අවුරුදු කේක්, අවුරුදු මැසේජ් සහ අවුරුදු කතා

(අවුරුද්ද ඉවර නමුත් කතන්දර ඉතුරුයි). අවුරුදු කේක් කොහොමද? ඉස්සරම, ඒ කියන්නෙ මංතුමා පුංචි එකා සංදියේ අපේ ගම් පලාත්වල කේක් තිබුනෙ නෑ එච්චරම. අපේ උපන්දිනයට උනත් අම්ම හැදුවෙ ඔය කැවුම්, වැලිතලප වගේ දෙයක් තමයි. බහුජාතික කේක් බෝවුනේ ඊට පස්සෙ කාලෙක. ඊ‍ට පස්සෙ කැවුම් කොකිස් දොදොල් වලට වඩා කේක් වලට හිමිවුනේ උසස් තැනක්. රුපියල් තිස්පහක් ‍විතර වෙච්ච කේක් ගෙඩියක් අරගෙන එන එකා කැවුම් කොකිස් මල්ලක් අරගෙන එන කෙනාට වැඩිය සැලකුම් ලැබුව. මේ වෙනකොට ආයෙත් වැඩි ඉල්ලුම තියෙන්නෙ කැවුම් කොකිස් වලට තමයි.

ඉස්සර අපේ ගෙදරට එන අවුරුදු කේක්-බිස්කට් වල ජාතකේ හොයන පුරුද්ද මටයි අක්කල දෙන්නටයි තිබුන. වැඩේ සිද්ධ වෙන්නෙ මෙහෙමයි. ඔන්න කේක් එකක් අරගෙන ආව කියල හිතමු තාත්තගෙ පැත්තෙ ඥාතියෙක් වෙච්ච "සුදු ආච්චි". ඊලඟට ඒකෙ නිෂ්පාදකයා හොයාගන්නව. අපි හිතමු "මහබාගෙ" පැත්තෙ හදපු එකක් කියල, ඊට පස්සෙ අම්මට තාත්තට කියනව විස්තරේ.
"හා එහෙනං ඕක සුදු ආච්චිගෙ ලේලිගෙ ගමෙන් ගෙනාපු එකක්"

දැක්ක නේද ලින්ක් එක හොයාගන්න හැටි!

එක සැරයක් ඔන්න අපේ ගෙදරට ආව කේක් එකක්. ගෙනාවෙ සුදු ආච්චි කෙනෙක්. ඒ වෙලාවෙ අපේ ලොකු තාත්තත් ගෙදර. ආච්චි ගිය ගමන් මමයි අක්කල දෙන්නයි සුපුරුදු පරීක්ෂණය පටන් ගත්ත. මේ අතරෙ ලොකු තාත්තත් කේක් එකට ඔලුව දැම්ම.

"හහ් හහ් හහ් හා.... මේක අපේ ගෙදරින් සුදු ආච්චිලගෙ ගෙදරට දුන්න කේක්එක බං, ඕක අපේ ගෙදරට ගෙනාවෙ ලොකු අම්මලෑ ගෙදරිං"

හොඳම සිද්ධිය ඒක නෙවේ. කවුරුහරි කේක් එකක් ගෙනාපු ගමන් ඒක කපන්න යෝජනා කරන අපි, මේසැරෙත් ඒ යෝජනාව අපේ අම්මට ගෙනාව. අම්මගෙ උත්තරේ උනේ,

"බෑ ඒක ලොකු තාත්තලගෙ ගෙදර ගෙනියන්න තියාගනිමු" කියන එකයි. සම්පූර්ණ වටයක් ගෙවන්න තිබුනු අවස්තාව කේක් එකට මිස් වුනේ නූලෙන්.

හුඟක් විට 'කේක් ගෙනාපු තැන් වලට කේක්, කැවිලි ගෙනා තැන් වලට කැවිලි' වගේ රිටන් එකක් තමයි අපේ අම්මලගෙන් ලැබුනෙ. මේ වෙද්දි නං කේක්-කැවිලි වලින් මිදිල සීනි, කිරිපිටි වගේ අත්‍යාවශ දේවල් අවුරුද්දට ගෙනියන්නෙ.

අපේ අල්ලපු ගෙදර හිටිය චූටි මාම කියල කෙනෙක්. භීෂණ කාලෙ මෑන් මැරුන. ඔන්න දවසක් අවුරුද්ද දවසක චූටි මාම දෙකක් දාගෙන නිදි. මේ වෙලාවෙ ගෙදරට කවුදෝ ආව. චූටි මාමගෙ නංගි, අයියට කතා කලා.
"අයියේ කවුද ඇවිලිල?"
"මොකුත් ගෙනල්ලද?"
"පේන්න නෑ"
"එහෙනං යන්න කියපං"

කේක් වගේම වටේ යන අනිත් ජාතිය තමයි අවුරුදු එස්එම්එස්. මටත් අවුරුදු එස්එම්එස් කීපයක්ම ආව. නෝනට ආපු ලස්සන එස්එම්එස් එකක් තෝරගෙන ඒක මට එවාගෙන ඒක තමයි මම අර උදවියට යැව්වෙ. අවුරුදු තෑගි වගේම මේවත් ඔහේ යනව එනව විතරයි. එහෙම බැලුවම "OYATATH PAWLE SAMATATH KIRIYEN PENIYEN ITHIRENA SUBA ALUTH AWRUDDAK WEWA" වගේ අවංක මැසේජ් හොඳයි ඔක්කෝටම වැඩිය. (මේක දැක්කම මතක් වෙන්නෙ අර කැපිටල් ඇනෝ අංකල්). එක සැරයක් මම මට ආපු මේවගේ මැසේජ් එකක් එක එකාට ෆෝවඩ් කලා. (හරියට මහන්සි වෙලා ටයිප් කලා වගේ).

මගේ යාලුවෙක් අවුරුද්ද නිමිත්තෙන් මැසේජ් එකක් හැදුව.(මටත් එව්ව දැන් මතක නෑ). මැසේජ් එකේ පේලි වල මුල් අකුරු සෙට් කලාම එන්නෙ උගේ නම. ඔන්න මැසේජ් එක යැව්ව හතර අතේ. දවල් වෙනකොට මෙන්න බොලේ ඒ මැසේජ් එක යාලුවට ආපහු එනව. මොකා නමුත් නොදන්නා කමට එවල.

මේ අවුරුද්ද දවසේ කිරිබත් එහෙම කාල මංතුමා බ්ලොග් එකේ සුභපැතුම් පෝස්ටුව ටයිප් කරනව.
"ශ්‍රී ලාංකා ප්‍රජාතාන්ත්‍රික සමාජවාදී ජනරජයේ ජනාධිපතිතුමාටත්.........." මේ වෙලාවෙ නෝන ලඟට ආව,
(කට පොඩ්ඩක් ඇල කරල)"ජනාධිපත්තුමාටත් සුභපතනව වගේ"
"දන්න කියන මනුස්සයනේ, අනෙක අවුරුද්දට ඔය තරහමරහ තියාගන්න හොඳ නෑනේ..."
ටික වෙලාවකින් මැසේජ් එකක් ආව ජනාධිපතිතුමාගෙන්.

Oba Samata Suba Nawa Vasarak Weva!
Ungal Anaivarukkum Puththandu Nalvalthukkal!
Wish You All a Very Happy New Year!
-President

"මෙන්න බලන්න. ජනාධිපතිතුමා මගේ බ්ලොග්එක කියවල. කමෙන්ට් නොදා ඒකයි මේ මැසේජ් එකක්ම එවුවෙ! "