පෝලිමක් දාමුද?.......

ඊයෙ ගියා පෙට් මැසිම ලඟට පඩිය ගන්න. අප්පට හුඩු! පොලිම මීටර සීයක් විතර ඇති. බදාදා කඩපොලට ආපු මනුස්සයො බඩු මළු උස්සගෙන පෝලිමේ. ඔය සීන්එක අපේ බැංකුව ලඟකදි ඉඳල දියත්කල වැඩපිලිවෙලක ප්‍රතිපලයක් විදියට වෙච්ච කේස් එකක්. අතගාල වැඩිවුනාම අර මොකද්ද යනව වගේ ප්‍රතිපලේ පොලිම. පෝලිම කිව්වම ඉතිං ඉස්සර තිබුන පෝලිම් යුගයක්. 70-77 අම්මගෙ ආණ්ඩුව කාලෙ බැටරි කෑල්ලක් ගන්නත් පරණ බැටරිය තියාගෙන පෝලිමේ ඉන්න උනාලු. ඉස්සර මේ පැත්තෙ ගාමන්ට් එකක් ඕපන් කරන්න ආපු ප්‍රේමදාස මහත්තය කිව්ව විදියට ඔය පෝලිම් වලදි සමහර අම්මලාට බබාල ලැබුනලු. කොහොමහරි ඔන්න ඒ කාලෙ සමූපකාරයක තිබුනලු මොනවද පෝලිමක්. සෑහෙන දිගයිලු. එක මරුමුස් ඩයල් එකක් ටික වෙලාවක් පෝලිමේ ඉඳල බනිනවලු මැනේජර්ට. මෑන් ඒ වෙද්දිත් ටිකක් අනුමත වෙලා ඉඳල තියෙන්නෙ.

"අරි! මං මේක මැනේජරෙයත් එක්ක බේරගන්නංකො" කියපු මෑන් ගියාලු පිටිපස්ස පැත්තෙන්.
ඊට විනාඩි දහයකට විතර පස්සෙ මෙන්න බොලේ මෑන් හිමීට පෝලිමේ පිටිපස්සට ඇවිල්ල සෙට්වුනාලු. මේ අතරෙ ටිකක් කට තියන මහත්තයෙක් ටෝකක් දුන්නලු.

"ඇයි ආපහු පෝලිමට ආවෙ?"

"කොඒද බොෂ්, ඌට ගේම දෙන්ඩ ඉන්න එවුන්ගෙ පෝලිම මේවගේ තුනක් විතරෑති"

ඉස්සර අපි අට වසරෙ විතර ඉන්න කාලෙ සාපෙල හිටිය අයියල අක්කලගෙ විවාදයක් සංවිධානය කලා. ඒ කාලෙ දැං වගේ විවාද ටීම් හිටියෙ නෑ ඉස්කෝල වල. ඒකට දැං. ඕන ඉස්කෝලෙක ඉන්නව විවාද ටීම් එකක්, ඒ මදිවට දැං හැමතැනම බිග් මැච්. හරි ඔය විවාදෙ කලේ විවෘත ආර්තිකේ හොඳයි-නරකයි විදියට. එක අයියකෙනෙක් කියනව මෙහෙම.

"ගුරු මව්වරුනි පියවරුනි නංගී මල්ලී 70-77 කාලෙ බඩු ගන්න බැරිවුනේ අපිට විතරයි. දේශපාලනය කරපු අපේ මාම කෙනෙක් ඒකාලෙ ගිහිල්ල තිබුන ඇමතිකෙනෙකුගෙ ගෙදර. යනකොට ඇමතිතුමාගෙ ‍ගෙදර ලඟ පාරෙ අලුත්ම අලුත් ටයර් එකක් පදිනව ඇමතිතුමාගෙ ලොකු පුතා,.....(ඒ කාලෙ ටයර් එකක් ගන්න උපරිම කට්ටක් කන්න වෙනව, ටයර් පැදිල්ල ගැන ඔහේල දන්නවද මංද!)...ගේට්ටුව ඇරගෙන ඇතුලට යනකොට ඇමතිතුමාගෙ දුව යාලුවො එක්ක මිදුලෙ ලීකෙළි ගහනව උම්බලකඩ පොලු වලින්...... ඒක බලාගෙන කුස්සිය පැත්තට ගියාම චූටි දුව පරිප්පු වලට වතුර දාල කෝම්පිට්ටු හදනව......අන්න එහෙමයි ආර්තිකේ..."

ළමයි හිනාවෙනව ආතල් එකට. ගුරුවරු හිනා වෙනව 'මුගේ පණ්ඩිතකම' කිය කිය.

කතාවෙන් කතාවෙන් බැංකුවෙ කතාව අමතක වෙනව. පඩි දවසට එහෙම අපේ බැංකුව හරි බිසි. එහෙම දවසකට පොල දවසක් සෙට් උනොත් සොරි තමයි. ඔන්න ඊයෙත් ඒ වගේ. හේතුව මේකයි. මේ පැතිවල එච්චර සල්ලිබාගෙ තියන මිනිස්සු නෑ. කීයක් හරි හොයාගෙන ටිකක් බැංකුවෙ දාල අනිත් ඒවයෙන් තමයි බඩු ගෙනියන්නෙ. හුටා! සල්ලි ඇතත් නැතත් කරන්නෙ ඕකනේද. අර එකෙක් කිව්ව උගේ කුඹුරෙ ගොයම් කපල පාගල අවසානයේ, "වැඩක් නෑ බං කන්නයි විකුණන්නයි විතරයි තියෙන්නෙ" කියල. කොහොමහරි පොඩි පොඩි ගනන් ගන්න බැංකුවට එන මිනිස්සුන්ට ඇප්ලිකේෂන් පුරවල දීල පෙට් කාඩ් එක ගන්න වැඩ සලස්වනව. මේ වැඩේ මාස ගානක ඉඳල කලාට පස්සෙ බැංකුවට යන්නෙ ලයිට්බිල ගෙවන්න විතරයි. ගැජමැටික් ගැන තියා සාක්ෂරතාවයවත් නැති මිනිස්සුන්ට කාඩ් එකෙන් සල්ලි ගන්න තේරුමක් නෑ. ඉතිං පෙට් එක ලඟ පරක්කුව ඩබල්. සමහර මනුස්සයො ලඟ ඉන්න කෙනෙකුට කියල තමයි සල්ලි ගන්නෙ. එක දවසක් මම වයසක අම්ම කෙනෙකුට සල්ලි අරන් දුන්න. කාඩ් එකේ පින් එකත් ඒක ඇතුලෙ තිබුනෙ. අන්තිමට වෙන්නෙ මේවගේ වැඩ තමයි.

පොලිං ගැන කිව්වම මතක් උනේ මම ඉස්සර ගියා ඉංග්‍රීසි පංතියකට. සර් කියනව වාක්‍ය හදන්න වාක්‍ය වලට ඕනවෙන වදන සහ ඒවායේ අකුරුත් කියල දෙනව. ඔන්න 'පෝලිම'ට කියන්නෙ මොකද්ද කියල ඇහුව. සර් කිව්ව කිව් කියල. ඊට පස්සෙ අකුරු මොනවද කියල අහනව.
"කිව්යූඊයූඊ" කියල කිව්ව. කාටවත් තේරුනේ නෑ මේ කියන කුනුහබ්බෙ මොකද්ද කියල. ආයෙත් ඇහුවම ඒ උත්තරේමයි. පස්සෙ බෝඩ් එකේ ලියල පෙන්නන්න උනා. ඔහෙලටත් ඕන්නං ඔය වඩනෙ සද්ද කරල බලන්න. අකුරු ටිකක් කියල හිතාගන්න බෑ කොහොමටවත්.

පෝලිං කතා ඉවරයි. හැබෑට ඔහේල පෝලිං දාල නැද්ද?