැත්නම් මෙච්චර කල් කරපු ලංකා ඉතිහාසයේ කරපු ගොං අරගල වලින් එහාට මේකත් යන්නෙ නෑ.
පොලීසියේ සේවයට බඳවාගෙන සිටින නමුත් එයට නුසුදුසු යුනිෆෝම් පවර් අතට ගත් නුසුදුසු ගංකබර ගොරක චන්ඩිණ්ට එරෙහිව අපි ක්‍රියාත්මක විය යුතුයි.
නමුත් මොනම විදියකින්වත් මෙය පොලීසිය නම් සංකේත ආයතනයට විරුද්ධ සටනක් බවට හරවන්න ඒ වගේම ගං කබර උද්ගෝශකයින්ට ඉඩ නොතැබිය යුතුයි.
හැම මුසල්මානුවෙක්ම ත්‍රස්තවාදීයෙක් නොවනවා සේම හැම පොළිස් කාරයෙක්ම මෙවැනි ගංකබරයන් නොවේ .
ලංකාවේ පොලිසියේ බහුතරය මෙසේ විය හැක නමුත් බ්‍රේව් පොලිස් කාරයන්ද ඇත.
නීතියේ රීතිය වෙනුවෙන් පෙනී සිටිමු. පොලිසිය නම් සංකේත ආයතනය මීට වඩා ශිශ්ඨ ආයතනයක් කරා තත්වය උසස් කිරීමක් ඉල්ලමු. මොනම හේතුවක් නිසාවත් ෆක් ද පොලීස් කියන වල්බූරු සටන් පාඨය කරා නොයෑමට නූතන සටන් වගබලා ගත යුතුය.
පොලිසියට බඳවා ගැනීමේදී උසස් පෙල සමත් වීම ,,මනෝ විද්‍යාත්මක පරීක්ෂණයකින් සමත් වීම etc .වැනි දේ මේ සඳහා මගේ යෝජනායි.
-උදිත

----------------------------------------------------------

යාවත්කාලීන කිරීමයි! 2016.09.06 පස්වරු 1.05

රුවන් නෙලූ ජනමාධ්‍ය වෘත්තිය පාදඩකරණය කිරීම.
පසු ගිය දින කීපයේ සමාජ මාධ්‍ය ජාල කැළඹූ පුවතක් වූයේ ජනමාධ්‍යෙවේදියෙකැයි කියා ගන්නා රුවන් නෙලූට හේතු විරහිතව පොලීසියෙන් පහර දී රිමාණ්ඩ් කිරීමට තැත් කළ බවය.
ඔහුම මේ බව මුහුණු පොතේ සටහන් කර තිබූ අතර “පොලීසිය මාධ්‍යෙව්දීන්ට පහර දෙමින් 150 සමරයි“ යනුවෙන් ප්‍රවෘත්ති වෙබ් අඩවි කිහිපයක්ම මේ පුවත පල කර තිබිණි.
මේ පුවත හේතුවෙන් කරුණු දෙකක් සිදු විය. ඉන් එකක් වන්නේ ජනමාධ්‍ය සහ පොදුවේ ප්‍රජාතන්ත්‍රවාදය සහ යහපාලනය වෙනුවෙන් සටන් කරන්නන් කලබලයට පත් වී පොලීසියට සිය දැඩි විරෝධය පල කරමින් පොලීසියෙන් සහ ජනමාධ්‍ය අමාත්‍යංශයෙන් මේ පිළිබඳ පරීක්ෂණයක් ඉල්ලා සිටීමය.දෙවන කරුණ වූයේ ජනමාධ්‍යෙව්දියෙකුට පහර දී ඇත්තේ මන්ද යන කාරණය සම්බන්ධයෙන් පොලීසියේ සහ ජනමාධ්‍ය අමාත්‍යංශයේ දැඩි අවධානය යොමු වීමය.
ජනමාධ්‍යෙව්දියෙක් වන තමන්ට පොලීසිය හේතු විරහිතව පහර දී අත්අඩංගුවට ගැනීමට තැත් කළා කියා සමාජ මාධ්‍ය පුරා පතුරා ජන සමාජය කළඹා රජය සහ පොලිස් දෙපාර්තමේන්තුව අපකීර්තියට පත් කළ රුවන් නෙලූ දැන් කියන්නේ තමන් පොලීසියට විරුද්ධව පැමිණිලි නොකරන බවත්, ඉදිරි නීතිමය කටයුතු අනවශ්‍ය බවත් තමන් පොලීසිය සමග ඩීල් එකක් දමා ගත් බවත්ය. ඩීල් දමා ගත්තා නම් රටට බොරු නොකියා නිකම් සිටිය යුතුය. අනෙක් අතට ඩීල් දමන්නේ තමන්ගේ කිසියම් වරදක් තිබෙන නිසාය.
ගංජා සමග පොලීසියට මාට්ටු වූවකු කළ යුත්තේ දේශපාලන පලි ගැනීමකට පොලීසිය තමන්ව අත්අඩංගුවට ගෙන පහර දුන් බවට බොරු කියමින්, ජනමාධ්‍ය වෘත්තිය පාදඩකරණය කිරීම නොව තමන් කළ වරද පිලි ගැනීමය. රුවන් නෙලූ කළ යුත්තේ බොරු කියමින් සමාජය කලඹා ජනමාධ්‍යෙව්දීන්, රජය සහ පොලීසියද, රටේ ප්‍රජාතන්ත්‍රවාදයට ලැදි මහජනයාද අපහසුතාවයට පත් කිරීම සහ නොමග යැවීම නොව නඩු නොදමා කනට දෙකක් ගසා තමන්ව ගෙදර එවීම ගැන පොලීසියට ස්තුති කිරීමය. (ගංජා හොඳද නරකද යන්න වෙනම මාතෘකාවකි)
මෙවැනි පාදඩ වැඩ කිරීමෙන් සිදු වන්නේ සැබෑ පහර දීමකට ලක් වන ජනමාධ්‍යෙව්දියෙක් වෙනුවෙන් පවා හඩක් නැගීමට සමාජය ඉදිරිපත් නොවීමය.
මට රුවන් නෙලූට කීමට ඇත්තේ නොදන්න ජානමාධ්‍ය වෘත්තිය පාදඩ වැඩ වලට යොදා ගනිමින් මෙවැනි කැත වැඩ නොකර දන්න වෙන කර්මාන්තයක් කරගෙන මලකුත් ගසාගෙන පාඩුවේ ඉන්න ලෙසය.
හරි නම් බොරු තොරතුරු සමාජගත කර සමාජය කැළඹීම, පොලීසිය සහ, රජය අපකීර්තියට පත් කිරීමට එරෙහිව රුවන් නෙලූව අත් අඩංගුවට ගෙන නඩු පැවරිය යුතුය.
බොරුකාරයෙක් වෙනුවෙන් ජනමාධ්‍ය නියෝජ්‍ය අමාත්‍යවරයාගේ සහ පොලිස්පතිවරයාගේ වටිනා කාලය කාලය කෑම වෙනුවෙන් මම එම දෙදෙනාටම සමාවක් ණයය.

-Shyaman Hemakody


Friday, September 2, 2016

මිත්‍රකම් අවසන් කිරීමයි!


ශ්‍රී ලංකා ප්‍රජාතාන්ත්‍රික සමාජවාදී ජනරජයේ සිංහල බ්ලොග් අවකාශයේ "රාජ්ගෙ නවාතැන" ලියන රාජ් වන මා විසින්, මාගේ මිත්‍රයෙකු ලෙස සැලකූ "මාතලන්" බ්ලොග් අඩවියෙහි "Maathalan - Priyantha Hewage" සමඟ පැවති සියළු මිතුරුකම් අවසන් කල බව ශ්‍රී ලංකා ප්‍රජාතාන්ත්‍රික සමාජවාදී ජනරජයටත් සිංහල බ්ලොග් අවකාශයටත් මෙයින් දැනුම් දෙමි!

මේ සම්බන්ධයෙන් පසුගිය සටහනට දැමූ කමෙන්ටු කිහිපයක් විස්තරාත්මක පැහැදිලි කිරීම සඳහා පහතින් යොදාගන්නා බවත් දැනුම් දෙමි.
***********************************************************
Maathalan - Priyantha HewageSeptember 2, 2016 at 9:19 AM
@ රාජ්

ඔබට චෝදනා කරන්නේ ඇයි කියා ඔබ මගෙන් විමසා සිටිනවා. ඒ කොමෙන්ට් එක අමු තිත්ත කුණුහබ්බ කොමෙන්ට් ඩිලිට් කිරීමේදි ඩිලීට් වී තිබෙනවා..

මට ඔබෙන් අහන්න තියෙන්නේ එක දෙයයි. ඔබ ඊයේ හැන්දෑවේ මේ අඩවියේ කරපු මෙහෙයුම දකින්න ඇති නේ... ඒ ඇර මට කීමට කිසිත් නැත. ඔබ ඇනෝ කොමෙන්ට් වලට ඉඩ දෙන්න යැයි කියන්නේ ඇයි කියා ඊයේ හවස මා වටහා ගත්තෙමි. බොහෝම ස්තූතියි.

ආයේ කිසි දිනෙක් හමු නොවෙමු.. ඔබ වැනි දෙබිඩ්ඩන් හා සමාගමය මා ප්‍රිය නොකරමි.


රාජ්September 2, 2016 at 10:52 AM
මේ පෝස්ට් එක දැම්මෙ ඊයේ. ඊයේ හවස හතරට ඕෆ් වෙනකල්ම ඇනෝලා පැමිණියේ නෑ. ගෙදර ගිහින් පැයකට දෙකකට පස්සෙ තමයි ආයෙ ජාලෙට ආවෙ. ඒ එද්දි මගේ අඩවියේ ඇනෝලාත් උඹත් කුනුහබ්බ කියල තිබුන. ඒ සියල්ල මකා දැම්ම අදාල නොවන නිසා. උඹේ අඩවියේදිත් උඹ මට අපහාස කරල තිබුන කිසිදු හේතුවක් නැතිව. මම ඇනෝ මෙන්ට් වහන්න හෝ මොඩරේට් කරන්න අකමැති බව කලින්ම කියල ඇති. මම සාමාන්‍යයෙන් කරන්්නෙ දැක්ක ගමන් මකා දැමීම.
ඇත්තටම ඇනෝලා මගේ බ්ලොග් එකේ කුනුහබ්බ කියන්න පටන් ගත්තෙ මේ ලිපියෙ නෙවේ කලින් ලිපියෙ. උඹ දැක්කද මම දන්නෙ නෑ කමෙන්ට් විස්සක් විතර ඩිලීට් කලා පෙරේදා රෑත්. එහෙම තියෙද්දි උඹ මට පොන්නය කියනව නං මට කරන්න දෙයක් නෑ. මම අද උදේ උඹේ අඩවියේ දාපු කිසිදු චෝදනාවක් නැති කමෙන්ටුවත් තාම ඇපෲ කරල නෑ. හැබැයි ඊට පස්සෙත් කමෙන්ට් ඇවිල්ල තියනව. විවේචනවලට බය පොන්නයා කවුදැයි කියල දැනගන්න ඕන නං කන්නාඩිය ඉස්සරහට ගිහිල්ල බලපං.

මේ ගැන දෙවැනි කමෙන්ටුව යටින් දානව.


රාජ්September 2, 2016 at 11:07 AM
රසිකට අපහාස කරන්න කලින් උඹත් එක්ක තිබුන චැට් එකේදි මම ඇහුව උඹෙන් "මොකද්ද රසික ඇනෝ දාන බවට තියන පිලිගත හැකි සාක්ෂිය" කියල. උඹ දුන්න උත්තරේ වුනේ "මම ඔප්පු කරන්නං" කියන එක. ඊට පස්සෙ උඹ කියනව "දැං රසික දාපු ස්ටේටස් එක ඩිලීට් කරල තියෙන්නෙ ඇයිද" කියල. මම උඹට පෙන්නුව මතක ඇති එවලේම අදාල බුකි ස්ටේටස්එක ඩිලීට් කරල නැති බව. ඊට අමතරව උඹට කිව්ව ඉවසපං කියල. එතනින් වැඩේ ක්ලොස්. උඹ චැලේන්ජ් එක භාරගත්තට ඔප්පු කලේ නෑ. ඉතිරිය කවුරුත් දන්නව.

උඹ සහ රසිකලොජි කියන්නෙ මම බ්ලොග්වලින් දැනගත්ත දෙන්නෙක් විතරයි. රසික මම දැකල හෝ කතාකරල නෑ. උඹ එක්ක සෙට්වුන හැටි උඹ දන්නවනෙ. මට කාගෙවත් පැත්තක් ගන්න ඕනවුනේ නෑ එතනදි. හැබැයි කෙනෙකුට විරුද්ධව චෝදනාවක් කරනව නං ඒක සාක්ෂි සහිතව කරන්න ඕන. එතනදි සිදුවුනේ එහෙම දෙයක් නෙවේ. රසික මහත්මයෙක් වගේ හැසිරෙද්දි උඹ උඹේ ලෙවෙල් එක නියමෙට පෙන්නුව. ඒ මදිවාට කොහේවත් නැති ඉකොනොමැට්ටා අල්ලගෙන එයාටත් මඩ ගැහුව. ඉකොනොට මඩ ගහන්න උඹ යොදාගත්ත දියාරු තර්කයෙන් උඹේ ගැලවෙන්න ඉතිරි වෙලා තිබුන රෙදිත් ගැලවුනා.

ඇනෝ ඇල්ලීම ගැන උඹ වැටිල ඉන්නෙ ලොකු මුලාවක. ඒ මුලාවේ තරම උඹ ඉගනගන්න තිබුනෙ දොස්තර රුවන්ට මඩ ගහපු වෙලාවෙ. නමුත් උඹ, පස්සෙ ඇත්ත තත්වය තේරුම්ගත්තම වත් රුවන්ගෙන් සමාව ගත්ත බවක් පෙනුනේ නෑ. කවුරුන් හෝ කියල දීල තියන අසාර්ථක ක්‍රමයකින් ඇනෝලා අල්ලන්න උත්සාහ කරපු උඹේ තත්වය දැන් පැහැදිලියි. ඒ මදිවාට උඹව අවුස්සන්න, සමාජ ව්‍යවහාරයෙන් "මෝඩයන්" කියල අපි හඳුන්වන දෙතුන් දෙනෙකුත්, උඹේ මතයට එරෙහිව එන්නන්ට කඩුව වනන වඳුරො කිහිප දෙනෙකුත් ඉන්න බවත් පේනව. අවුලක් නෑ. මම පිස්සන්ටවත් මෝඩයන්ටවත් වඳුරන්ට බය නෑ මචං.
උඹත් එක්ක තියන මිත්‍රකම් සියල්ල උඹ කියන්නත් කලින් අවසන් කල බව කියන්න ලැබීම මිත්‍රකම් අවසන් කරන්න බලාගෙන හිටිය උඹට පහසුවක් කියල අවසානයේදී කියන්න කැමතියි. යලිත් ඒ පැත්තෙ එන්නෙත් නෑ.

[ඒ නිසා දැං ඇනෝ විවෘත කරල සීමාවකින් තොරව කමෙන්ට් දාන්න ඉඩ සලසල තියනව. ඇරියස් තියන අයට ඇරියස් යවාගෙන හිත සැහැල්ලු කරගන්න පුළුවන්.]

Thursday, September 1, 2016

"සිතක සටහන්" කියවමු!


බ්ලොග්වලින් ඈත්වෙලා බුකියෙ ඉන්න කාලයේ දැකපු කෙනෙක් තමයි ලක්ෂාන් වික්‍රම කියන්නෙ. නිතර නිතර කමෙන්ට්වලින් මුණගැහුනෙ නැතත් ඉඳහිට ඔහු දක්වන අදහස්වල වැදගත්කමක් තිබුන. අවධානය යොමුවුනා. "සිතක සටහන්" කියන්නෙ ඔහුගේ බ්ලොග් අඩවිය. බ්ලොග් ලිවිල්ල පටන් ‍අරගෙන අවුරුද්දකට කිට්ටු වුනත් ටැබූ සබ්ජෙක්ට්ස්ලා බ්ලොග් අවකාශයේ රජ කරන කාලෙත් ඔහු බ්ලොග් කියවන්නෙක් බව පේනව.

ඊයේ පලකරල තියන "ටැබූ සබ්ජෙක්ට්ස්ගේ පුරාවෘත්තය The Legend of Taboosubjects" කියන ලිපියෙ පැරණි බ්ලොග් කිහිපයක් ගැන මතක් කරනව.

"පාඨකයා පෙලඹවන සිත් ගන්නා සුළු භාෂා ව්‍යවහාරයක් බ්ලොග් පෝස්‍ට් තුළ පැවතිනි. අද දක්නට ලැබෙන බොහෝ බ්ලොග් කරුවන්ට ආදර්ශයට ගත හැකි නිමාවක් එතුළ තිබිනි. එවකට තිබූ පාර්ශ්වික බ්ලොග් අඩවිවල කොමෙන්ටු හා බලන විට ටැබූ ගේ තවත් ප්‍රධානම වෙනසක් වූයේ සංවාද යි. මේ කොමෙන්ට් සංවාද ඉතා ඉහළ ප්‍රමිතියකින් යුතු වීම අද ප්‍රසිද්ධ බ්ලොග් අඩවිවලත් මා නොදකින ලක්ෂණයකි. රසිකලොජි හෝ W3 සැලකුවත් සංවාදවල ඉහළ ප්‍රමිතියක් දක්නට නැත. එමෙන්ම සමාජයීය දේශපාලනික කරුණු ගැන හුදු මතුපිට ඉක්මවා යන ප්‍රබල විශ්ලේෂණයක් (ඇතැම් අවස්ථාවල දෘෂ්ඨියාත්මක හේතූන් මත අසාර්ථක වුවද) ඉදිරිපත් කිරීමට ටැබූ ප්‍රයත්න දැරුවේය. ඒ බව එකල ක්‍රියාකාරී අනෙකුත් ප්‍රකට බ්ලොග්කරුවෙක් වන Beyond Frame හා තවමත් බ්ලොග් අවකාශයේ වැජඹෙන W3 Lanka සඳහන් කරනු මතකය. උදාහරණයකට දඩුවම් මුදලාලිගේ මිනීමැරුම ආදි සිද්ධීන් වලදී ඔහු දැරුවේ සාමාන්‍ය සමාජයේ ජනප්‍රිය මතයට බෙහෙවින් වෙනස් මතවාදයකි. එමෙන්ම නත්තල් සමයේ ක්‍රිස්තුස්වහන්සේ ගැන පෝස්ටුව හා ඒ අදාළ සංවාදද මතක් කළ යුතුය"

මේ බ්ලොග් අඩවිය ගැන සටහනක් දාන්න හිතුවෙ බ්ලොග් කියවන්නන්ට ඔත්තුවක් දෙන්න වගේම ලක්ෂාන් "නොලියා ඉන්න බැරි" අමාරුවට පත් කිරීම.

සිතක සටහන් ☞

Tuesday, August 30, 2016

හැක් කරන්නාට ප්‍රේම කරමු(?)

ජනාධිපතිවරයාගේ වෙබ් අඩවිය හැක් කිරීම සම්බන්ධව අත්අඩංගුවට පත්ව ඇත්තේ බාල වයස්කාර සිසුවෙකි. පරිගණක දැනුමැත්තන්ට අනුව ලංකාවේ වෙබ් අඩවි හැක් කිරීම මහලොකු දෙයක් නොවේ. ඇරත් වැඩ දන්න එකාට ඇමරිකාවේ ලොක්කාගේ වෙබ් අඩවිය වුවද ලොකු නැත. බස්නාහිර පළාත් සභාවේ වෙබ් අඩවිය හැක්කර ප්‍රසන්න රනතුංගගේ මුහුණ වෙනුවට "අන්තරාදායක" සලකුණ යෙදුවේද සිසුවෙකු විසිනි. කෙසේ වෙතත් හැකර්ගේ දක්ෂතාවයේ තරම සහ වෙබ් අඩවි පරිපාලකයන්ගේ තරම අනුව ඉදිරියේදී කටයුතු කිරීමට ජනාධිපතිවරයාගේ වැඩකි.

විසුළු සහගත කාරණාව එය නොවේ. සයිබරය පුරා‍ පැතිර යන හැක් කරන්නාට ප්‍රේම කිරීමේ වැලපිලිය. එකෙකුට අනුව හැකර් ඇමරිකාවේ සිටියා නම් ඔහුගේ සේවය ලබාගැනීමට බිල් ගේට්ස් කටයුතු කරනු ඇත. තවත් අයෙකුට අනුව ජනාධිපතිගේ වෙබ් අඩවියෙහි කටයුතු හැකර්ට භාරදිය යුතුය. හැකර් වීරයා කරගෙන ඇත.

මීට පෙර බාල වයස්කාරියක පොල් ගෙඩි කිහිපයක් සොරකම් කල අතර එය අධිකරණය දක්වා ගෙනයාමට පොලීසිය කටයුතු කර තිබුනි. එහිදී සමාජයේ අනුකම්පාව ඇයට හිමිවූ අතර සොරකමේ ස්වභාවයේ "සුළු" බව සහ දරිද්‍රතාවය හේතුවෙන් සොරකම් කිරීමට සිදුවූ බවත් උළුප්පා පෙන්වුවා මිස "වරද" මෙවැනි වීරත්වයට නැංවීමක් සිදු නොවීය.

පරිගණක අපරාධ/තොරතුරු සම්බන්ධව නීතිරීති මේ වනවිට ලංකාවේ නීතියට එක්කර ඇත. ඉලෙක්ට්‍රොනික් ගණුදෙනු පනත, පරිගණක අපරාධ පනත, තොරතුරු සන්නිවේදන තාක්ෂණ පනත... ආදිය මඟින් මෙවැනි අපරාධවලට දඬුවම් කිරීමට හැකිය. වෙබ් අඩවි හැක් කිරීම, ඊමේල් හෝ ෆේස්බුක් වැනි සමාජ ජාල ආදියෙහි සිටින්නන්ගේ ගිණුම් සොරකම් ආදිය නීති විරෝධී කටයුතුය. නීති විරෝධී කටයුතු සිදුකරන්නෙකුට ඊට අදාල දඬුවම් හිමිවිය යුතුය. වැරදිකරුවන්, බාල වයස්කරුවන් වනවිටද වෙනම නීතියක් ක්‍රියාත්මක කිරීමට නීතිය ක්‍රියාවේ ‍යොදවන්නන්ට ඉඩ සලසා ඇත. බස්නාහිර පළාත්සභා වෙබ් අඩවිය හැක් කල සිසුවා අත්අඩංගුවට ගැනීමට කටයුතු කලේ ඔහුගේ විභාගය අවසන් වූ පසු වීම ඊට උදාහරණයකි.

වරදකරුවන් හෝ සැකකරුවන් සම්බන්ධන්ධව ලංකාව කටයුතු කරන ආකාරය එතරම් යහපත් නැත. ආයුධ පෙන්වීමට ගොස් බෝම්බ ගැසූ බව කියමින් සැකකරුවන් මරාදැමීමට කටයුතු කල අපකීර්තිමත් ඉතිහාසයක් අපට ඇත. සුළු වරදකට බන්ධනාගාරගත වන තරුණයන් පාතාල කෙරුමන් වී එලියට එන සංස්කෘතියක් අපට ඇත. මෙය ලංකාවේ සිදුවූ පළමු හෝ අවසාන පරිගණක අපරාධය නොවේ. අප හඬනැඟිය යුත්තේ මෙම හැකර් දරුවාට වියහැකි හානියෙන් ඔහු මුදවාගැනීමත් වැරදි කරන ළමුන් ඉන් මුදාගැනීමේ ක්‍රියාදාමයේදී ඔවුන් අනාගත අපරාධකරුවන් වීම වැලැක්වීමත් විනා හැක්කරන්නන් උත්කර්ශයට නංවා ‍ධෛර්යමත් කර තව තවත් හැකර්ලා බිහිකිරීමට පාර කැපීම නොවේ.



Friday, August 26, 2016

බුර්කිනි ගැලවීම!


සංවාදය සඳහාමයි!
[සයිබර් වරිගෙ උණ්ඩියාගේ සටහනකි!]

ප්‍රංශය විරෝධය දක්වන්නේ කුමකටදැයි බොහෝ දෙනෙකුට හරි අවබෝධයක් නොමැති බව පෙනෙයි.ප්‍රංශය දක්වන විරෝධය ඊනියා බුර්කිනියට හෝ කාන්තාවන්ගේ වස්ත්‍ර පාලනයට ලඝු කළ යුතු නැත. ප්‍රංශය විරෝධය පාන්නේ ආගමික වශයෙන් නිර්-ධ්‍රැවීකරණය කරන ලද සමාජයක ඉස්ලාමයේ නාමයෙන් වර්ධනය කරමින් පවතින ආගමික ධ්‍රැවයටය. ආගමික වශයෙන් නිරාරෝපිත වූ ( නිෂ්ක්‍රීය වූ ) සංස්කෘතියක් පවතින නිදහස් රටක කෙරෙමින් පවතින ඉස්ලාම් ආගමට බැඳුණු මුස්ලිම් සංස්කෘතික ආරෝපණයටය.

ප්‍රංශය මේ මොහොතේ ආර්ථික, දේශපාලනික සහ සාමාජීය වශයෙන් ඓහික නැඹුරුවක, ලිබරල් ස්ථාවරයක පවතී. නමුත් යුරෝපයේ බොහෝ රටවල සිදුවෙමින් පවතින්නා සේම එරට තුළද ප්‍රධාන නගර වල මේ මොහොතේ මුස්ලිම් සමාජයේ "ඒකලනවාදයක්" (Isolationism of Islamic Community) සහ "සංරක්ෂණවාදයක්" (Conservatism of Islamic Principles) පදනම කරගත් "ඉස්ලාමික කළාප" බිහිවීම සිදුවේ. මෙය කිසිවෙකුටත් ප්‍රතික්ෂේප කළ නොහැකි සත්‍යයකි.
ඉස්ලාමය අදහන පිරිස් විසින් විශාල නාගරික තුළ තමන්ගේ සමාජය ජීවත් වන ප්‍රදේශ ඊනියා කළාප වශයෙන් තමන්ට වෙන් කරගැනීමත්, අනතුරුව ඒ තුළ ඉස්ලාමික සංස්කෘතික අනන්‍යතාවය අධිපතිවාදී ලෙස ක්‍රියාත්මක කිරීමට උත්සාහ දැරීමත්, එයට අභියෝගයක් වන අයට යම් යම් වාචික හෝ කායික ප්‍රහාර එල්ල කිරීමත් යුරෝපයේ මේ වකවානුව තුළ දසතින් වාර්ථාවන පැහැදිලි සත්‍යයක් බවට පත්ව ඇත.

ප්‍රංශය විරෝධය ඵල කරන්නේ මෙසේ ගොඩ නැගෙමින් පවතින "වෙනම ආගමික අනන්‍යතාවයටය". මක්නිසාද මේ ආගමික අනන්‍යතාවයේ සිට නොබෝදා ප්‍රංශයට ත්‍රස්ත ප්‍රහාර එල්ල කළ ආගමික ත්‍රස්තවාදයට ඇත්තේ කෙස් ගසක දුරක් බව ප්‍රංශුවන් දන්නා නිසාය.

යම් පිරිසක් යම් ප්‍රදේශයකට සංක්‍රමණය වීමෙන් පසුව එහි වෙසෙන ජනතාව සමග මුසුවී පොදු එකඟතාවයකට ඒම ප්‍රතික්ෂේප කරන්නේ නම් එතන ක්‍රියාත්මක වන්නේ ආක්‍රමණික අරමුණු විනා අන් කිසිවක් නොවේ. නමුත් එයට විරෝධය පෑම කළ යුත්තේ නූතනවාදී විද්‍යාත්මක පදනමක සිටගෙන විනා තවත් එක් ආගමික අන්තවාදයක් අස්සට රිංගා ගෙන නොවේ.

Thursday, August 25, 2016

වැලන්ටයින් ජ්‍යෝතිශඥයා

අත බල‍ා සාත්තර කීම ගැන රසිකලොජිස්ට්ගේ ලිපිය සහ එහි ප්‍රතිචාරවලින් ජ්‍යෝතිශඥයෙකු ගැන මතකයක් අලුත් විය.
ඔහුගේ නම කුමක්දැයි දන්නේ නැතත් ගමේ ව්‍යවහාරයෙන් ඔහු ඩිංගි මහත්තයාය. අපට ඩිංගිමාමාය. මාගේ පියාගේ දීර්ඝකාලීන මිතුරෙකි. පවුලේ හිතවතෙකි. වයස දහයේදී පමණ, බ්ලොග්කරුවා හා හාපුරා කියා මධුවිතක් තොලගෑවේ ඩිංගිමාමාගේ නිවසේදීය. මොකක්දෝ කාර්යයක් අවසානයේ ඩිංගිමාමාත් පියාත් රහමෙර පානය කරද්දී, ඩිංගි මාමාගේ පුත්‍රයාත් සමඟ එකතුව අනවසරයෙන් වීදුරු දෙකක් පුරවාගෙන ඉන් බාගයක් පානය කලා මතකය.

ඩිංගිමාමා මාක්ස්වාදියෙකි. 71 කැරැල්ලට සම්බන්ධ වී සිර දඬුවම් ලබා පැමිණියෙකි. අසූ අට අසූ නවය කාලයේ එහෙමකට දේශපාලනයක් නොකලද ජවිපෙට හිතවත්ව කටයුතු කලේය. මගේ මතකයේ හැටියට පෙරටුගාමීන් ජවිපෙන් ඉවත්වන තෙක් ඔහු ජවිපෙ සමඟ සිටියේය. ඩිංගිමාමාද බොහෝ මාක්ස්වාදීන් මෙන්ම ආගම වෙනුවට මාක්ස්වාදය ආදේශ කරගෙන සිටි අයෙකි.

"තන්හාව ඇතිවෙන්නේ පුද්ගලික දේපල නිසා, දැං බලන්න මේ පාර තියනවනෙ, මේ පාර ගැන අපට තන්හාවක් තියනවද? නෑනෙ! අපට පාර ගැන තන්හාවක් නැත්තෙ ඒක පොදු දේපලක් නිසා. ඉතිං හැම දෙයක්ම පොදු දේපල නං, තන්හාව නැතිවෙනව ඉබේම. ඕකට භාවනා කරන්න ඕන නෑ, මාක්ස් කිව්ව දේ කලා නං එච්චරයි"

ඒ මට හොඳහැටි මතක ඇති ඔහුගේ කතාවකි. ඒ අසූ ගනන්වල අගභාගය හෝ අනූව දශකයේ මුල් කාලයයි. ඔහු පිළිබඳ යමක් සිතාගැනීමට පාඨකයාට හැකිය.

ඉන්පසු ඩිංගිමාමා ජ්‍යෝතිෂය ඉගනීමට පටන්ගත් අතර ජීවිතයේ අවසන් භාගය ගෙවමින් සිටි මාගේ පියාගේ මාමාකෙනෙකු ඔහුගේ ගුරුවරයා විය. ඔහු දක්ෂ ජ්‍යෝතිෂඥයෙකු බව මගේ පියා පවසා ඇත. මා ඉපදුනු දින ඉස්පිරිතාලයේ සිට ටවුමට පැමිණි පියාගෙන්, මා ඉපදුනු වේලාව අසා "දරුවගෙ ඔලුවෙ කෙස් නැහැ නේද?" යයි ඇසූ බව පියා කීවේය. ඇත්තය, මා උපන් තට්ටයෙකි. (මෙය බොහෝ බිළිඳුන්ට අදාලවන බව වෙනම කාරණයකි. මගේ පුතාද උපදින විට තට්ටයෙකි). ඩිංගි මාමා ජ්‍යෝතිෂය උගැන්නේ ඔහුගෙනි.

ඩිංගි මාමා ජ්‍යෝතිෂය ඉගනගන්නා සමයේ අප නිවසට පැමිණ, පියානන් සමඟ කරන කතාබහ හුරුපුරුදු දේශපාලනය නොව ජ්‍යෝතිෂයයි. නිවැරදිව කිවහොත් ගුරුවරයා පෑ හපන්කම්ය. වරක් දරුවෙකුගේ කේන්දරය පරීක්ෂා කල බවත් ඔහුට අපලයක් තිබූ බවත් රහසින් මෙන් කීවේය. හේතුව සොයාගෙන යාමේදී දරුවන්ගේ මාපියන් ලිංගිකව එක්වී තිබුනේ අඳුරු පාළු නිවසක් තුල බව ඩිංගි මාමා කියනු ඇසුනේය. තවත් කතාවකට අනුව මොකක්දෝ ක්‍රමයකට (තත්කාල කේන්දරය?) බැලූ විට පුද්ගලයෙකුගේ ඇ‍ඟේ ඇති රෝම කූප සංඛ්‍යාව පවා කිවහැකි බවත්, එම ශාස්ත්‍රය දන්නා දකුණු පළාතේ සිටිනා එකම ජ්‍යෝතිෂඥයා ඔහුගේ ගුරුවරයා බවත් කීවේය.

ඩිංගි මාමාගේ ජ්‍යෝතිෂ පන්තියට නැවතීමට තිත තැබුනේ ඔහුගේ ගුරුවරයා වූ මාගේ ඥාති සීයාගේ අභාවයත් සමඟය. කෙසේ වුවත් ඔහු ඒ වනවිට සැලකිය යුතු දුරක් ය‍ාමට සමත්ව තිබුනි. පසු කාලයේ කේන්දර-පොරොන්දම් බැලීම් වැනි කටයුතු කරගෙන සාමාන්‍ය ජ්‍යෝතිෂඥයෙක් ලෙස කටයුතු කලේය.

මෑත කාලයේ දිනෙක අප නිවසේ අලුත්වැඩියා කටයුත්තකට එක්වූ ඩිංගි මාමා මට මුණගැසුනේ සෑහෙන කාලයකිිනි. කලකට ඉහත මා ගෙනැවිත් තිබූ අතිවිශේෂ කාලේ කුප්පිය දිවා විවේකයේදී ඔහුට දුන් අතර ජ්‍යෝතිෂය කටයුතු ගැන විමසීමටද අමතක නොකලෙමි. ජ්‍යෝතිෂඥයෙකු ලෙස ඔහුගේ පිළිතුර "සාමාන්‍ය" එකක් නොවීය.

"මේව ඉතිං මිනිස්සුන්ගෙ ඔලුවල තියන දේවල්නෙ. ඔය මොනව හරි හිත හැදෙන්න කියල යවනව. යාළුවෙච්ච කෙල්ලො කොල්ලො එනව පොරොන්දම් බලන්න, අපි මොකටද අහිංසකයන්ගෙ කුරුළු කූඩු කඩන්නෙ, හොඳටම පොරොන්දම් ගැලපෙනව කියනව එයාලට, මේව බඩ වඩාගන්න තියන දේවල්නෙ"

Thursday, August 18, 2016

රාජගෙ විස්තරේ.....[සයිබර් වරිගෙ උණ්ඩියා]

"පොලිස් ආරක්ෂක රිය පෙරටු කරගෙන නැදුන්ගමුවේ රාජා හස්ථියා මහනුවර බලා පාගමනින් ගියේය.....අතර මගදී රාජා ඇතා එන මග සිටි දඩාවතේ යන බල්ලෙකු පොලිස් පා පහරින් කාණුවට විසිවී ගියේය.....ඌ දෙස වරක් වත් නොබැලූ නැදුන්ගමුවේ රාජා සිය ගමනේ යෙදෙනු දුටු වල් බල්ලා රිදුම් දෙන බඳ ප්‍රදේශය ලෙව කා ගනිමින්

"....දිනුවාම උඹ උඩින් යන බව අපි දැනගෙන හිටියා රාජා.....ආයෙ වරකො "වන රාජ" තෝරන දවසට හොඬවැල් නළලට අරගෙන අපි ඉන්න තැන්වලට.....තොට සළකඤ්ඤං ඊළඟ සැරේ....අම්මපා මම මී හරකට දෙන්නෙ ඊළඟ පාර.....උඹ ඔය පල්ලමකට වැටියං යන ගමන් " යැයි මුමුණන්නට විය......
කළින් වතාවේ මී හරකා දිනවා කරගත් හරිය දඩාවතේ යන බැල්ලියක පැමිණ උගේ කණට මුව තියා කොඳුරා ගිය පසු
"ඌත් එකයි, මූත් එකයි... ඇයි අරූ?.....අර උළමා.....ඌත් එකයි.....දෙන්න එකෙක් නෑ ගෑණියේ.... " කියමින් යළිත් තැලුම ලෙවකන්නට විය....

කඩුගන්නාව ප්‍රදේශයට රාජා හස්ථියා පැමිණෙන විට "සර්, සර්" කියන සද්දයක් ඇසී ඌ හැරී බලද්දී පෙනුනේ පෙත්සමක් තුඩඟින් ගත් කවුඩෙකු වේගයෙන් පියාඹා පස්සෙන් එන ආකාරයයි.....පෙත්සම රාජා හස්ථියාගේ පාමුල දැමූ කවුඩා, හස්ථියාට හිස නමා ආචාර කරමින් හොට තාර පාරේ උලා ගත්තේය....අනතුරුව පොලිස් රාළහාමිලා ඌව එතනම දොදොල් කරන්නට පෙර "සර්....පිළිමතලව්වෙ ගස් කපනවා.....අපිට ලගින්න තැනක් නෑ....බෙට්ටක් දාන්න තැනක් නෑ....මොනව හරි කරන්න සර්..." කියාගෙන යළි අහසට නැගුණේය....අහසේ ඌ එනතුරු බලාගෙන සිටි කවුඩු රැළේ ඉදිරියෙන් සිටි නාහෙට නාහන තරුණ කවුඩෙකු "වැඩක් නෑ තාත්තේ.....තාත්තලා නිකන් චාටර් වෙනවා විතරයි.....ඕකුන්ට අපේ දුක තේරෙන්නෙ නෑ.....ඕකුන්ට වඳින්න යන තාත්තලා නිසයි මේ සමාජය ගොඩගන්න බැරි" යැයි එතන සිටි සැමට ඇසෙන සේ කෑ ගැසුවේය.... ( මෙම සිද්ධියෙන් දින කීපයකට පසුව එම තරුණ කවුඩාගේ පොඩි පට්ටම් වී ගිය සිරුර ගසක් යට තිබී හමු වූ අතර, ඌ පියාඹන්නට ගොස් ගසක වැදී මළ බව පොලිස් මාධ්‍ය ප්‍රකාශක කීවේය......තැන් තැන් වල කුටු කුටු ගානු හැර අනෙක් සතුන්ද මේ "අමුතු අහුඹුව" ප්‍රතික්ෂේප කරන බවක් නොපෙනිනි..... )

මග දිගට සිටි රිලව් සහ හැළි වඳුරන් රාජා ඇතාගේ හොඬවැලට සිය පැටව් දික් කිරීමේ අප්‍රසන්න උත්සාහය මෙන්ම, පැටවු රැගෙන උගේ බඩ යටින් රිංගන්නට දරන අමන වෑයම වළක්වන්නට රාළහාමිලාට ඉමහත් පරිශ්‍රමයක් දැරීමට සිදුවිය......"යකුනේ .. ඕකා ඔය හොඬවැල පාවිච්චි කරලම තමයි සත්තුන්ව උස්සලා පොලේ ගහන්නෙ......තොපි එහෙව් හොඬවැලට පැටව් දික් කරගෙන ඉන්නවද?" කියා ඇසූ මහළු බකමූණෙකුට හොඳවයින් කුණු හරුප ග්ලොසරියක්ම අසා ගැනීමට සිදුවිය.....

පේරාදෙණිය ප්‍රදේශයට පැමිණි රාජා හස්ථියා පෙරහැරට යමින් සිටි තවත් අලි ඇතුන් සහ අවට ප්‍රදේශයේ ලැග සිටි ගව මහීෂාදීන් අමතා කථාවක් පැවැත්වූයේය..... "මේ පේරාදෙණියට ඒ නම වැටිලා තියෙන්නෙ පළවෙනි බුවා නෙක නෙක බාහු රජතුමාගේ කාලෙ.....ඒ කාලෙ මෙතන පේර ගෙඩියක් දෙණිය මැද්දෙ රෝල් වෙවී තිබිලා තියෙනවා.....ඒ නිසයි මෙතන පේරා + දෙණිය කියල නම වැටුනෙ.....අපි ඔස්ට්‍රේලියාවෙ පේර වවන්න සාකච්ඡා කරගෙන යනවා ..." යැයි ඇතුගේ මුවෙන් පිටවන විට, එම කථාව අසාගෙන ගසක් මත සිටි දඬු ලේන්නු දෙන්නෙක්ගෙන් එකෙක් අනෙකා දෙසට හැරී " ඒ බං......මූ පට්ට සිරා මොළයක් කියලා නේද උඹ කිව්වෙ....?.....මොනවද බං මේ කියන කථා.....? " යි ඇසුවේය.....ඒ කරන කථාවේ ඇති මහා ගැඹුර වටහා ගන්නට එම දඬු ලේනාගේ මොළය ප්‍රමාණවත් නොවන බව අනෙක් දඬු ලේනා විස්තර කර දෙනු ඇසිණි......

ගැටඹේ දේවාල භූමියේදි කළින් වතාවක් නසරාණි වැඩක් කර මාට්ටු වී, කුජීත වී සිටි ගස් ගෝනෙක් උක් දඬු කෑල්ලක් ගෙනත් දුන් විට, එය සොඬින් ගත් නැදුන්ගමුවේ රාජා හස්ථියා, එම ගෝනා දෙස බලා එක ඇසකින් ඉඟි මරා, හොඬවැලෙන් "තම්බ්ස් අප්" එකක් දැම්මේය.....එම ගෝනාගේ සියළු වස්දොස් සමග උපන් දා සිට කළ පව් සියල්ල එම මොහොතේම දූරිං භූත වූ අතර, ඌ කළ මජරි වැඩ හෙළිදරව් කරමින් සිටි උන්ගේ වස්ත්‍රාභරණ ජල වාෂ්ප බිඳිති බවට පත්ව උඩු සුළඟට මුසුවිය......මේ අතර තමාට සහ තම රංචුවට අතීසාරය වැළඳී ඇති බව කියාගෙන මග දිගට බඩ එළිය හලමින් දුවගෙන ආ මීමින්නෙකුට එම ඛේදවාචකය පුවතක් වී පසුවදා පත්‍රයේ ඵලවනතුරු ඉවසා සිටින ලෙස හස්ථියාගේ උපදේශකයෙකුගෙන් උපදෙස් ලැබිණි.....

ලස්සනට සරසන ලද නැදුන්ගමුවේ හස්ථියා පාවඩ පිට පෙරහැරේ වඩිද්දී ඌට සාදුකාර දුන් සහ නොදුන් අනෙක් සියළු සතුන් උගේ පස්සෙන් වැටී යන දර්ශණය බලා සිටි මහළු බකමූණා නුවර වැවට ඉහළින් ඈත අහසට පියාඹා නොපෙනී ගියේය.....
-සයිබර් වරිගෙ උණ්ඩියා"

Thursday, August 4, 2016

රසිකලාට පාද යාත්‍රා යන්න ලේසි ඇයි?

පහුගිය දවසක රසික ලියල තිබුන එයා පාද යාත්‍රාවක් ගිය හැටි. කිලෝමීටර හයහමාරක් පැයකින් ගියා කියලයි කියන්නෙ. මමත් එක සැරයක් පාද යාත්‍රාවක් පටන් ගත්ත ඇඟේ බර කිලෝ දෙක තුනක් අඩු කරගන්න. මගේ බර දැනට කිලෝ හැත්තෑ හතරයි. උස සෙන්ටිමීටර එකසිය හැත්තෑ දෙකක්ද කොහෙද. ඒක දැනගත්තෙ ලඟදි අල්ලපු ඔෆීස් එකේ තිබුන චෙකප් එකකට ගිහිල්ල. ලේ, මුත්‍රා ආදිය චෙක් කරල අවසානයේ ඔක්කොම අරගෙන යනව දොස්තර නෝන ලඟට. එයා තමයි කිව්වෙ කිලෝ දෙකතුනක් අඩුකරගන්න කියල. ඊට අමතරව දීපු උපදෙස් ටික තමයි, (කවදාවත් නොකෙරෙන) මතෙන් සහ දුමෙන් වැලකීම, තෙල් කෑම අඩුකිරීම, ව්‍යායාම කිරීම,... ආදිය. තෙලෙන් බැදපු කෑම, කෘතීම රසකාරක යෙදූ බීම ආදිය ගැන විශේෂයෙන්ම කිව්ව. ලස්සනම කතාව ඊට පස්සෙ කිව්වෙ අල්ලපු ඔෆිස් එකේ, අපේ පැමිණීම අත්සන් ගත්ත නිලධාරිනිය.

"අපි උදේ නං රෝල්ස්, මයිලෝ එහෙම දුන්න මහත්තය,.... දැං නං ඉවරයි"

හරිි, ආයෙත් කතාවට. මම ඔය ඇවිදින්න පටන්ගත්ත කාලෙ (ඒ කියන්නෙ ඔය කිව්ව චෙකප් එකට සතියකට විතර කලින්. එන්ජිම අවුලක් නැති නිසා බර අඩුකරගැනීමේ ආසාවත් නැතුව ගියා ඒකෙන්) වැඩට ගිහිල්ල එන ගමන් ගෙදරට කිලෝමීටර එකහමාරක් විතර මෙහා හන්දියෙ බැහැල පයින් එන්න ගත්ත. ඒකට තවත් හේතුවක් වුනේ ටවුමෙ බස් නැවතුමේ බස්එක නවත්වගෙන ඉන්න කාලය ටිකක් වැඩිවීම. පයින් යාම සහ බසයෙන් යාම අතර වෙනස විනාඩි පහක් වෙයි ඕනනං.

හැබැයි මගේ පාද යාත්‍රාව එක දවසෙන් නැවතුනා වාහන තදබදය නිසා. ඇවිදීම නිදහසේ කරන්න නං නොනැවතී එක දිගට යන්න ඕන. ඒකට මේ රසිකලාගෙ වගේ වාහන අඩු පාරක් ඕන. වාහනවලට අයින් වෙවී මොන ජොගින්ද! ලඟදි අපේ කාර්යාලෙ නෝන කෙනෙකුගෙ අසල්වැසියෙක් ව්‍යායාම කරන්න ගිහිල්ල මැරුන කියල කිව්ව. එයා උදේ පහට විතර බයිසිකලක් පැදගෙන යද්දි පස්සෙන් ආපු වාහනයක හැපිල මැරිල!


ඊයෙ රුවන් ජයතුංග බ්ලොග් එකේ දාල තිබුන රිය අනතුරු ගැන. ලංකාවෙ රිය අනතුරු වැඩි බවත් ලංකාවෙ රියදුරන් විනයක් නැති පිරිසක් බවත් බොහෝ දෙනෙක් කියනව. ඒක ඇත්ත වෙන්න පුළුවන්. නමුත් මම අධ්‍යයනය කරල තියන විදියට නං රිය අනතුරුවලට හේතුව රියදුරන්ගේ වැරැද්ද විතරක්ම නෙවේ. ලංකාවේ මාර්ග පද්ධතියේ තියන අවුලක්. පහුගිය කාලෙ හිටු කියල පාරවල් හැදුන, කාපට් කලා, කොන්ක්‍රීට් කලා. නමුත් පාරවල්වල මතුපිට ඇතිවුන දියුණුව පුළුල් කිරීම පැත්තෙන් ඇතිවුනේ නෑ. තිබුන පාරවල් හොඳට හැදුව. දැං පිඹගෙන යන්න පුළුවන්. නමුත් වැඩිවුන වාහනවලට සාපේක්ෂව පාරේ පළල එහෙමකට වැඩිවුනේ නෑ. ඉතිං අනිවාර්ය ප්‍රතිපලය තමයි රිය අනතුරු. මේවගේ අසහනකාරී පාරවල්වල යන ත්‍රීරෝද රථ, මෝටර් සයිකල් ආදිය අස්සෙන් ගහගෙන නොගියොත් පුදුමයි. අනිත් අවුල තමයි මාර්ග සංවර්ධනයට සාපේක්ෂව පොදු ප්‍රවාහනය දියුණු නොවීම. ඒකෙත් අවසාන ප්‍රතිපලය පෞද්ගලික වාහන වැඩිවීම.

අන්නේකයි ලංකාවෙ පාද යාත්‍රා ඕස්ට්‍රේලියාවෙ වගේ ලේසි නැත්තෙ.

ප/ලි: පාද යාත්‍රාවල යද්දි ගුටි කන්න වෙන්නෙත් ලංකාවෙදි.


ප/ප/ලි : රසික මහතා පමණක් නොව "සා රස" මහතාද ඕස්ට්‍රේලියාවේ ගොස් ඇති බව දන්වන ලදී.